قازاقستاننىڭ سولتۇستىگىندەگى قىزىلجار قالاسىن رەسەيگە قوسۋ تۋرالى ماسەلە كوتەرىپ، مەملەكەتتىك شەكارانىڭ تۇتاستىعىن بۇزۋعا ارەكەتتەنگەن، سەپاراتيست ۆالەري ليحۋشين قىلمىستىق جاۋاپكەرشىلىكتەن بوساتىلدى، - دەپ حابارلايدى "ادىرنا" ۇلتتىق پورتالى pkzsk.info سايتىنا سىلتەمە جاساپ. وتكەن جىلى پەتروپاۆل قالالىق سوتى Facebook الەۋمەتتىك جەلىسىندە «پيوتر سيدوروۆ» دەگەن لاقاپ اتپەن تىركەلىپ الىپ، قازاقتىڭ ءتىلىن، قازاق حالقىن قورلاپ جانە پەتروپاۆل قالاسىن رەسەيگە قوسۋ تۋرالى باستاما كوتەرىپ جۇرگەن ۆالەري ءليحۋشيندى 8 جىلعا باس بوستاندىعىنان ايىرعان بولاتىن.
ۆالەري ءليحۋشيننىڭ ادۆوكاتىنىڭ ايتۋىنشا، ول وقۋشى كەزىندە "پسيحيكاسىندا اۋىتقۋى بار" دەگەن دياگنوزبەن پسيحونەۆرولوگيالىق ديسپانسەردە ەسەپتە تۇرعان. جۇيكە اۋىرۋى بار بالالارعا ارنالعان ارنايى مەكتەپتى بىتىرگەن. بىراق كەيىنەن ليحۋشين ساۋىققانى سەبەپتى ەسەپتەن شىعارىلعان. سوت كەزىندە ول ءوزىنىڭ باسىن ۇرىپ، الدەبىر داۋىستاردىڭ تاپسىرۋىمەن ارەكەت ەتكەنىن ايتىپ شاعىمداندى. سوتتالۋشىنىڭ وسى ارەكەتىنەن كەيىن سوت وعان پسيحولوگيالىق-پسيحياتريالىق ساراپتاما تاعايىنداۋعا شەشىم قابىلداعان. ساراپتاما ناتيجەسى ۆالەري ءليحۋشيننىڭ اقىل-ەسى اۋىسقانىن كورسەتكەن.
پەتروپاۆل قالالىق سوتى 4 تامىز كۇنى ساراپتاما قورىتىندىسىنا سۇيەنىپ، سەپاراتيستىڭ بۇرىنعى شىعارىلعان ۇكىمنىڭ كۇشىن جويدى. سۋديا ءليحۋشيننىڭ "اقىل-ەسىنىڭ اۋىسقانى دالەلدەندى" دەپ تاۋىپ، قىلمىستىق جاۋاپكەرشىلىكتەن بوساتىپ، ونى ءماجبۇرلى تۇردە پسيحيكالىق اۋىتقۋ بار ازاماتتاردى ەمدەيتىن اۋرۋحاناعا اۋىستىرۋعا شەشىم شىعاردى.
سوت وتىرىسىنا ءليحۋشيننىڭ ءوزى قاتىسپاعان. ونىڭ زاڭدى وكىلى قورعاۋىنداعى ۆالەري ءليحۋشيننىڭ قىلمىسى دالەلدەنبەگەنى سەبەپتى وندىرىستەگى ءىستى قىسقارتۋدى سۇراعان.
"اقىل-ەسىنىڭ اقاۋى بار" ازاماتتىڭ فەيسبۋك الەۋمەتتىك جەلىسىندە پەتر سيدوروۆ پاراقشاسىن قولداناتىنى انىقتالدى. ول پاراقشاسىندا ۇدايى تۇردە ۇلتارالىق دۇردارازدىقتى قوزدىرۋعا ۇمتىلاتىنى بايقالادى.
ەسكە سالا كەتەيىك، قىزىلجار وڭىرىندە سوڭعى 2,5 جىل ىشىندە "سەپاراتيستىك ارەكەت جاسادى", "ۇلتارازدىعىن قوزدىردى" دەگەن ايىپپەن 11 ازامات سوتتالعان. ولاردىڭ ىشىندە ايىپتى دەپ تانىلىپ، بىرنەشە جىلعا سوتتالعاندارى دا، شارتتى جازامەن بوستاندىققا شىققاندارى دا بار. سول 11 ءىستىڭ ىشىندە ەڭ شۋلىسى ۆياچەسلاۆ زۋدەرماننىڭ ارەكەتى بولدى. اۆتو جوندەۋشى بولىپ جۇمىس ىستەيتىن ۆياچەسلاۆ زۋدەرمان باستاعان توپ (19 ادام) 2023 جىلدىڭ 19 ناۋرىزىندا "ەڭبەكشى حالىقتىڭ كەڭەسى" دەگەن ۇيىمنىڭ اتىنان مالىمدەمە جاسادى. سول مالىمدەمەدە ولار قازاقستان مەملەكەتىنىڭ قۇقىقتىق نەگىزىنە كۇمان كەلتىرىپ، وزدەرىنىڭ "تاۋەلسىزدىگىن جاريالادى". جيىندا ۇيىمعا توراعا سايلاپ، "دەكلاراتسيا", "جارعى", "ەلتاڭبا مەن ءمور" جوباسىن بەكىتتى. 18 ءساۋىر كۇنى جيىن وتكىزگەندەردىڭ اراسىنداعى بەلسەندى ازاماتتار قامالدى، ولاردىڭ ءىسى ءالى تەرگەلىپ جاتىر.
سونىمەن قاتار، قىزىلجاردا سەپەراتيزم بابىمەن تەك سلاۆيان تەكتەس ۇلتتاردىڭ وكىلدەرى عانا ەمەس، قازاقتار دا ءىستى بولعان. ماسەلەن، اسىلبەك سەكەۋوۆ اتتى ازامات "سلاۆياندىق ۇلت وكىلدەرىن قورلادى" دەگەن ايىپپەن شارتتى جازامەن 4 جىلعا سوتتالعان.
Adyrna.kz
