سولتۇستىك قازاقستان وبلىسىنىڭ تۇرعىندارى رەسەي پاتشالىعى كەزىندەگى اۋىلداردىڭ 265-270 جىلدىقتارىن تويلادى، - دەپ حابارلايدى ادىرنا ۇلتتىق پورتالى pkzsk.info سايتىنا سىلتەمە جاساپ.
سولتۇستىك قازاقستان وبلىسىنىڭ قىزىلجار اۋدانىنا قاراستى دولماتوۆو اۋىلىنىڭ ىرگەتاسىنىڭ قالانعانىنا بيىل 265 جىل تولعان. 1758 جىلى اۋليە پەتر مەن پاۆل قازاق جەرىن وتارلاۋ ماقساتىندا ەسىل وزەنىنىڭ بويىنا شارۋالاردى كوشىرىپ اكەلىپ، ولارعا جەر ءبولىپ بەرگەن. پاتشالىق رەسەيدىڭ بۇل ساياساتى ارادا كوپ ۋاقىت وتپەي قارقىن الىپ، قىزىلجار ماڭىنا كوشىپ كەلگىسى كەلەتىن وتارلاۋشىلاردىڭ سانى كۇرت ارتقان. ماسەلەن، سول جىلدارى ءبىر عانا توبىل قىراتى ماڭىنان جەر الۋعا 295 ءوتىنىش ءتۇسىپتى. مۇنىڭ سوڭى شارۋالاردىڭ قۇجات كۇتپەستەن جاپپاي ەسىل بويىنا اعىلۋىنا وراي تۋعىزدى. سول جىلدارى قاسقىرلى دەپ اتالعان بۇل اۋىل رەسەيدەن قىزىلجار قالاسىنا اعىلعان ساۋدا كەرۋەندەرىنىڭ ايالدايتىن ورتالىعىنا اينالعان.
ءدال وسىنداي مەرەكەنى مامليۋت اۋدانىنا قاراستى دۋبروۆنوە اۋىلى دا اتاپ وتكەن. "دۋبروۆنوە اۋىلى پەتروپاۆلداعى اۋليە پەتر بەكىنىسىنىڭ قۇرلىسى باستالعان سوڭ ءبىر جىلدان كەيىن، 1753 جىلدىڭ 8 قىركۇيەگىندە قۇرىلعان. بيىل دۋبروۆنوە ەلدىمەكەنىنىڭ ىرگەتاسى قالانعانىنا 270 جىل تولدى" دەيدى جەرگىلىكتى تۇرعىندار.
اۋىل تۇرعىندارى وسىنداي تاريحتان سىر شەرتىپ، كونتسەرتتىك شارالار ۇيىمداستىرىپ، قازاقستاندى پاتشالىق رەسەيدىڭ وتارلاعان كۇنىن تويلاپ جاتقانىمەن، قازىر دولماتوۆو قىزىلجار اۋدانىنىڭ بەريوزوۆسك سەلولىق وكرۋگىنە قاراستى كىشكەنە عانا اۋىل سانالادى. 2009 جىلعى ساناق بويىنشا حالقىنىڭ سانى 466 ادام. ال، مامليۋت اۋدانىنا قاراستى دۋبروۆنوە اۋىلىندا 700-گە جۋىق حالىق تۇرادى.
Adyrna.kz
