الەمگە ايگىلى تاعى ءبىر برەند ىنتىماقتاستىق پەن وندىرىستىك سەرىكتەستىك ورناتۋ ءۇشىن ورتالىق ازيا مەملەكەتتەرىنىڭ ىشىندە وزبەكستاندى تاڭدادى. ەندى اندىجانداعى Sino International وزبەك كاسىپورنى كۇنىنە التى مىڭ جۇپ Nike كروسسوۆكالارىن تىگەتىنى ايتىلدى، دەپ حابارلايدى "ادىرنا" ۇلتتىق پورتالى.
Nike ستراتەگياسىنا سايكەس، وزبەكستاندا شىعارىلعان كروسسوۆكالار ورتالىق ازيا مەن پاكىستان نارىعىنا شىعارىلماق.
Nike ءاربىر سپورتتىق اياق كيىم شىعاراتىن ەل ءۇشىن رەسمي شتريح-كود بەرەدى. ورايى كەلگەندە ايتا كەتەيىك، بۇل شتريح-كودتى وزبەكستان دا الدى. اندىجانداعى كاسىپورىننىڭ الەمدىك برەندتەگى كروسسوۆكالاردىڭ بارلىق ۇلگىلەرىن شىعارۋعا قۇقىعى بار.
وزبەكتەر الەمدىك برەندتى ەلىندە ءوندىرۋ ءۇشىن بىراق ستراتەگيالىق قادامداردى جۇزەگە اسىرعان. ءوندىرىس جەلىسىن ىسكە قوسۋ ءۇشىن Sino International كاسىپورىنى 5 جىل ىشىندە Nike تالاپ ەتكەن بارلىق حالىقارالىق ساپا ستاندارتتارىن تولىعىمەن ەنگىزگەن. اتاپ ايتقاندا، ارنايى وندىرىستىك جەلىلەر قۇرعان، قىزمەتكەرلەرگە لايىقتى ەڭبەك جاعدايلارىن جاساعان، جوعارى ساپانى باقىلاۋدى كۇشەيتكەن.
قازىر وزبەكتەر الەمگە ايگىلى برەند كروسسوۆكالارىنىڭ العاشقى پارتياسىن شىعارىپ جاتىر.قازىرگى تاڭدا IE Sino International كومپانياسىندا 50 ادام جۇمىس ىستەيدى. سپورتتىق اياق كيىمنىڭ ۇلتانى (اياق كيىم تابانى) مەن ۇستىڭگى جاعىن قالىپتاۋ جەلىلەرى ىسكە قوسىلعان. وزبەكستاندىق مامانداردىڭ بىلىكتىلىگىن ارتىرۋعا Nikە-ءتىڭ قىتايداعى فيليالى جاردەمدەسپەك. ولار وزبەك تەحنولوگتارىن، ديزاينەرلەرى مەن تىگىنشىلەردى شىڭدايدى. قازىرگى ۋاقىتتا كاسىپورىن تاۋلىگىنە 6000 جۇپ كروسسوۆكا شىعارادى. جىل سوڭىنا دەيىن كاسىپورىنن بۇل كورسەتكىشتى ەكى ەسەگە ارتتىرۋدى جوسپارلاپ وتىر.
كومپانيانىڭ قىتايلىق بولىمشەسى Nike كروسسوۆكالارىن شىعارۋ ءۇشىن ورتالىق ازيادا نەلىكتەن وزبەكستاندى تاڭداعانىن ايتتى:
نارىقتى زەرتتەي كەلە، وزبەكستانعا حالىقارالىق برەندتەردى تارتۋدى ءجون كوردىك. ءبىز قىتايداعى Nike فيليالىنا حابارلاستىق. ولار ءوز تالاپتارىن قويدى. وسىدان كەيىن "ۋزچارمسانوات" قاۋىمداستىعىمەن بىرلەسە وتىرىپ، تالاپتاردى جۇزەگە اسىرۋعا كىرىستىك.. قازىر تاۋلىگىنە 6000 جۇپ شىعارامىز. الداعى ۋاقىتتا جىلدىق قۋاتتىلىقتى 3 ميلليونعا جەتكىزۋدى جوسپارلاپ وتىرمىز. وسىعان بايلانىستى برەند تالاپتارىنا سايكەس وندىرىستىك پروتسەستەردى جاقسارتۋ بويىنشا جۇمىس ۇيلەستىرۋدە" - دەدى Sino International باسشىسى حۋنسيۋان.Uzdaily.uz وزبەك پورتالى جازعانداي، IE Sino International كومپانياسى شىعارعان ونىمدەر وزبەكستان، قازاقستان، تۇركىمەنستان جانە تاجىكستان نارىقتارىنا جەتكىزىلىپ جاتىر. كەلەسى جىلدان باستاپ ايگىلى قىزىل جاشىكتەر پاكىستانعا جونەلتىلەدى. Sino International Adidas برەندىمەن ءونىم شىعارۋدى مەڭگەرۋدى ماقسات ەتىپ وتىر. بۇل باعىتتاعى جۇمىستاردىڭ باستالىپ كەتكەنى ايتىلادى.
"ادىرنا" ۇلتتىق پورتالى
ۇقساس جاڭالىقتار
