قازاقستاننىڭ بەينەلەۋ ونەرى سالاسىندا كەيىنگى 40 جىلدا بولماعان وزگەشە كورمە اشىلدى. دالىرەك ايتساق، مەگاپوليستەگى ءابىلحان قاستەەۆ اتىنداعى قر مەملەكەتتىك ونەر مۋزەيىندە مەديتسينا قىزمەتكەرلەرىنە ارنالعان «وزگەنىڭ جانى ءۇشىن جانىم پيدا» اتتى رەسپۋبليكالىق كورمە شىمىلدىعىن ءتۇردى.
ەلدىك دەڭگەيدەگى اتالمىش كورمەنى الماتى قالاسى اكىمدىگىنىڭ قولداۋىمەن «يابلونەۆايا پاليترا» كاسىبي سۋرەتشىلەر قوعامى ۇيىمداستىرعان. وزگەشە كورمەگە الماتى، استانا، قاراعاندى، اقتوبە، ورال، تاراز، شىمكەنت ءوڭىرى مەن الماتى وبلىسىنان قاتىسقان 40-تان استام سۋرەتشىنىڭ تۋىندىلارى قويىلعان. كورمە ەكسپوزيتسياسىنا 50-گە جۋىق كەسكىندەمە، گرافيكا، ءمۇسىن، قولدانبالى ونەر تۋىندىلارى ۇسىنىلعان.
كورمە مەديتسينا سالاسىنداعى ەلگە تانىمال دارىگەرلەردىڭ بەينەسى مەن ولاردىڭ باعا جەتپەس ەڭبەگىن، جالپى اق حالاتتى ابزال جانداردىڭ نەگىزگى قىزمەتىن كورسەتۋ ماقساتىندا ۇيىمداستىرىلعان. قىلقالام شەبەرلەرى تۋىندىلارىندا ادام ءومىرى ءۇشىن كۇرەستەگى جانكەشتى ەڭبەكتى، ءۇمىت، سەنىم جانە قۋانىشتى بەينەلەگەن.
– كورمەنىڭ ەرەكشەلىگى – ەلىمىزدىڭ ءار وڭىرىنەن قاتىسقان سۋرەتشىلەردىڭ 2020 جىلى الەمدە بولعان «سOVID-19» پاندەمياسى كەزىندە، سونداي-اق مەديتسينانىڭ ءاربىر سالاسىنىڭ ماماندارىنىڭ ءومىر مەن ءولىم اراسىنا اراشا ءتۇسىپ، ءوز جانىن پيدا ەتكەن جانە ايانباي تابان تىرەسە كۇرەسكەن ەڭبەكتەرى ءارتۇرلى جانردا كورىنىس تابۋى. سۋرەتشىلەر تاقىرىپقا بايلانىستى ءوز كرەاتيۆتى وي-تۇجىرىمدارىن مەيلىنشە ايقىنداپ، اۆتورلىق ستيل مەن تاقىرىپتىق، كومپوزيتسيالىق كونتسەپتۋالدى شەشىمدەرىن رەاليستىك، ابستراكتسيالىق، اۆانگاردتىق، مينيماليزمدىك، كونتسەپتۋالدىق مانەردەگى كوركەمدىك يدەيالارىن كەڭىنەن تانىتا بىلگەن, – دەيدى ءا.قاستەەۆ اتىنداعى مۋزەيدىڭ «پەداگوگيكا جانە جوبالاۋ قىزمەتى» ءبولىمىنىڭ باسشىسى ءارى كورمە جەتەكشىسى گۇلنار جۇبانيازوۆا.
اق حالاتتى ابزال جانداردىڭ جانكەشتى ەڭبەگىن قىلقالام شەبەرلەرىنىڭ كوزىمەن كورگىڭىز كەلسە، «وزگەنىڭ جانى ءۇشىن جانىم پيدا» كورمەسىنە كەلىڭىز. ەكسپوزيتسيا تامىز ايىنىڭ 7-نە دەيىن جالعاسادى.
اقپارات، فوتو: http/almaty-akshamy.kz
