بەلا گۋتتمانن دەگەنىمىز — اۋسترو-ماجار فۋتبولشىسى، فۋتبول جاتتىقتىرۋشىسى. 1981 جىلى 81 جاسىندا قايتىس بولىپ، ۆەناعا جەرلەندى. ول فۋتبولشىلىقپەن ەمەس، باپكەرلىكپەن كوبىرەك تابىسقا جەتتى، اسىرەسە 1961, 1962 جىلدارى ول باپتاعان پورتۋگاليالىق «بەنفيكا» ەكى رەت ۋەفا چەمپيوندار كۋبوگىن ۇتىپ الدى. 1962 جىلى فينالدا ءمادريدتىڭ «رەالىن» 5:3 ەسەبىمەن جەڭىپ، قاتارىنان ەكىنشى رەت ەۋروپادا توپ جارادى. وسى فينالدان سوڭ باپكەر گۋتتمانن كلۋب باسشىلىعىنا ارنايى جولىعىپ، جالاقىسىن كوتەۋرۋدى سۇرايدى. بىراق كلۋب باسشىلىعى ارتىق شىعىن شىعارعىسى كەلمەي، ونىڭ تالابىن ورىندامايدى. ونسىز دا گۋتتماننىڭ ايلىعى از ەمەس-ءتى، ونىڭ ۇستىنە ەۋروكۋبوكتاردان الاتىن بونۋسى جانە بار. اقىر سوڭى اشۋلانعان باپكەر قىزمەتتى بۇدان ءارى اتقارمايتىنىن ايتىپ، كابينەتتەن جۇلقىنىپ شىعىپ كەتەدى. قۇر كەتپەيدى، — «بەنفيكا» مەنسىز 100 جىل بويى ەۋروكۋبوكتەردىڭ بىرەۋىن دە ۇتىپ الا الماسىن! — دەپ قارعاپ كەتەدى.< ءا دەگەندە ونىڭ بۇل «قارعىسىنا» ەشكىم ءمان بەرمەيدى. بىراق كەلەسى جىلى-اق كلۋب چەمپيوندار كۋبوگىنىڭ فينالىندا «ميلاننان» 1:2 ەسەبىمەن ۇتىلىپ قالادى. ارادا جانە ەكى جىل وتكەن سوڭ فينالدا تاعى ءبىر ميلاندىق كلۋب — «ينتەردەن» جەڭىلەدى (0:1). 1965-66 جىلعى ماۋسىمدا كلۋبقا قايتا كەلگەن گۋتتمانن «بەنفيكانى» ءبىر جىل عانا باسقارىپ، قايتادان باسقا كلۋبقا اۋىسىپ كەتەدى. 1968 جىلى «بەنفيكا» تاعى دا چەمپيوندار كۋبوگىنىڭ فينالىنا شىعىپ، بۇل جولى «مانچەستەر يۋنايتەدكە» توتەپ بەرە المايدى — 1:4.< كوماندا كەيىن دە 1983 جىلى ۋەفا كۋبوگىنىڭ، 1988 جىلى چەمپيوندار كۋبوگىنىڭ فينالىندا جەڭىلىسكە ۇشىرايدى. 1990 جىلى كوماندا تاعى دا فينالعا شىعادى. بۇل جولعى فينال ۆەنادا «ميلانعا» قارسى وتەدى. كوماندانىڭ باپكەرى ەيسەبيو ويىننان الدىن ۆەناعا جەرلەنگەن باياعى قارعىسشىل گۋتماننىڭ قابىرىنە بارىپ، كەشىرىم سۇرايدى. الايدا، ونىسى كومەكتەسپەيدى: «بەنفيكا» تاعى دا ۇتىلادى.< ودان بەرى دە كوپ جىل وتەدى. «بەنفيكا» 2013 جىلى ەۋروپا ليگاسىنىڭ فينالىنا شىعىپ، «چەلسيمەن» كەزدەسەدى. فينالدان الدىن ەيسەبيو تاعى دا ۆەناعا اتتانىپ، گۋتتماننىڭ ارۋاعىنان كەشىرىم سۇرايدى. الايدا، قارعىستىڭ كۇشى ءالى جويىلماعان بولسا كەرەك، كوماندا قانشا تىرىسسا دا «چەلسيدى» ۇتا المايدى. ەسەسىنە، ويىننىڭ ەڭ سوڭعى سەكۋندىندا «چەلسي» قورعاۋشىسى برانيسلاۆ يۆانوۆيچ بۇلاردىڭ قاقپاسىنا جەڭىس دوبىن سوعىپ كەتەدى.< كەلەسى جىلى دا «بەنفيكا» فينالعا شىعىپ، «سەۆيليامەن» وينادى. پورتۋگالدار بەلا گۋتتمانندى قۇرمەتپەن ەسكە الىپ، «دا لۋج» ستاديونىنا ونىڭ ەسكەرتكىشىن تۇرعىزادى. ال، ويىن وتە تارتىستى ءوتىپ، پەنالتيلەر سەرياسىنا دەيىن جالعاسادى. ليسسابوندىق كلۋبتىڭ تاعى دا جولى بولمايدى: كاردوسو مەن رودريگو قاتەلەسىپ، «بەنفيكا» ۇتىلىپ قالادى. وسىلايشا، 1962 جىلدان بەرى بارلىعى سەگىز رەت فينالدا ءسۇرىنىپتى.< بۇل ازداي، «بەنفيكانىڭ» جاستار كومانداسى دا 2014, 2017 جىلدارى ەكى رەت ۋەفا جاسوسپىرىمدەر ليگاسىنىڭ فينالىندا ساتسىزدىككە ۇشىرايدى.< ءدال قازىرگى ۋاقىتتا بۇل جونىندە «بەنفيكا» جانكۇيەرلەرى ەكىگە بولىنگەن، ءبىرى رەاليستەر: قارعىسقا سەنبەيدى، ساتسىزدىكتىڭ بارىنە فۋتبولشىلاردىڭ وزدەرى كىنالى، سوڭىنا دەيىن ايقاسۋعا كۇش-جىگەرلەرى جەتپەيدى دەپ ەسەپتەيدى، ەكىنشىلەرى راسىمەن دە گۋتماننىڭ اقشا ءۇشىن ايتا سالعان اتام زامانعى سوزىنە يمانداي سەنەدى، ولاردىڭ ويىنشا، كلۋب 2062 جىلعا دەيىن ەۋروپادا توپ جارا المايدى.
مىقتىبەك ورازتايۇلى
http://massaget.kz/blogs/24264/
