Aport Mall ساۋدا ورتالىعى مەن وبلىستىق پوليتسيا وكىلدەرى "مينالاندى" دەگەن عيمارات تۋرالى اقپاراتقا قاتىستى پىكىر ءبىلدىردى، - دەپ حابارلايدى "ادىرنا" ءتىلشىسى.
ساۋدا ورتالىعىنىڭ اكىمشىلىگى حالىقتىڭ ەۆاكۋاتسيالانعانىن جانە عيماراتتىڭ بومبالانعانى جايلى اقپاراتتى جوققا شىعاردى.
"بىزدە پوليتسيا جوق، بومبانى ىزدەۋ جۇمىستارى جۇرگىزىلگەن جوق. ادامدار ەۆاكۋاتسيالانبادى. ساۋدا ورتالىعى قالىپتى جۇمىس ىستەپ تۇر", - دەدى "اپورت" ماركەتينگ جانە ساتۋ ءبولىمى باسشىسىنىڭ ورىنباسارى داريعا نۇراشەۆا.
الايدا، الماتى وبلىستىق پوليتسيا دەپارتامەنتىنىڭ ءباسپاسوز قىزمەتى باسقا اقپارات تاراتتى. ايتۋلارىنشا، 2 تامىز كۇنى ساعات 14:50-دە كەزەكشى بولىمشەگە قاراساي اۋدانى اۋماعىندا ورنالاسقان «Aport Mall» ساۋدا ۇيىندە جارىلىس قاۋپى بار ەكەنى تۋرالى اقپارات تۇسكەن.
"اتالعان فاكتى بويىنشا پوليتسەيلەر ساۋدا ورتالىعىنىڭ اۋماعىن قورشاۋعا الىپ، اۋماقتان شىعىپ بارا جاتقان كولىكتەردى تەكسەرۋدە. اتالعان دەرەك قاراساي اۋدانى تجد قر قىلمىستىق كودەكسىنىڭ 273-بابى "قاساقانا لاڭكەستىك اكتىسى تۋرالى جالعان حابار تاراتۋ" بويىنشا تىركەلدى. قازىرگى ۋاقىتتا ماماندار عيماراتتا جارىلعىش زاتتاردىڭ بار-جوعىن تەكسەرۋ جانە ءتىنتۋ بويىنشا ارنايى وپەراتسيا جۇرگىزىپ جاتىر، - دەدى الماتى وبلىسى بويىنشا پد باسشىسى باۋىرجان الەنوۆ.
"ادىرنا" ۇلتتىق پورتالى
ۇقساس جاڭالىقتار
