دومبىرا كۇنىندە ۇلتتىڭ ءۇنىن اسقاقتاتقان «الاتاۋ» ءداستۇرلى ونەر تەاترى اربات بويىمەن كوپتى انگە ەلىتتى، - دەپ حابارلايدى Almaty.tv تىلشىسى.
شامشىدەن باستاپ، حالىق اندەرىن ناسيحاتتاعان ونەرپازدار «قالا جۇرتىنا مەرەكەلىك كوڭىل كۇي تارتۋ ەتكىمىز كەلدى» دەيدى.
– «الاتاۋ» ءداستۇرلى ونەر تەاترى شىن جۇرەكتەن ۇلتتىق دومبىرا كۇنىمەن قۇتتىقتايدى، – دەدى «الاتاۋ» ءداستۇرلى ونەر تەاترىنىڭ ءارتىسى داۋلەت ءارىپوۆ.
كوشە بويىمەن ءان شىرقاپ وتكەن كوشكە قوشەمەت كورسەتكەندەر كوپ بولدى. قالا جۇرتى انگە قوسىلىپ، بي بيلەپ، كورەرمەندى قۇتتىقتاۋدان دا قالىس قالعان جوق.
– ءبىزدىڭ مادەنيەتىمىز، ەلدىڭ ۇلتتىق قۇندىلىعى دارىپتەلىپ جاتقانىنا قۋانىشتىمىن. قازاقتىڭ پاتريوتى رەتىندە «وسىنداي عاجاپ مەرەكەلەر جالعاسىن تابا بەرسىن» دەپ تىلەيمىن. بۇگىن الماتى دا كەرەمەت بولىپ تۇر. بارشاڭىزعا مەرەكە قۇتتى بولسىن!
– تارازدان كەلدىم. بۇگىن ارباتقا قىدىرىپ شىعىپ ەدىك، كەرەمەت كەشكە كۋا بولدىق. ءشامشىنىڭ، قازاقتىڭ اندەرىن تىڭداپ، مارقايىپ تۇرمىن.
كوش دىتتەگەن ورنىنا جەتكەن تۇستا اباي الاڭىندا باسقا مەرەكەلىك ءىس-شارا باستالدى. ەسترادا جۇلدىزدارىنىڭ قاتىسۋىمەن وتكەن كونتسەرتتىڭ دە كورەرمەنى كوپ. ايتىلعان ءان، شەرتىلگەن كۇيدەن بولەك، مۇندا شەبەرلەردى ماراپاتتاۋ، قولونەرشىلەردى قولداۋ دا ۇمىتىلمادى.
– قازاق ەلىن دومبىرا كۇنىمەن قۇتتىقتايمىن. ناعىز قازاق – دومبىرا. سوندىقتان بۇل كۇندى جىل سايىن ۇمىتپاي، جوعارى دەڭگەيدە تويلاپ جاتىرمىز. جىلدا جالعاسا بەرسىن، – دەيدى ءانشى عازيزحان شەكەربەكوۆ.
– قازاقتىڭ ەكىنشى اتى دومبىرا عوي. قازاقتىڭ قانىنا ءسىڭىپ كەتكەن دومبىرا ءۇنى ەشقاشان وشپەۋى كەرەك. ءبىز شىنىندا دا قۋانىشتىمىز، – دەدى ءانشى رايىم ۋايىس.
ۇلتتىق دومبىرا كۇنى كەشە الماتى اۋداندارىنىڭ بارىندە اتاپ ءوتىلدى. دومبىراشىلار فلەشموبىنان باستاپ، قولونەرشىلەر كورمەسىنە دەيىن كوپكە ۇسىنىلعان مەرەكە قازاقستاندا 2018 جىلدان باستاپ ءداستۇرلى اتالىپ كەلەدى.
