شىمكەنتتىك جۋرناليست اسەت ءاسساندي كەشە ءوزىنىڭ فەيسبۋك پاراقشاسىندا جەتىسايداعى سۇمدىق وقيعا تۋرالى پوست جاريالاعان بولاتىن.
"اپالى-ءسىڭلىلى: 2003 جىلعى ساليما، 2005 جىلعى مانشۇك، 2007 جىلعى ميلانا. بۇل قاراكوزدەرىمىزدىڭ كورمەگەن قورلىعى قالماپتى. وگەي انالارى، 1991 جىلعى كوبەەۆا جۇلدىز فاشيستەردەن دە اسىپ تۇسكەن سياقتى. كامەلەت جاسىنا تولماعان قىزداردىڭ تىرناقتارىنىڭ استىنا قايتا-قايتا ينە تىعىپ، جىلايىن دەسە، ۇرىپ-سوعىپ "كۇلىپ تۇر" دەپ، جاندارىنا باتىپ تۇرسا دا، ەزۋلەرىن تارتقىزىپ، توڭازىتقىشقا ءبىرتالاي ۋاقىت وتىرعىزىپ قيناپ، قايشىمەن دەنەلەرىنە جاراقات سالىپ، شايلارىنا گەل قوسىپ بەرىپ ىشكىزىپ، ءتىپتى جىنىستىق مۇشەلەرىن كەمپىراۋىزبەن قىسىپ، جاراقات سالىپ جۇرگەن ەكەن. بۇل قىزداردىڭ كورگەن ازاپتارى ادام ايتقىسىز. ايدىڭ-كۇننىڭ امانىندا وسىنداي جاعدايدى "جابۋلى قازان جابۋلى" ەتىپ قالدىرۋعا ۇمتىلعان جەتىساي اۋدانى باسشىلارىنىڭ، قۇزىرلى مەكەمەلەرىنىڭ نە بالا-شاعالارى، نە جۇرەكتەرى جوق دەپ قالاسىڭ وسىندايدا! بەس كۇننەن بەرى اۋرۋحانادا جاتقان قىزداردىڭ جاعدايىن جەرگىلىكتى جەردىڭ اتقامىنەرلەرى ءتىپتى سۇراماعان دا! ال، كومەك بەرۋ تۋرالى مۇلدەم اڭگىمە جوق! ءيا، ءبىر ادامنىڭ جاۋىزدىعىنا مىڭ ادام جاۋاپسىزدىعىمەن جاۋاپ بەرىپ جۇرگەنىنە ەرىكسىز قايران قالاسىڭ! جەتىسايدان تابىلماعان اراشانى تۇركىستان وبلىسىنىڭ باسشىلارى، زاڭ ورىندارىنان، دەنساۋلىق ساقتاۋ باسقارماسىنان سۇرايمىز! قاراكوزدەرىمىزدى جىلاتۋعا جول بەرمەيىك! جانە الگى وگەي شەشەلەرىن قاتاڭ جازاعا تارتايىق"- دەپ جازادى اسەت ءاسساندي.
بۇل وقيعا قوعامدا ۇلكەن رەزونانس تۋعىزدى. ءىستى تانىمال زاڭگەر ايگۇل ورىنبەك ءوز باقىلاۋىنا الدى. “قىلمىستىق ءىس ءساۋىردىڭ 11 كۇنى انىقتالدى. ۇلكەن قىزى مەكتەپكە بەتى جارالانىپ كەلگەن. ونى بايقاعان مۇعالىم مەكتەپ ديرەكتورىنا ايتقان. ديرەكتور قىزدىڭ سول مەكتەپتە وقيتىن سىڭىلىلەرىن دە تەكسەرتەدى. كىشكەنتاي قىزداردىڭ دەنەسىنىڭ كوگەرگەندىگى انىقتالعان سوڭ، مەكتەپ ديرەكتورى بىردەن ءبىلىم ءبولىمى باسشىلىعىنا حابار جەتكىزەدى. ال ولار تيىسىنشە پروكۋراتۋرا مەن پوليتسيا قىزمەتكەرلەرىنە اقپارات بەرىپ، موبيلدىك توپ قۇرادى. قىزداردى اتا-انالارىنان وقشاۋلاۋدى ۇيىمداستىردى”-دەدى زاڭگەر ايگۇل ورىنبەك.
ايگۇلدىڭ ايتۋىنشا، اۋداندا قۇزىرلى ورگاندار مەن پسيحولوگتاردان قۇرالعان ءموبيلدى توپ قۇرىلىپ، قىزدارمەن جۇمىس ىستەپ جاتىر. وگەي انا قاماۋعا الىنىپ، قىلمىستىق ءىس قوزعالعان.
تۇركىستان وبلىسىنىڭ پوليتسيا دەپارتامەنتى رەسمي تۇردە جاۋاپ بەردى. "الەۋمەتتىك جەلى ارقىلى كەڭىنەن تارالىپ، جەتىساي اۋدانىنداعى ءبىر وتباسىندا ورىن العان وگەي اناسىنىڭ قاتىگەزدىكپەن بالالارىن ۇرىپ-سوعىپ، دەنە جاراقاتتارىن سالۋ ارقىلى زورلىق كورسەتكەن جايتى قۇزىرلى ورگاندارمەن انىقتالعان. بۇل جايت جەتىساي اپب-دە تىركەلدى. قر قك 140-بابىنا سايكەس سوتقا دەيىنگى تەرگەۋ امالدارى جۇرگىزىلۋدە. كۇدىكتىگە شەكتەۋ شاراسى قولدانىلادى. كوميسسيا شەشىمىمەن بالالار اجەسىنە تاپسىرىلعان. بۇل جايت قازاقستان رەسپۋبليكاسى ىشكى ىستەر ءمينيسترىنىڭ جانە وبلىس پروكۋرورىنىڭ باقىلاۋىندا".
"ادىرنا" ۇلتتىق پورتالى
