Shymkenttik jýrnalıst Áset Ássándı keshe óziniń Feısbýk paraqshasynda Jetisaıdaǵy sumdyq oqıǵa týraly post jarııalaǵan bolatyn.
"Apaly-sińlili: 2003 jylǵy Salıma, 2005 jylǵy Mánshúk, 2007 jylǵy Mılana. Bul qarakózderimizdiń kórmegen qorlyǵy qalmapty. Ógeı analary, 1991 jylǵy Kóbeeva Juldyz fashısterden de asyp túsken sııaqty. Kámelet jasyna tolmaǵan qyzdardyń tyrnaqtarynyń astyna qaıta-qaıta ıne tyǵyp, jylaıyn dese, uryp-soǵyp "kúlip tur" dep, jandaryna batyp tursa da, ezýlerin tartqyzyp, tońazytqyshqa birtalaı ýaqyt otyrǵyzyp qınap, qaıshymen denelerine jaraqat salyp, shaılaryna gel qosyp berip ishkizip, tipti jynystyq múshelerin kempiraýyzben qysyp, jaraqat salyp júrgen eken. Bul qyzdardyń kórgen azaptary adam aıtqysyz. Aıdyń-kúnniń amanynda osyndaı jaǵdaıdy "jabýly qazan jabýly" etip qaldyrýǵa umtylǵan Jetisaı Aýdany basshylarynyń, quzyrly mekemeleriniń ne bala-shaǵalary, ne júrekteri joq dep qalasyń osyndaıda! Bes kúnnen beri aýrýhanada jatqan qyzdardyń jaǵdaıyn jergilikti jerdiń atqaminerleri tipti suramaǵan da! Al, kómek berý týraly múldem áńgime joq! Iá, bir adamnyń jaýyzdyǵyna myń adam jaýapsyzdyǵymen jaýap berip júrgenine eriksiz qaıran qalasyń! Jetisaıdan tabylmaǵan arashany Túrkistan Oblysynyń basshylary, zań oryndarynan, densaýlyq saqtaý basqarmasynan suraımyz! Qarakózderimizdi jylatýǵa jol bermeıik! Jáne álgi ógeı sheshelerin qatań jazaǵa tartaıyq"- dep jazady Áset Ássandı.
Bul oqıǵa qoǵamda úlken rezonans týǵyzdy. Isti tanymal zańger Aıgúl Orynbek óz baqylaýyna aldy. “Qylmystyq is sáýirdiń 11 kúni anyqtaldy. Úlken qyzy mektepke beti jaralanyp kelgen. Ony baıqaǵan muǵalim mektep dırektoryna aıtqan. Dırektor qyzdyń sol mektepte oqıtyn sińililerin de teksertedi. Kishkentaı qyzdardyń denesiniń kógergendigi anyqtalǵan soń, mektep dırektory birden bilim bólimi basshylyǵyna habar jetkizedi. Al olar tıisinshe prokýratýra men polıııa qyzmetkerlerine aqparat berip, mobıldik top qurady. Qyzdardy ata-analarynan oqshaýlaýdy uıymdastyrdy”-dedi zańger Aıgúl Orynbek.
Aıgúldiń aıtýynsha, aýdanda quzyrly organdar men psıhologtardan quralǵan mobıldi top qurylyp, qyzdarmen jumys istep jatyr. Ógeı ana qamaýǵa alynyp, qylmystyq is qozǵalǵan.
Túrkistan Oblysynyń Polıııa Departamenti resmı túrde jaýap berdi. "Áleýmettik jeli arqyly keńinen taralyp, Jetisaı aýdanyndaǵy bir otbasynda oryn alǵan ógeı anasynyń qatygezdikpen balalaryn uryp-soǵyp, dene jaraqattaryn salý arqyly zorlyq kórsetken jaıty quzyrly organdarmen anyqtalǵan. Bul jaıt Jetisaı APB-de tirkeldi. QR QK 140-babyna sáıkes sotqa deıingi tergeý amaldary júrgizilýde. Kúdiktige shekteý sharasy qoldanylady. Komıssııa sheshimimen balalar ájesine tapsyrylǵan. Bul jaıt Qazaqstan Respýblıkasy Ishki ister Mınıstriniń jáne oblys prokýrorynyń baqylaýynda".
"Adyrna" ulttyq portaly
