ماڭعىستاۋ وبلىسىندا جالپى ءبىلىم بەرەتىن مەكتەپتەرىنىڭ بىرىندە 76 ملن تەڭگەدەن استام بيۋدجەت قاراجاتى جىمقىرىلعان. بۇل تۋرالى وبلىستىق پروكۋراتۋرانىڭ ءباسپاسوز قىزمەتى مالىمدەدى، دەپ حابارلايدى “ادىرنا”.
شتاتتىق كەستە مەن بانكتىك شوتتاردى سالىستىرۋ بارىسىندا 3 جىل بويى وزىنە ارتىق سومانى ەسەپتەگەن مەكتەپتىڭ باس بۋحگالتەرىنىڭ ءتيىستى جانە ءىس-جۇزىندە تولەنگەن جالاقىسىنىڭ اراسىنداعى ايىرماشىلىق انىقتالدى، - دەلىنگەن پروكۋراتۋرانىڭ حابارلاماسىندا.
اتالعان فاكتى بويىنشا پروكۋرورلارمەن قىلمىستىق ءىس قوزعالىپ، تەرگەۋ ەكونوميكالىق تەرگەۋ دەپارتامەنتىنە تاپسىرىلدى.
تەرگەۋ بارىسىندا اتالعان مەكتەپتىڭ ەسەپشىسى كىناسىن تولىقتاي مويىندادى.
سونداي-اق، سوت ۇكىمىمەن كىنالى ادام قازاقستان رەسپۋبليكاسى قىلمىستىق كودەكسىنىڭ 189-بابىنىڭ 4-بولىگى (سەنىپ تاپسىرىلعان مۇلىكتى يەمدەنۋ جانە ىسىراپ ەتۋ) بويىنشا 5 جىل مەرزىمگە ماتەريالدىق-جاۋاپتى لاۋازىمداردى اتقارۋ قۇقىعىنان ايىرىلا وتىرىپ، 7 جىلعا باس بوستاندىعىنان ايىرىلدى.
سوت ۇكىمى زاڭدى كۇشىنە ەنگەن جوق.
