تۇركىستان وبلىسىندا «اۋىل اماناتى» جوباسىن جۇزەگە اسىرۋعا رەسپۋبليكالىق بيۋدجەتتەن 19,8 ملرد. تەڭگە قارجى ءبولىندى. بۇگىنگى تاڭدا ماقۇلدانعان جوبالار كورسەتكىشى بويىنشا تۇركىستان وبلىسى ەلىمىزدە كوش باستاپ تۇر. بىراق ءالى دە ماسەلەلەر كوپ. جۇمىستى شيراتىپ، اۋىل تۇرعىندارىن كاسىپكەرلىككە تارتۋ كەرەك. بۇل تۇيتكىل بويىنشا ارنايى ءماجىلىس وتكىزىلدى. جيىندا تۇركىستان وبلىسىنىڭ اكىمى دارحان ساتىبالدى جاۋاپتىلارعا جۇمىستى جانداندىرۋدى تاپسىردى. جوبانى جۇزەگە اسىرۋدا كەمشىلىككە بوي الدىرعان اكىمدەر مەن مەكەمە باسشىلارىن سىنعا الىپ، ەسەپتەرىن تىڭدادى.
– «اۋىل اماناتى» بويىنشا جوبالاردى قارجىلاندىرۋ كورسەتكىشى تومەن. ۋاقىت ءوتىپ جاتىر. جوسپارعا ەنگىزىلگەن بارلىق اۋىلداردا جوبالار تولىق جۇزەگە اسىپ، ەلدىڭ تابىسى ارتۋى ءتيىس. جاۋاپتى باسقارما باسشىلارى، سىزدەر اۋىل شارۋاشىلىعىنداعى پروبلەمالاردى انىقتاپ، شەشۋ جولدارىن ۇسىنىڭىزدار. تۇرعىندارعا يدەيالار بەرىپ، جوبانى جۇزەگە اسىرۋعا، ءوز كاسىپتەرىن باستاۋعا كومەكتەسىڭىزدەر. بەلسەندى تۇرعىندار وزدەرى ىزدەنىپ، نەسيەسىن الادى. بىراق تۇرعىنداردىڭ ءبارى ونداي بەلسەندى ەمەس. ولارعا ءتۇسىندىرۋ جۇمىستارىن جۇرگىزىپ، كەڭەس بەرگەن ءجون. اۋدان، قالا اكىمدەرى، بىلاي وتىرا بەرۋگە بولمايدى. ىزدەنىڭىزدەر، «اۋىل اماناتى» جوباسىن جانداندىرۋ كەرەك. قارجىلاندىرۋعا جاۋاپتى «ىرىس» قارجى ۇيىمى مەن الەۋمەتتىك-كاسىپكەرلىك كورپوراتسيا باسشىلارى دا جۇمىستى شيراتسىن. از عانا جوبانى يگەرە الماي وتىرسىزدار. شارۋالاردىڭ، تۇرعىنداردىڭ جوبالارى جىلدام قارجىلاندىرىلسىن، – دەدى دارحان ساتىبالدى.
ماجىلىستە تۇركىستان وبلىستىق اۋىل شارۋاشىلىعى باسقارماسىنىڭ باسشىسى تۇرعانبەك وسپانوۆ پەن وبلىستىق كاسىپكەرلىك جانە ونەركاسىپ باسقارماسىنىڭ باسشىسى نۇرجىگىت مىرزاحمەتوۆتىڭ ەسەپتەرى تىڭدالدى.
جوبا ارقىلى 3220 تۇرعىنعا نەسيە بەرىپ، 3413 جاڭا جۇمىس ورنىن اشۋ كوزدەلگەن. جۇمىستار ناتيجەسىندە ورتاشا ايلىق كىرىس 1,5 ەسەگە، ءسۇت ءونىمىن ءوندىرۋ 40,6 پايىزعا، ەت ءوندىرۋ 63,2 پايىزعا، جىلىجاي ءونىمى 26,2 پايىزعا، قۇس ەتى 2,4 پايىزعا، بالىق ءونىمى 2 پايىزعا ۇلعايادى دەپ جوسپارلانعان. بۇگىنگى تاڭدا تۇركىستان وبلىسىندا 3,6 مدرد. تەڭگەنىڭ جوبالارى ماقۇلدانعان.
باستاپقىدا بەكىتىلگەن قۇجاتتاردىڭ تىزبەسى 16 بولىپ بەكىتىلگەن. جوبا اياسىندا قاعازباستىلىقتى جويۋ ماقساتىندا قاجەتتى قۇجاتتار ءتىزىمى جۇمىسشى توپپەن قايتا قارالىپ، قۇجاتتار سانى 8-گە دەيىن قىسقارتىلدى. بۇل اۋىل تۇرعىندارىنا قولايلى.
«اۋىل اماناتى» جوباسى بويىنشا وبلىستىق كاسىپكەرلىك جانە ونەركاسىپ باسقارماسى تاراپىنان 50 بيزنەس جوسپار ازىرلەنىپ، تۇرعىندارعا ۇسىنىلعان. اۋىلدا كاسىپكەرلىكتى دامىتۋ، ءوندىرىس ورىندارىن اشۋ باعىتىندا دا جۇمىستار جالعاسادى. جوسپاردى ورىنداماعان جانە تومەن ناتيجە كورسەتكەن باسشىلارعا شارا كورىلەدى.
