قازاقستاندا اكتيۆتەردى قايتارۋ جونىندەگى كوميتەت قۇرىلماق، دەپ حابارلايدى "ادىرنا" ۇلتتىق پورتالى.
بۇل جايلى قازاقستان پرەزيدەنتى جارلىعىنىڭ جوباسىندا ايتىلادى. وندا:
"قازاقستان رەسپۋبليكاسى باس پروكۋراتۋراسىندا اكتيۆتەردى قايتارۋ كوميتەتى (بۇدان ءارى – كوميتەت) رەسپۋبليكالىق مەملەكەتتىك مەكەمەسى قۇرىلسىن", – دەپ جازىلعان.
ەستەرىڭىزگە سالا كەتەيىك، 12 شىلدەدە قازاقستاندا "زاڭسىز ساتىپ الىنعان اكتيۆتەردى مەملەكەتكە قايتارۋ تۋرالى" زاڭ جانە قولدانىستاعى نورماتيۆتىك-قۇقىقتىق اكتىلەرگە وزگەرىستەر مەن تولىقتىرۋلار ەنگىزۋ تۋرالى زاڭ قابىلداندى.
قۇجاتتارعا سايكەس، باس پروكۋراتۋرانىڭ جانىنان قۇرىلاتىن جاڭا كوميتەتتە 115-كە جۋىق قىزمەتكەر ەڭبەك ەتپەك.
"قازاقستان رەسپۋبليكاسىنىڭ ۇكىمەتى، قازاقستان رەسپۋبليكاسىنىڭ كونستيتۋتسيالىق سوتى، قازاقستان رەسپۋبليكاسىنىڭ جوعارعى سوتى، قازاقستان رەسپۋبليكاسىنىڭ پرەزيدەنتىنە تىكەلەي باعىناتىن جانە ەسەپ بەرەتىن مەملەكەتتىك ورگاندار، سونداي - اق ورتالىق جانە جەرگىلىكتى اتقارۋشى ورگاندار بەلگىلەنگەن تارتىپپەن وزدەرى قابىلداعان نورماتيۆتىك قۇقىقتىق اكتىلەردى زاڭعا جانە وسى جارلىققا سايكەس قايتا قاراۋ جانە كەلتىرۋ جونىندە شارالار قابىلداسىن", - دەلىنگەن جوبادا.
قۇجات ۇلگىسى 21 شىلدەدە جاريالاندى، ەندى قوعامدىق تالقىلاۋ 4 تامىزعا دەيىن جالعاسادى.
"ادىرنا" ۇلتتىق پورتالى
