ءپۋتيننىڭ پولشا جەرىنە قاتىستى پىكىر ءبىلدىرىپ، كەزىندەگى ستاليننەن قالعان سىيلىق ەكەندىگىن حابارلاعان مالىمدەمەسىنەن كەيىن داۋ تۋدى. ء"ستاليننىڭ سىيى تۋرالى" ايتقان سوزىنە بايلانىستى رەسەي ەلشىسى پولشا سىرتقى ىستەر مينيسترلىگىنە شاقىرىلاتىن بولدى، دەپ حابارلايدى "ادىرنا" ۇلتتىق پورتالى.
بۇل تۋرالى پولشا پرەمەر-ءمينيسترى ماتەۋش موراۆەتسكي تۆيتتەردە حابارلادى.
ءبىر كۇن بۇرىن رەسەي پرەزيدەنتى ۆلاديمير پۋتين قاۋىپسىزدىك كەڭەسىندە ءسوز سويلەپ، پولشا كسرو مەن يوسيف ءستاليننىڭ ۇستانىمىنىڭ ارقاسىندا "باتىستىڭ اۋقىمدى جەرىن، گەرمانيا جەرلەرىن الدى" دەپ مالىمدەدى. ياعني، پۋتين بۇل اۋماقتاردىڭ ء"ستاليننىڭ پولياكتارعا بەرگەن سىيى" ەكەنىن ايتتى.
وسىدان كەيىن موراۆەتسكي ءستاليندى ء"جۇز مىڭداعان پولياكتاردىڭ ولىمىنە كىنالى اسكەري قىلمىسكەر"دەپ اتادى.
"تاريحي شىندىق - كۇمانسىز. رەسەي فەدەراتسياسىنىڭ ەلشىسى ءسىم-گە شاقىرىلادى", - دەپ جازدى پولياك پرەمەر-ءمينيسترى.
ورايى كەلگەندە ايتقا كەتەيىك، "الەمگە سىي-cىياپات" ۇلەستىرگىش رەسەي بيلىگى قازاقستان ايماعىن دا ءبىر كەزدەگى وزدەرىنىڭ سىيلىعى ەكەندىگىن ايتقان.
«قازاقستاننىڭ جەرى – بۇل رەسەي تاراپىنان جاسالعان سىيلىق»، - دەيدى رەسەي مەملەكەتتىك دۋماسىنىڭ دەپۋتاتى ۆياچەسلاۆ نيكونوۆ. نيكونوۆ بۇل سوزدەرىن رەسەيلىك «ءبىرىنشى ارنادا» وتكەن «ۇلكەن ويىن» باعدارلاماسىندا ايتتى.
«قازاقستان دەگەن جەر مۇلدە بولماعان. قازىرگى سولتۇستىك ايماعىندا ادام تۇرماعان. حالىقتىڭ باسىم بولىگى وڭتۇستىك جاقتاردا عانا بولعان. قازاقستاننىڭ قازىرگى جەرى كەڭەس وداعى مەن رەسەيدىڭ جاساعان سىيلىعى»،-دەدى ۆ. نيكونوۆ. سونىمەن قاتار ول رەسەي بارلىق ەلدى جاۋلاپ العان دەگەنمەن كەلىسپەيتىنىن ءبىلدىردى.
"ادىرنا" ۇلتتىق پورتالى
