ماڭعىستاۋ وبلىسىندا اۋاعا گاز تاراعانى حابارلاندى. اۋاعا تاراعان گاز «قازازوت» اق كاسىپورنىنان شىققان. كاسىپورىن قۇلىباەۆ باسقارعان كەزدە دە ەكولوگياعا زور نۇقسان كەلتىرگەنى ءۇشىن ايىپپۇل تولەگەن ەدى، دەپ حابارلايدى "ادىرنا" ۇلتتىق پورتالى وبلىستىق ەكولوگيا دەپارتامەنتىنە سىلتەمە جاساپ.
21 شىلدە، 19:11 شاماسىندا ماڭعىستاۋ وبلىسى بويىنشا ەكولوگيا دەپارتامەنتىنە «قازازوت» اق-دان شۇعىل حابار تۇسكەن. حابار بويىنشا كاسىپورىننان اۋاعا گاز تاراعان.
كاسىپورىن № 4 اگرەگاتتى ىسكە قوسۋ پروتسەسىندە كەي قۇرىلعىلاردىڭ كەپتەلىپ قالعانىن جانە باعانعا تۇزسىزداندىرىلعان سۋدىڭ شەكتەۋلى بەرىلۋىنىڭ سالدارىنان عتر قىزمەتىنىڭ بۇزىلعانى مالىمدەگەن. مۇنىڭ سالدارىنان 5 مينۋت بويى اتموسفەراعا نيتروزدى گاز بولىنگەن.
ماڭعىستاۋ وبلىسى بويىنشا ەكولوگيا دەپارتامەنتى «قازازوت» اق-عا جوسپاردان تىس تەكسەرۋ جۇرگىزىپ، زاڭدا بەلگىلەنگەن ءتارتىپ بويىنشا قاجەتتى شارالار قابىلداعان.
«اتقارىلعان جۇمىستىڭ ناتيجەسى قوسىمشا حابارلانادى» دەپ مالىمدەدى دەپارتامەنت.
ەستەرىڭىزگە سالا كەتەيىك، 2020 جىلى اقتاۋدا اممياك سەليتراسىن وندىرەتىن «قازازوت» كاسىپورنى قورشاعان ورتانى لاستاعانى ءۇشىن 139 ملن تەڭگە ايىپپۇل تولەگەن ەدى. ەكولوگتار كەيبىر قوندىرعىلاردان اۋانى لاستاۋشى زاتتاردىڭ شامادان تىس كوپ شىققانىن 4 جىل بۇرىن انىقتاعان. الايدا، كومپانيا باسشىلىعى تەكسەرۋ قورىتىندىسىمەن كەلىسپەي سوتقا جۇگىنگەن. سوت شەشىمى شىعىپ، كاسىپورىن ءتيىستى ايىپپۇلدى تولەگەن بولاتىن.
2022 جىلى تيمۋر قۇلىباەۆتىڭ قاراماعىندا بولعان «قازازوت» كومپانياسى ءوز اكتسيالارىن ساتتى.
«قازازوت» — اممياك پەن اممياك سەليتراسىن ءوندىرۋشى ءارى ەكسپورتتاۋشى. كاسىپورىن ماڭعىستاۋ وبلىسىندا ورنالاسقان.
"ادىرنا" ۇلتتىق پورتالى
