سوناۋ ستۋدەنت شاعىمىز ەدى. ءبىر كۇنى سەمەي جاقتان جانارتاۋ اتقىلادى. بۇرىن دا الدەنەشە رەت سىرتقا لىقسىپ، تىنىم تاپپاي جۇرگەن بولۋى مۇمكىن. بىراق بۇل جولعى اتقىلاۋى جويقىن-دى. جاس جانارتاۋ. جىردىڭ جانارتاۋى. تىنشي بەرمەيتىن جانارتاۋ. ادەتتە جانارتاۋ تۇگىلى جىردىڭ جاڭبىرى سىركىرەسە، ەلەڭ ەتەتىن كەزىمىز. التى قىردان الپىس قۇلان قايىرىپ، الماتىنى شۋلاتىپ جۇرەتىن ارقالى اقىنداردىڭ اراسىندا جوق ەدى ول. ءوزىنىڭ ءوسىپ-ونگەن ولكەسىندە ولەڭ ءورىپ ءومىر كەشىپ جاتقان كورىنەدى. سودان الاتاۋدىڭ ەتەگىن جايلاعان ەلۋ باقسى، سەكسەن شايىردىڭ ءبىر قۇلاعى سەمەيگە قاراي ۇنەمى ءتۇرۋلى بولدى.
سونداعى تىنىشتىقبەك اقىننىڭ سوزبەن سالعان سۋرەتى مىناۋ ەدى:
نە دەپ ساعان جازايىن،.. قوي قوزداعان،
تاۋ موڭىرەپ، اسپاندا اي بوزداعان.
جۇلدىزدار دا تۇرتكىلەپ تۇيسىگىمدى،..
تۇسىنىكسىز ءدىرىل بار بويدا ازداعان.
نە دەپ ساعان جازايىن،.. توبەت ۇرگەن…
ساندىراقتاپ ءتۇز جاتىر كونە تىلدە.
اش بايعىزدار پالەكەت شاقىرادى،
وسى تۇندە قىرىلىپ ولەتىندەي.
نە دەپ ساعان جازايىن،.. كوك وسپەگەن.
ءومىر ءسۇرىپ جاتىرمىز ەلەسپەنەن.
ءتىرى تىشقان كورمەگەن تارعىل مىسىق
داڭعىرلاتىپ وينايدى تەگەشپەنەن.
سۇق ساۋساعى ءار قويىن ساناپ باعار
قويشى قويدى قوراعا قاماتپاعان.
ءتۇن قىلاۋىن قيدالاپ قۇلاعىمەن،
وسقىرىنىپ قويادى تورى ات ماعان...
ول سول ارقىلى پوەزيا پەيزاجىنىڭ جاڭا تۇرپاتىن جادىمىزعا جاتتاتتى. سانامىزعا ءسىڭىردى. ويىمىزعا ورنىقتىردى. ميىمىزعا مىنگىزدى. سول مىنگەننەن مول ءمىندى...
ونىڭ اتى تىنىش بولعانىمەن، زاتى تىنىش ەمەس-ءتى. سەمەيىندە جاي جاتپادى، جىرعاپ جاتتى. قازاق ولەڭىن ىشىنەن دە، سىرتىنان دا تۇرلەندىردى. ادام ايتقىسىز ەكسپەريمەنتتەر جاسادى. جىر اعىنى مەن وي اعىنىنىڭ قوس بۇيداسىن قاتار ۇستادى. جىردىڭ شالقىماسىنان ويدىڭ اڭقىماسىنا دەيىنگى جانكەشتى جولدان ءوتتى. اتامەكەنىن تاستاپ الاتاۋدى قونىس قىلۋعا قىزىققان دا جوق. تۇرپاتى بولەك، تىنىسى ەرەك تىنىشتىقبەك ابدىكاكىمۇلى قارت سەمەيدى سايالاپ، قارت مەرەيدى ايالاپ، قارا ولەڭدى مايالاپ، ماعىنالى عۇمىر كەشىپ كەلەدى. ءبىر كەزدەگى تىنىش بۇلاق، تىنىش قاينار قازىر كەمەرىنەن اسىپ توگىلگەن تىنىش مۇحيتقا اينالدى. قازاق پوەزياسىنىڭ تىنىش تا تىنىق مۇحيتى!
بۇگىن ءبىر مۇحيتتى تەربەتتىك. ءتورت مۇحيتتى تۇگەلدەمەي-اق قويايىق... جەر-الەمدى دە، جىر-الەمدى دە جالت قاراتقان جايدارى جۇپار جەتپىسىڭىز قۇتتى بولسىن، اعا! تولعانا بەرىڭىز، تولعاي بەرىڭىز، تەرەڭدەي بەرىڭىز!
باۋىرجان ومارۇلى
