شىمكەنتتە مارقۇم نۇراي سەرىكبايدىڭ قازاسىنا بايلانىستى قاساقانا كىسى ءولتىردى دەپ ايىپتالعان كۇدىكتىنىڭ تۋىستارى بلوگەر كاميلا ءادىلحان مەن ونىڭ كۇيەۋى ماعجان ايماحان العاش رەت اشىق پىكىر ءبىلدىردى، دەپ حابارلايدى "ادىرنا" ۇلتتىق پورتالى.
ولار ەڭ الدىمەن مارقۇمنىڭ اتا-اناسى مەن جاقىندارىنا كوڭىل ايتىپ، بۇل قايعىنىڭ ەكى تاراپ ءۇشىن دە اسا اۋىر ەكەنىن اتاپ ءوتتى.
«ەڭ الدىمەن نۇرايدىڭ اتا-اناسىنا، تۋعان-تۋىستارىنا شىن جۇرەكتەن كوڭىل ايتامىز. اللا تاعالا جۇرەكتەرىڭىزگە تىنىشتىق بەرسىن. بۇل – كەز كەلگەن اتا-انا ءۇشىن ورنى تولماس قايعى»، – دەلىنگەن بەينەدە.
سونىمەن قاتار ولار كۇدىكتى شەرحان ايماحانمەن تۋىستىق بايلانىستارىن جاسىرماي، ونىڭ ماعجان ايماحاننىڭ اكەسىنىڭ ءىنىسىنىڭ بالاسى ەكەنىن راستادى.
ء«يا، شەرحان – ءبىزدىڭ تۋىسىمىز. بىراق ەشبىر اتا-انا بالاسىنىڭ قاتىگەز، زۇلىم بولۋىن قالامايدى. بۇل جاعداي ءبىز ءۇشىن دە وتە اۋىر. قىزىنان ايىرىلعان اتا-انانىڭ قايعىسىن تولىق تۇسىنەمىز. بۇل – ەكى جاققا دا وڭاي ەمەس»، – دەپ جازدى ولار.
كاميلا ءادىلحان مەن ماعجان ايماحان سوت پروتسەسىنىڭ ءادىل ءوتۋىن قالايتىندارىن اتاپ ءوتتى.
«سوت پەن جازا ماسەلەسىندە ءادىل شەشىم شىققانىن قالايمىز. الايدا قانداي جازا تاعايىندالسا دا، نۇرايدىڭ ورنى تولمايدى. سول سەبەپتى تەك دۇعا ەتەمىز»، – دەلىنگەن پىكىردە.
سونداي-اق ولار بلوگەرلەرمەن تۋىستىق بايلانىس ءىستىڭ ءادىل شەشىلۋىنە اسەر ەتەدى دەگەن الىپقاشپا اڭگىمەلەرگە جاۋاپ بەردى.
«بلوگەرمەن تۋىس بولسا، ءبارى شەشىلىپ كەتەدى دەگەن سوزدەر تاراپ جاتىر. كەرىسىنشە، حالىق الدىندا جۇرگەن ادامدار رەتىندە، بۇل ءىستىڭ ءادىل قارالعانىن قالايمىز. اقتاپ الۋعا نيەتىمىز دە، ويىمىز دا جوق. بۇل – اسا اۋىر، زۇلىمدىقپەن جاسالعان قىلمىس»، – دەپ مالىمدەدى ولار.
