بوزارىق -3 شاعىناۋدانىندا ورنالاسقان سپورت كەشەنى اۋىر اتلەتيكادان وليمپيادالىق رەزەرۆىن دايىندايتىن بالالار مەن جاسوسپىرىمدەردىڭ مامانداندىرىلعان سپورت مەكتەبىنە تيەسىلى. جاڭا نىساننىڭ اشىلۋىنا قالا اكىمى مۇرات ايتەنوۆ، يتاليانىڭ گەنۋيا قالاسىنان كەلگەن قوناقتار مەن باحادىر نارىمبەتوۆ باستاعان قالا ءماسليحاتىنىڭ دەپۋتاتتارى قاتىستى.
جاڭا سپورت عيماراتىندا 10-16 جاس ارالىعىنداعى 1000-عا جۋىق وقۋشى سپورتتىڭ 7 تۇرىنەن جاتتىعا الادى. اشىلعان ساتتەن باستاپ 500-گە جۋىق بالا سپورتپەن اۋىر اتلەتيكا تۇرلەرىنە جازىلىپ ۇلگەرىپتى. بۇل جەردەگى بارلىق زال زامان تالابىنا ساي جابدىقتالعان. عيماراتتىڭ ءبىرىنشى قاباتىندا اۋىر اتلەتيكا زالى، كيىم اۋىستىرۋ بولمەلەرى، جۋىناتىن بولمەلەر، جاتتىقتىرۋشىلار بولمەسى، 16 ورىنعا ارنالعان اسحانا، مەديتسينالىق كابينەتى بار. ال، ەكىنشى قاباتىندا كۇرەس، گرەك-ريم كۇرەسى كىلەمدەرى، دزيۋدو ءتاتاميى، بوكس رينگى سەكىلدى امبەباپ زالدار ورنالاسقان.
اۋىر اتلەتيكادان ازيا چەمپيونى نۇرعيسا ادىلەتۇلى وسىنداي زالدار ەلىمىزدە سيرەك ەكەنىن ايتىپ، قالا اكىمىنە العىسىن جەتكىزدى.
–سپورتشىلارعا بارلىق جاعداي قاراستىرىلعان زالدار ەلىمىزدە وتە سيرەك. شىمكەنت قالاسىنان اۋىر اتلەتيكاعا ارنالعان، زامانۋي سپورت كەشەنى اشىلعانىنا وتە قۋانىشتىمىز. بۇل ەلدى مەكەندە دە ەلىمىزدىڭ تۋىن كوككە كوتەرەر الەم چەمپيوندارى شىعادى دەپ ۇمىتتەنەمىز، - دەدى ازيا چەمپيونى.
