جوعارعى سوت توراعاسى سوت رەفورمالارى تۋرالى ايتىپ بەردى، دەپ حابارلايدى "ادىرنا" ءتىلشىسى.
جوعارعى سوت توراعاسى سوت تورەلىگى اكادەمياسىنىڭ ماگيسترانتتارىنا لەكتسيا وقىدى.
"بارلىق باستامالار ادامدارعا ارنالعان. ءبىزدىڭ ازاماتتارعا، بيزنەسكە جانە ينۆەستورلارعا ءبىزدىڭ رەفورمالارىمىز عانا ماڭىزدى ەمەس، سوت تورەلىگىن جۇزەگە اسىرۋدىڭ جوعارى ساپاسى دا ماڭىزدى",- دەپ اتاپ ءوتتى اسلامبەك مەرعاليەۆ.
ءىس-شاراعا سوت اكىمشىلىگىنىڭ باسشىسى نايل احمەتزاكيروۆ پەن اكادەميا رەكتورى زاۋرەش بايمولدينا دا قاتىستى.
70-تەن استام ماگيسترانت سوت بيلىگىنىڭ مەملەكەت پەن قوعامداعى ءرولى، سوت جۇيەسىنىڭ قالىپتاسۋ كەزەڭدەرى، ساپالى سوت كورپۋسىن قۇرۋ، سونداي-اق جۇرگىزىلىپ جاتقان رەفورمالاردىڭ ءمانى مەن سۋديالار مەن سوتتاردىڭ تاۋەلسىز مارتەبەسىن نىعايتۋدىڭ كەلەشەگى تۋرالى ءدارىس تىڭدادى.
اسلامبەك مەرعاليەۆ مەملەكەت باسشىسى العا قويعان زاڭنىڭ ۇستەمدىگى قاعيداتى ەلىمىزدىڭ پروگرەسسيۆتى ىلگەرىلەۋىنىڭ نەگىزى ەكەنىن ەسكە سالدى.
كاسىبي سوت كورپۋسىن قالىپتاستىرۋدىڭ ماڭىزدىلىعىن تالقىلاي كەلە، لەكتور سوت تورەلىگى اكادەمياسىن بارلىق كادرلىق ماسەلەلەر شەشىلەتىن جوعارى سوت كەڭەسىنىڭ قۇزىرىنا بەرۋ ماسەلەسىنە توقتالدى.
سپيكەر اپەللياتسيانىڭ جاۋاپكەرشىلىگى مەن سۋديالاردىڭ تاۋەلسىزدىگىن كۇشەيتۋگە، ازاماتتاردىڭ ادىلەتتى جانە قولجەتىمدى سوت تورەلىگىنە قۇقىقتارىن ارتتىرۋعا، سۋديالاردىڭ الەۋمەتتىك پاكەتىن جاقسارتۋعا جانە ولاردىڭ جاۋاپكەرشىلىگىن ارتتىرۋعا، سونداي-اق تسيفرلاندىرۋدى دامىتۋعا باعىتتالعان وزگەرىستەرگە قىسقاشا توقتالدى.
ا.مەرعاليەۆ سوت جۇيەسىندەگى قارقىندى وزگەرىستەرگە توقتالىپ، كۇتىلەتىن ناتيجەلەرگە قول جەتكىزۋ ءۇشىن ۋاقىت قاجەت ەكەنىن اتاپ ءوتتى، سونداي-اق سۋديالاردىڭ، ونىڭ ىشىندە ءورشىل دە ادال جاس وكىلدەرىنىڭ ەڭبەگى زور ەكەنىنە سەنىمىن ءبىلدىردى.
ءدارىس سوڭىندا جوعارعى سوت توراعاسى ماگيسترانتتاردىڭ سۇراقتارىنا جاۋاپ بەردى.
