جاڭادان سالىناتىن جايلى مەكتەپتەردە ساپالى ينتەرنەت جانە بىلىكتى مۇعالىمدەر بولۋى كەرەك. بۇل تۋرالى پرەمەر-مينيستر ءاليحان سمايىلوۆ مەملەكەت باسشىسىنىڭ سايلاۋالدى باعدارلاماسىن ىسكە اسىرۋ جونىندەگى رەسپۋبليكالىق شتاب وتىرىسىندا ايتتى، دەپ حابارلايدى “ادىرنا” ۇلتتىق پورتالى.
وقۋ-اعارتۋ ءمينيسترى عاني بەيسەمباەۆ 2020-2022 جىلدارى رەسپۋبليكادا ءتۇرلى قارجىلاندىرۋ كوزدەرى ەسەبىنەن 340 مىڭ وقۋشىعا ارنالعان 626 مەكتەپ پايدالانۋعا بەرىلگەنىن باياندادى. بيىل 130 مىڭ بالاعا ارنالعان تاعى 146 مەكتەپ اشۋ جوسپارلانىپ وتىر، ونىڭ 62-ءسى سىبايلاس جەمقورلاردان تاركىلەنگەن قاراجات ەسەبىنەن سالىنباق.
سونىمەن قاتار مەملەكەت باسشىسىنىڭ تاپسىرماسىن ورىنداۋ ماقساتىندا "جايلى مەكتەپ" ۇلتتىق جوباسىن ىسكە اسىرۋ باستالدى، ونىڭ اياسىندا 2024-2025 جىلدارى 740 مىڭ وقۋشىنى قامتيتىن جاڭا فورماتتاعى 369 مەكتەپ سالىنباق. بۇل وقۋشى سانى تىم كوپ سىنىپتار، اپاتتىق مەكتەپتەر جانە ءۇش اۋىسىممەن وقىتۋ ماسەلەسىن تۇپكىلىكتى شەشۋگە مۇمكىندىك بەرەدى دەپ كۇتىلۋدە.
بۇگىنگى تاڭدا جاڭا وقۋ ورىندارىن جيھازبەن جانە تەحنولوگيالىق جابدىقتارمەن جاراقتاندىرۋ ستاندارتتارى ازىرلەندى، "اتامەكەن" ۇكپ-مەن بىرلەسىپ، وتاندىق تاۋار وندىرۋشىلەردىڭ ۇلتتىق جوباسىنا قاتىسۋ ماسەلەسى پىسىقتالدى، ء"بىلىم بەرۋ وزگەرىستەرىنىڭ 1000 كوشباسشىسى" جوباسى بويىنشا جايلى مەكتەپتەر ديرەكتورلارىنىڭ كورپۋسىن دايىنداۋ جۇرگىزىلۋدە، ولاردى كادرلارمەن ۋاقىتىلى قامتاماسىز ەتۋ ءۇشىن مۇعالىمدەر بازاسىن قالىپتاستىرۋ جالعاسۋدا.
پرەمەر-مينيستر ۇلتتىق جوبانى ىسكە اسىرۋ اياسىندا مەردىگەرلىك ۇيىمدار مەن جەر ۋچاسكەلەرىن انىقتاۋ، سونداي-اق قاجەتتى جوبالاۋ-سمەتالىق قۇجاتتامانى دايىنداۋ جونىندەگى جۇمىستى جەدەلدەتۋ قاجەتتىگىن اتاپ ءوتتى.
"جەر ۋچاسكەلەرىنىڭ دايىندىعى بويىنشا قۇرىلىس جۇمىستارىن دەرەۋ اياقتاۋ قاجەت. بۇل ينفراقۇرىلىم، جولدار جانە اباتتاندىرۋ جۇمىستارىن جۇرگىزۋگە قاتىستى. ءار ءوڭىر بويىنشا ءتيىستى جول كارتالارى دايىن، وسى ماسەلەلەردىڭ بارلىعىن جەدەل شەشۋ قاجەت", – دەدى ءاليحان سمايىلوۆ.
ۇلتتىق جوبانى ىسكە اسىرۋ تۋرالى "سامۇرىق-قازىنا" ۇاق" اق باسشىسى نۇرلان جاقىپوۆ پەن "Samruk-Kazyna Construction" اق باسشىسى ماۋلەن ايمانبەتوۆ بايانداما جاسادى. جايلى مەكتەپتەردى جوبالاۋ جانە ساراپتامادان وتكىزۋ تۋرالى يندۋستريا جانە ينفراقۇرىلىمدىق دامۋ ۆيتسە-ءمينيسترى ازامات بەيىسپەكوۆ، ينتەرنەت-جەلىلەردى جۇرگىزۋ تۋرالى تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين باياندادى.
ءاليحان سمايىلوۆ ساپالى ينتەرنەتسىز جايلى مەكتەپتەر ءوز اتاۋىنا ساي بولمايتىنىن باسا ايتتى.
"تاپسىرۋ كەزىندە جاڭا مەكتەپتەر ساپالى ينتەرنەت بايلانىسىنا قوسىلۋى ءتيىس", – دەدى پرەمەر-مينيستر.
جايلى مەكتەپتەردە ەڭبەك ەتەتىن بىلىكتى مۇعالىمدەردى دايارلاۋ تۋرالى عىلىم جانە جوعارى ءبىلىم ءمينيسترى ساياسات نۇربەك باياندادى. جالپى ونىڭ ايتۋىنشا، الداعى جىلدارى جاقسارتىلعان ستاندارتتار بويىنشا جاڭا فورماتسياداعى 49 مىڭ پەداگوگ دايارلاۋ جوسپارلانىپ وتىر.
ۇكىمەت باسشىسى جاڭا ءبىلىم وردالارى تەك جاراقتاندىرۋ بويىنشا عانا ەمەس، سونداي-اق ءبىلىم ساپاسى بويىنشا دا مىقتى بولۋعا ءتيىس ەكەنىن اتاپ ءوتتى.
"جايلى مەكتەپتەرگە قويىلاتىن تالاپتار مەن ازاماتتاردىڭ ولارعا قاتىستى ءۇمىتى كوپ، سوندىقتان وندا ساپالى كادرلاردى جۇمىسقا الۋ ماسەلەسىنە بارىنشا نازار اۋدارۋ قاجەت. سەبەبى مەكتەپ دەگەنىمىز – جاي عانا عيمارات ەمەس، ەڭ الدىمەن، بالالاردى بىلىمگە جەتەلەيتىن مۇعالىم", – دەدى ءاليحان سمايىلوۆ.
وقۋ-اعارتۋ مينيسترلىگىنە ۇلتتىق جوبانىڭ ىسكە اسىرىلۋ بارىسىنا كۇندەلىكتى باقىلاۋ جۇرگىزۋ، پروبلەمالىق ماسەلەلەردى جانە ولاردى شەشۋ جولدارىن كورسەتە وتىرىپ، اتقارىلىپ جاتقان جۇمىس تۋرالى ۇكىمەتكە اي سايىن حابارلاپ وتىرۋ تاپسىرىلدى.
