اياقدوپشىلارىمىز الىپ جۇرگەن ايلىقتارىن اقتايدى ما؟
وسىدان ەكى-ءۇش جىل بۇرىن فۋتبول تۋرالى ءبىراز ماقالالار جازىپ، ىشكى بىرىنشىلىكتى ءبىراز زەرتتەپ، ءبىرسىپىرا فۋتبولشىلارمەن، باپكەرلەرمەن جانە فۋتبول اگەنتتەرىمەن تانىسىپ، اڭگىمەلەسكەن ەدىم. سودان قازاق فۋتبولى تۋرالى ءبىرشاما اقپاراتپەن سۋسىنداپ الدىم.
سول اڭگىمەلەردەن كەيىن كوكەيىمدە "فۋتبولشىلارىمىز الىپ جۇرگەن ايلىقتارىن اقتايدى ما؟" دەگەن سۇراق قالىپ قويدى. شىنىندى، ءبىزدىڭ فۋتبولشىلار وتە كوپ جالاقى الاتىن سياقتى.
بىردەن ايتايىن، مەن سويلەسكەن كىسىلەردىڭ بارلىعى جالاقى تۋرالى ناقتى ءدوپ باسىپ "ايلىق مىناداي" دەپ ايتپايدى. بارلىعى شامالاپ ايتادى. كوبىسى ءتىپتى ول تۋرالى اڭگىمەلەسكىسى كەلمەيدى. سوندىقتان مەندە جالاقى تۋرالى ناقتى قۇجات جوق.
سونىمەن، مەنىڭ ەستىگەنىم بويىنشا قپل-دا الاڭعا شىقپاسا دا، ويىنعا قاتىسۋعا مۇمكىندىگى بار دەگەن تىزىمگە ەنگەن جاس فۋتبولشىنىڭ ءوزى 1-3 مىڭ دوللار كولەمىندە اقشا الادى. ەگەر الاڭعا شىقسا تاعى كوبەيەدى.
ال نەگىزگى قۇرام ويىنشىلارىنىڭ ورتاشا جالاقىسى 20 مىڭ كوك قاعازدان باستالادى. بۇل قازاقستاندىڭ فۋتبولشىلاردىڭ ەڭبەك اقىسى. ال، شەت ەلدەن كەلگەندەرىڭ ايلىق ناپاقاسى 30 مىڭ دوللاردان باستالادى. مۇنداي اقشالاردى بىرىنشىلىكتەگى ورتاڭقول، ەكىنشى التىلىقتا جۇرەتىن كوماندالار تولەيدى.
ءبىرىنشى التىلىقتا جۇرگەن كلۋبتاردىڭ قازاقستاندىق فۋتبولشىلارى 40 مىڭ مەن 100 مىڭ دوللاردىڭ اراسىندا الادى. لەگيونەرلەرى 50-150 اراسىندا.
وعان تاعى بونۋستار قوسىلادى. قوسىمشا سىياقى ءاربىر ويىن ءۇشىن بولۋى مۇمكىن. نەگىزىنەن گول سوققان فۋتبولشىعا جانە جەڭىسكە جەتكەن كوماندانىڭ ويىنشىلارىنا، سىياقى 1 مىڭ دوللاردان باستالىپ، 10 مىڭعا دەيىن جەتەدى. سىياقىنى ءبىزدىڭ فۋتبولشىلار ەۋروپالىق دودالارداعى ويىندا جەڭىسكە جەتسە كوپ الادى.
ەندى قاراڭىزدار. ەلىمىزدە مۇعالىمدەردىڭ، دارىگەرلەردىڭ، قۇقىق قورعاۋ قىزمەتكەرلەرىڭىڭ، مەملەكەتتىك قىزمەتكەرلەردىڭ جالاقىسى 50 مىڭ تەڭگە مەن 200 مىڭنىڭ ورتاسىندا. ونىڭ ءبىرازى ءارتۇرلى سەبەپتەرمەن ءارتۇرلى "جيناۋ" جۇمىستارىنا كەتەدى. سوندا ولار ورتاشا ەسەپپەن 100 مىڭداي عانا الاتىن شىعار. سوسىن ولار "لەۆىيعا" كوشەدى.
ەندى وسىنىڭ بارلىعىن ءوزى شامالى ىستەيتىن ميىما سالىپ ويلانىپ، تاعى مىناداي سۇراق كەلەدى. بىزگە فۋتبولشىلار كەرەك پە، الدە ءبىلىم بەرەتىن، دەنساۋلىعىڭدى تۇزەيتىن ماماندار كەرەك پە؟ سىزگە شە؟
راسىندا، ءبىزدىڭ فۋتبولشىلار الىپ جۇرگەن ايلىقتارىن اقتاپ ءجۇر مە؟ ءسىز قالاي ويلايسىز؟
وسىعان كەلگەندە كوبىسى شەت ەل فۋتبولشىلارىمەن سالىستىرادى. اينالايىندار-اۋ، ول فۋتبولشىلارمەن سالىستىرۋ ءۇشىن، ءبىزدىڭ فۋتبولشىلار سولار سياقتى دوپ تەۋىپ السىندا الدىمەن.
قۇرىسىن، نە دەپ كەتتىم. ارتىق ايتسام كەشىر مەنى xالقىم!
ءۋاليحان قوسانباي
