بىرىككەن اراب امىرلىگىندە "روپ وپەراتورىنىڭ" بۇرىنعى قۇرىلتايشىسى شىنار مۇحتاروۆا ۇستالدى، دەپ حابارلايدى "ادىرنا" پورتالى. بۇل تۋرالى قازاقستان رەسپۋبليكاسىنىڭ سىبايلاس جەمقورلىققا قارسى اگەنتتىگى مالىمدەدى.
«ىزدەۋدە جۇرگەن "روپ وپەراتورى" باسشىسى ءباا-دە ۇستالدى. سىبايلاس جەمقورلىققا قارسى قىزمەت بۇعان دەيىن «روپ وپەراتورى» جشس بۇرىنعى قۇرىلتايشىسى مۇحتاروۆا ش. ىزدەۋدە بولعان بولاتىن" دەلىنگەن حابارلامادا.
ول دۋباي قالاسىندا ۇستالىپ، ينتەرپولدىڭ كومەگىمەن بىرىككەن اراب امىرلىكتەرىنىڭ ۋاكىلەتتى ورگاندارىمەن قاماۋعا الىندى.
«قازىرگى ۋاقىتتا قازاقستان رەسپۋبليكاسىنىڭ باس پروكۋراتۋراسى ونى ەكستراديتسيالاۋ ءراسىمىن جۇرگىزىپ جاتىر»، - دەلىنگەن اقپاراتتا.
ايتا كەتەيىك، شىنار مۇحتاروۆانى ەكس-پرەزيدەنت نۇرسۇلتان نازارباەۆتىڭ كەنجە قىزى ءاليا نازارباەۆانىڭ جاقىن ادامى دەگەن اقپارات ايتىلعان بولاتىن. كەيدە ونى نازارباەۆانىڭ ءۇي قىزمەتشىسى دەيتىن.
ەسكە سالايىق، "انتيكور" كومپانيانىڭ بۇرىنعى قۇرىلتايشىسى شىنار مۇحتاروۆاعا ىزدەۋ جاريالاعان. ول 2017-2018 جىلدارى ۋتيليزاتسيا الىمى جيناعىنان ەكولوگيالىق كودەكستىڭ تالاپتارىن بۇزا وتىرىپ، 920 ملن تەڭگە مولشەرىندە زاڭسىز ديۆيدەند الدى دەپ ايىپتالىپ، ۇستىنەن قىلمىستىق ءىس قوزعالعان.
سونداي-اق، استانا قالاسىندا اعىمداعى جىلدىڭ 17 ساۋىردە "روپ وپەراتورى" كومپانياسىنىڭ بۇرىنعى باسشىلىعى مەن ەكولوگيا ءمينيسترىنىڭ ورىنباسارىنا قاتىستى سوت ءىسى بولعان بولاتىن. سىبايلاس جەمقورلىققا قارسى ءىس-قيمىل اگەنتتىگى "ەكولوگيا مينيسترلىگى مەن "روپ وپەراتورى" جشس لاۋازىمدى ادامدارى 180 ملرد تەڭگە ۇرلاپ، قارجىنى قوقىس ورتەيتىن التى زاۋىت سالاتىن كومپانياعا اۋدارماق بولعانىن" انىقتاعان. كۇدىكتىلەر سوتتا تاعىلعان ايىپتى مويىندامايتىندارىن جەتكىزدى.
