ەڭبەك جانە حالىقتى الەۋمەتتىك قورعاۋ ءمينيسترىنىڭ «جاپپاي ساياسي قۋعىن-سۇرگىن قۇرباندارىنا اقشالاي وتەماقى تولەۋ قاعيدالارىن بەكىتۋ تۋرالى» بۇيرىعى جاريالاندى. بۇيرىققا ساي قۋعىن-سۇرگىن قۇرباندارىنا اقشالاي وتەماقى تولەۋ قاعيدالارى بەكىتىلىپ وتىر. ناۋبەت جىلدارىنىڭ قاسىرەتىن "قامىت قىلىپ موينىمەن كوتەرگەن" قۇربانداردىڭ بالالارى وتەماقىعا ارنايى قۇجاتتاردى ۇسىنۋ ارقىلى قول جەتكىزە الادى، دەپ حابارلايدى "ادىرنا" ۇلتتىق پورتالى.
قۇجاتتا وتەماقى تولەۋدىڭ ءتارتىبى ۇسىنىلادى. وندا:
«جاپپاي ساياسي قۋعىن-سۇرگىندەر قۇرباندارىن اقتاۋ تۋرالى» قازاقستان رەسپۋبليكاسىنىڭ زاڭىنا سايكەس اقتالعان جاپپاي ساياسي قۋعىنسۇرگىندەر قۇرباندارىنا، جاپپاي ساياسي قۋعىن-سۇرگىندەر قۇرباندارىنىڭ بالالارىنا بىرجولعى اقشالاي وتەماقى تولەۋ ءتارتiبiن ايقىندايدى»، - دەپ ايتىلعان.
وتەماقى الۋدىڭ تالاپتارى بۇيرىقتا كورىنىس تاپقان. ول ءۇشىن ساياسي قۋعىن-سۇرگىندەر قۇرباندارىنىڭ بالالارى تۋ تۋرالى كۋالىك نە تۋدى مەملەكەتتىك تىركەۋ تۋرالى اكت جازباسىنان ءۇزىندى كوشىرمەنى كورسەتىپ، پروكۋراتۋرا ورگاندارىنان نەمەسە سوت ورگاندارىنان زاڭنىڭ 22-بابىندا كورسەتiلگەن ورىنداردا بولعان كەزەڭى كورسەتىلگەن، اتا-اناسىنىڭ بىرەۋىنىڭ اقتالعانى تۋرالى انىقتامانى ۇسىنۋى ءتيىس.
مۇنىمەن قوسا العاندا، ءبىر رەتتىك وتەماقىعا قول جەتكىزۋ ءۇشىن باس بوستاندىعىنان ايىرۋ ورىندارىندا، پسيحياتريالىق مەكەمەلەردە، ارنايى قونىستاردا بولعان ۋاقىتى، سونداي-اق باس بوستاندىعى شەكتەۋلi جاعدايدا ءماجبۇرلi ەڭبەككە تارتىلعان ۋاقىتى تۋرالى انىقتاما قاجەت ەكەندىگى قاداپ ايتىلعان.
ساياسي قۋعىن-سۇرگىن قۇرباندارى مەن ولاردان زارداپ شەككەندەر ءۇشىن مەملەكەت قازىناسىنان 1,3 ملرد تەڭگە كولەمىندە قاراجات بولىنگەنى دە حابارلاندى.
"ادىرنا" ۇلتتىق پورتالى
