اتىراۋدا 17 ءورت ءسوندىرۋشى جۇمىستان قۋىلدى. ولار باسشىلىقتان جالاقىنى كوتەرۋدى تالاپ ەتكەن ەكەن. الايدا «ينتەرگاز ورتالىق ازيا» كومپانياسىنا قاراستى مەردىگەر GRWORLD ءبارىن ءبىر كۇندە جۇمىسسىز قالدىرعان. بۇل تۋرالى «كتك» ارناسى جاريالادى، دەپ حاارلايدى “ادىرنا” ۇلتتىق پورتالى.
مالىمەت بويىنشا، ءورت سوندىرۋشىلەر ماقات اۋدانىنان كەلگەن. بارلىعى دا «ينتەرگاز ورتالىق ازيا» كومپانياسىنىڭ گاز قۇبىرلارىنداعى قاۋىپسىزدىككە جاۋاپتى جۇمىسشىلار. ولاردىڭ ايتۋىنشا، قاۋىپتى نىسانداعى ءورت قاۋىپسىزدىگىن جىلدا ءارتۇرلى كومپانيا جەڭىپ الادى. سوندىقتان ءورت سوندىرۋشىلەر دە ەشقانداي الەۋمەتتىك تولەمسىز، ەڭبەك دەمالىسىنسىز ءتۇرلى كومپانياعا اۋىسىپ جۇرە بەرەدى ەكەن. ال ايلىعى نەبارى 85 مىڭ تەڭگە. جاقىندا «ينتەرگاز ورتالىق ازيانىڭ» ءورت قاۋىپسىزدىگىن قامتاماسىز ەتۋ باسقا كومپانيانىڭ قولىنا وتكەن. ولار وسى 17 ادامدى جۇمىسقا قابىلداعان. الايدا ەڭبەك شارتىنا كەلىسپەي، ەڭبەكاقىنى كوتەرۋدى تالاپ ەتكەندە، ءبارىن ءبىر كۇندە جۇمىستان شىعارىپ جىبەرگەن.
85 مىڭ تەڭگە ەڭبەكاقى الامىز. سونى 50 پايىزعا كوتەر دەپ تالاپ قويدىق. سول تالابىمىزدى ورىنداماي، ءبىزدى جۇمىستان زاڭسىز شىعارىپ جىبەردى. 29 ماۋسىمدا، بۇگىن جۇمىسقا بارعاندا «جۇمىستان بوسسىزدار» دەپ ورنىمىزعا ادام الىپ، جۇمىستان بوساتىپ جىبەردى. 17 ادام. ەشقانداي ەسكەرتۋ بەرمەدى، - دەدى ءورت ءسوندىرۋشى ءسالىمباي جۇبانعاليەۆ.
تاعى ءبىر ءورت ءسوندىرۋشىنىڭ ايتۋىنشا، ولار پرەزيدەنت قاسىم-جومارت توقاەۆتىڭ «ءورت سوندىرۋشىلەردىڭ جالاقىسىن 70 پايىزعا كوتەرىڭدەر» دەگەن جولداۋىن ايتقان.
قاسىم-جومارت توقاەۆتىڭ ايتقان جولداۋى بار عوي. «ءورت سوندىرۋشىلەردىڭ جالاقىسىن 70 پايىزعا كوتەرىڭدەر» دەگەن... ءبىز سونى ايتتىق. وسىنداي جولداۋ بار. وعان سىزدەر باعىنبايسىزدار ما، قازاقستاندا تۇرمايسىزدار ما دەدىك. زاڭ ءبىر ەمەس پە؟ ولار «جوق» دەدى. ءبىز كوتەرە المايمىز دەدى، - دەيدى ءورت ءسوندىرۋشى ازامات مامىشەۆ.
نارازى توپ جالاقىنىڭ ازدىعىن بۇعان دەيىن دە ايتقان. ول كەزدە ەڭبەك ينسپەكتورلارى «شارتقا قول قويدىڭىزدار، بۇل زاڭ بويىنشا كەلىسىم بەرگەندەرىڭىز» دەپ تىيىپ تاستاعان.
ال ەندى قول قويماپ ەدىك، ءبارىمىزدى جۇمىستان شىعارا سالدى، - دەيدى اشىنعاندار.
ەڭبەك ينسپەكتسياسى جۇمىس بەرۋشىمەن سويلەسكەنىن ايتقان. بىراق مەردىگەر جالاقىنى وسىرۋگە قارجى مۇمكىندىگىمىز جوق دەگەن. دەگەنمەن 17 ادامدى ەڭبەك شارتىنسىز 27 كۇن جۇمىس ىستەتكەنى ءۇشىن جاۋاپقا تارتىلادى دەپ وتىر.
بۇل ماسەلە ءالى باقىلاۋدا. وبلىس اكىمىنىڭ جانىندا ءۇش جاقتى تۇراقتى كوميسسيا بار. سول كوميسسياعا بۇل جاعداي ايتىلادى. سول كەزدە تاپسىرىس بەرۋشى «ينتەرگاز ورتالىق ازيا» جۇمىس بەرۋشى، بارلىعى شاقىرىلىپ، كەلىسسوز جۇرگىزىلەدى، - دەدى مەملەكەتتىك ەڭبەك ينسپەكتورى كەمەل يمانعاليەۆ.
سونىمەن قاتار «كتك» ارناسىنىڭ مالىمەتىنشە، 17 ادامدى ءبىر كۇندە جۇمىستان شىعارا سالعان كومپانيا وكىلدەرى «اۋىلدىق جەر ءۇشىن 85 مىڭ تەڭگە از اقشا ەمەس» دەگەن.
