ەڭ تومەنگى جالاقىنى قاشان كوتەرىلەدى؟ بۇل تۋرالى سۇراققا ءماجىلىس كۋلۋارىندا ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا جاۋاپ بەردى، دەپ حابارلايدى “ادىرنا” ۇلتتىق پورتالى.
ەڭبەك جانە حالىقتى الەۋمەتتىك قورعاۋ ءمينيسترىنىڭ ايتۋىنشا، ەڭ تومەنگى جالاقىنى انىقتاۋدىڭ جاڭا ادىستەمەسى قابىلدانعانىن، قازىر بۇل ماسەلەمەن ءۇش ينستيتۋت اينالىسىپ جاتىر.
"بۇل ماسەلە كۇن تارتىبىندە بار. 2024 جىلى ەڭبەك مينيسترلىگى وسى جىلدار ارالىعىندا العاش رەت ەڭ تومەنگى ەڭبەكاقىنى انىقتاۋ ادىستەمەسىن قابىلدادى. بۇگىندە بىرنەشە ينستيتۋت ەڭبەك ونىمدىلىگىنىڭ ناقتى كورسەتكىشتەرىن، وڭىرلەر، سالالار بولىنىسىندەگى مەديانالىق جالاقى بويىنشا زەرتتەۋلەر جۇرگىزۋدە جانە سونىڭ بارلىعى ەڭ تومەنگى جالاقىنى ەسەپتەۋگە نەگىز بولادى", – دەيدى مينيستر.
ەڭ تومەنگى جالاقى ناقتى قانشا تەڭگەگە وسەتىنى زەرتتەۋلەردەن كەيىن بەلگىلى بولادى. ءمينيستردىڭ ايتۋىنشا، زەرتتەۋ جۇرگىزگەننەن كەيىن ەڭ تومەنگى جالاقى كەلەسى جىلدىڭ 1 قاڭتارىنان باستاپ كوتەرىلۋى مۇمكىن.
ايتا كەتەيىك، 2024 جىلدىڭ قاڭتار ايىندا ەڭبەك جانە حالىقتى الەۋمەتتىك قورعاۋ مينيسترلىگى دۇنيەجۇزىلىك بانك ساراپشىلارىمەن بىرلەسە وتىرىپ، ەڭ تومەنگى جالاقىنى انىقتاۋ ادىستەمەسىنىڭ جوباسىن ازىرلەدى.
حالىقارالىق ەڭبەك ۇيىمى بارلىق ەلگە كەيتتس يندەكسىن ۇستانۋدى ۇسىنادى. بۇل يندەكس — زاڭمەن بەلگىلەنگەن ەڭ تومەنگى جالاقىنىڭ مەديانالىق جالاقىعا اراقاتىناسى — كەمىندە 50% دەڭگەيىندە بولۋى كەرەك.
دامىعان ەلدەردە كەيتتس يندەكسى شامامەن 55%-عا تەڭ. ال قازاقستاندا بۇل كورسەتكىش ايتارلىقتاي تومەن – 2023 جىلى نەبارى 34% بولدى.
