بۇگىن – ۇلتتىق دومبىرا كۇنى. 2018 جىلدان بەرى شىلدەنىڭ العاشقى جەكسەنبىسى قازاقتىڭ ءتول اسپبىنىڭ كۇنى رەتىنە تويلانىپ كەلەدى.
دومبىرا جەر بەتىندە كەڭىنەن تاراعان شەرتپەلى اسپاپتاردىڭ قاتارىنا كىرەدى. ونەرتانۋشىلار مەن تاريحشىلار مۇنداي اسپاپتار عىلىمدا ح عاسىردان باستاپ بەلگىلى دەپ تۇجىرىمدايدى. الايدا 2010 جىلى ەلدەگى باق تاريحى ءبىزدىڭ زامانىمىزدىڭ V عاسىرىنان باستالاتىن «اتا دومبىرا» تابىلعانىن ايتىپ ءسۇيىنشى سۇراعان بولاتىن.
1500 جىل بۇرىن قولدانىستا بولعان دەلىنەتىن كونە اسپاپ التاي تاۋىنىڭ موڭعوليا جاعىنداعى ۇڭگىرتاس دەگەن ۇڭگىردەن تابىلعان. اۋەلى مالشىنىڭ قولىنا تۇسكەن اسپاپ، كەيىن ارحەولوگتاردىڭ قىزىعۋشىلىعىن وياتىپ، 2008 جىلى مەملەكەت قامقورلىعىنا الىنادى. بۇل عىلىمي جاڭالىققا قازاق عالىمدارىنىڭ اراسىنان تانىمال تۇركولوگ، فيلولوگيا عىلىمدارىنىڭ دوكتورى قارجاۋباي سارتقوجاۇلى نازار اۋدارىپ، اسپاپتىڭ دومبىرانىڭ ارعى «اتاسى» ەكەنىن دالەلدەپ شىعادى. وسىلايشا شەرتپە اسپاپتاردىڭ تاريحى ءبىزدىڭ زامانىمىزدىڭ V عاسىرىنان باستاۋ الاتىنى بەلگىلى بولدى.
بىرنەشە ايلارعا سوزىلعان كەلىسسوزدەردەن كەيىن عانا موڭعوليا تاراپى دومبىرانىڭ كوشىرمەسىن الۋعا رۇقسات بەرىپ، كەيىن سول كوشىرمە نەگىزىندە جاسالعان كونە دومبىرانىڭ نۇسقاسى مۋزەيگە قويىلدى.
بۇگىنگى اتاۋلى كۇنگە وراي مەملەكەت باسشىسى قاسىم-جومارت توقاەۆ Twitter پاراقشاسىندا قۇتتىقتاۋ جاريالادى.
بارشاڭىزدى ۇلتتىق دومبىرا كۇنىمەن قۇتتىقتايمىن! كونە داۋىردەن جەتكەن بۇل اسپاپ حالقىمىزدىڭ بولمىس-ءبىتىمىن، سالت-ءداستۇرى مەن مادەنيەتىن ايشىقتايدى. رۋحىمىزدى كوتەرىپ، مەرەيىمىزدى وسىرگەن قارا دومبىرا اسىل مۇرامىزعا، ۇلتتىڭ سيمۆولىنا اينالدى. ءبىز ونى جان-جاقتى دارىپتەي بەرەمىز، – دەپ جازدى مەملەكەت باسشىسى.
