ەلىمىزدە مۇمكىندىگى شەكتەۋلى جانداردىڭ كۇندەلىكتى ءجۇرىپ-تۇرۋىنا كەدەرگى كەلتىرەتىن دۇنيەلەر كوپتىگى جاسىرىن ەمەس. اسىرەسە، ازاماتتار ءجيى باراتىن كەي الەۋمەتتىك نىساندار مەن ەم الۋ ورىندارىنا كىرۋدىڭ ءوزى ماشاقات دەرسىڭ.
بيىل سول ولقىلىقتاردىڭ ورنىن تولتىرۋعا 1,7 ملرد تەڭگە ءبولىنىپتى. قارجى نىسانداردى مۇمكىندىگى شەكتەۋلى جاندارعا ىڭعايلى ەتىپ قايتا بەيىمدەۋگە جۇمسالادى. بۇل جونىندە ەڭبەك جانە الەۋمەتتىك قورعاۋ كوميتەتىنىڭ توراعاسى تولەگەن وسپانقۇلوۆتىڭ ءوزى مالىمدەگەن.
بۇل جۇمىستار مۇمكىندىگى شەكتەۋلى ازاماتتاردىڭ قۇقىقتىق جانە ءومىر ءسۇرۋ ساپاسىن جاقسارتۋعا باعىتتالعان 2025 جىلعا دەيىنگى ۇلتتىق جوسپار اياسىندا جۇزەگە اسىرىلىپ جاتقان كورىنەدى.
ساندارعا سۇيەنسەك، بۇگىنگى تاڭدا ەلىمىزدە 22 مىڭنان استام نىسان ءدال وسىلاي قايتا بەيىمدەۋدى قاجەت ەتەدى. جوسپارعا ساي جىل سايىن 4 مىڭنان استام نىسان قايتا بەيىمدەلىپ وتىرادى. قازىرگە شەيىن مۇمكىندىگى شەكتەۋلى جاندار ءۇشىن 9 مىڭنان استام نىسان قايتا بەيىمدەلگەن. ياعني، ارنايى پاندۋستار، ليفتتەر مەن دارەتحانالار سالىنىپ، زاعيپ جاندار ءۇشىن بەلگىلەر ىلىنگەن.
سونىمەن قاتار بيىل استانادا 150 ورىندىق مۇمكىندىگى شەكتەۋلى جاندارعا ارنالعان وڭالتۋ ورتالىعىنىڭ قۇرىلىسى باستالادى.
