سەمەيدەگى جانتۇرشىگەرلىك ءورت: ەكى بالا قايتىس بولدى

شىعىس قازاقستان وبلىسىندا سەمەي قالاسىنا جاقىن جەردەگى سۋىقبۇلاق اۋىلىندا جانتۇرشىگەرلىك ورتتەن ەكى بالا قازا تاپتى. وقيعانىڭ ءمان-جايى تەرگەلىپ جاتىر.

"قازىر ءورتتىڭ باستاپقى سەبەپتەرى قاراستىرىلىپ جاتىر: وتتى پايدالانۋدا قاۋىپسىزدىك ەرەجەسىن ساقتاماۋ، بالالاردىڭ تەنتەكتىگى نەمەسە ادەيى ءورت قويۋ", - دەپ حابارلادى توتەنشە جاعدايلار باسقارماسىنىڭ باسشىسى قانات ءابدىلوۆ.

سەمەي اكىمى ەرماك ءسالىموۆ بالالاردىڭ قازاسى تۋرالى حابار شىققان بويدا وقيعا ورنىنا اتتانىپ، انىق-قانىعىن ءبىلدى.

"قالا اكىمدىگىنىڭ مالىمەتىنشە، بالالاردىڭ اناسى - 28 جاستاعى كەلىنشەك قازىر جۇمىسسىز، اياعى اۋىر ەكەن. ءورت بولعان كۇنى ەسىكتى قۇلىپتاپ، دارىگەرگە قارالۋعا كەتكەن. قىرىق التى جاستاعى وتاعاسى نۇر-سۇلتان قالاسىندا قۇرىلىسشى بولىپ ىستەيدى، قايعىلى وقيعا كەزىندە سەمەيدە بولماعان", - دەپ مالىمەت بەردى ءسالىموۆ.

وتباسىعا اكىمدىك جاردەم كورسەتكەن

قالا اكىمدىگىنىڭ مالىمەتىنشە، وتباسى الەۋمەتتىك تولەم الۋعا ءوتىنىش بەرمەگەن، جۇمىسسىز رەتىندە دە تىركەلمەپتى. الايدا وتباسىنىڭ قيىندىققا تاپ بولعانىن اكىمدىك ءبىلىپ، بارىنشا جاردەم كورسەتۋگە تىرىسقان.

"شاعىن اۋدان №48 ورتا مەكتەپكە قارايدى. مەكتەپ قىزمەتكەرلەرى جىلىنا ءتورت رەت ءۇي-ءۇيدى ارالايدى. قىركۇيەك، قاراشا جانە قاڭتاردا اتا-اناعا بالالاردى قوعامعا بەيىمدەپ، مەكتەپكە دايارلاۋ كەرەكتىگى ءتۇسىندىرىلدى. رەيدتەردىڭ بىرىندە ۇلكەن ۇلى اكەسىمەن بىرگە ەلوردادا ەكەنى بەلگىلى بولدى، ال كەنجەسى بوتەن ادامداردىڭ قولىندا تۇرعان ەكەن"- دەدى ءسالىموۆ.

بالالار تۇرىپ جاتقان سانيتارلىق-تۇرمىستىق جاعدايدىڭ تومەندىگىنە بايلانىستى، ءۇيدىڭ كەنجەسى بالالار ۇيىنە جىبەرىلۋى ءتيىس ەدى. الايدا اناسىنىڭ ارىزى مەن پوليتسيا ورگاندارىنىڭ وتىنىشىنە بايلانىستى بالانى وتباسىعا قايتارىپتى.

"وتباسى تۇراتىن مەكەنجاي "جولامان" وتباسىلىق دارىگەرلىك امبۋلاتورياسىنىڭ ۋچاسكەسىنە كىرەدى. مەكەمە وتباسىعا ۇنەمى مەديتسينالىق اقىل-كەڭەس بەرىپ، دارىگەرلەر بالالاردى ۋاقىتىلى قاراپ وتىرعان. "سالاماتتى انا مەن بالا" ايلىعىنىڭ اياسىندا وتباسى كوپبالالى بولماسا دا، ءتيىستى مەديتسينالىق كومەك الدى", - دەپ اتاپ ءوتتى اكىم.

مارقۇم بالالاردىڭ اناسى داعدارىس ورتالىعىندا

شىعىس قازاقستان وبلىسى اكىمىنىڭ ورىنباسارى اسەم ءنۇسىپوۆا ايتقانداي، جۇكتى ايەلدى داعدارىس ورتالىعىنا ورنالاستىردى. قازىر پسيحولوگتار كومەكتەسىپ جاتىر.

جەرگىلىكتى بيلىك وكىلدەرى وتاعاسىمەن دە كەزدەسىپتى، ول قازىر سەمەيدە تۋىستارىنىڭ ۇيىندە تۇرىپ جاتىر. قالا اكىمدىگى بالالاردى جەرلەۋ ءراسىمىن ۇيىمداستىرۋدى موينىنا الدى.

نارىن قالي