Eki bala zardap shekken oıyn alańyndaǵy apattan keıin Álıhan Bókeıhan aýdanynyń ákim orynbasary qyzmetinen bosatylady, - dep habarlaıdy "Adyrna" tilshisi.
Jedel keńeste Qaraǵandy oblysynyń ákimi Ermaǵanbet Bólekpaev tıisti tapsyrma berdi. Sondaı-aq quqyq qorǵaý organdaryna durys ornatylmaǵan kógaldy qoıǵan merdigerdiń áreketine quqyqtyq baǵa berýdi tapsyrdy.
"Ótken aptada bizde tótenshe jaǵdaı boldy. Úlkenderdiń salǵyrttyǵynan eki bala zardap shekti. Qaraǵandy qalasynyń ákimine osy salaǵa jaýapty Álıhan Bókeıhan aýdanynyń ákiminiń orynbasary qyzmetinen bosatýdy tapsyramyn. Men birneshe ret eskertkenmin. Oıyn alańdaryn jóndeýde – eń aldymen qaýipsizdik týraly oılaný kerek. Eshteńe qulap qalmas úshin, qaýiptiń aldyn alý úshin bárin jiti tekserý kerek. Merdigerlerdiń asyǵys ekenin, aqsha tapqysy keletinin kórip otyrmyz, al keıbireýleri onyń ishinde bizdiń áriptesterdiń buǵan kóz juma qaraǵanyn baıqap otyrmyz», - dedi Ermaǵanbet Bólekpaev.
Sondaı-aq, Ermaǵanbet Bólekpaev balalardyń oıyn alańdary men aýla aýmaqtaryn abattandyrý erejelerin qaıta qaraýdy usyndy.
"Jasandy gazonnyń ornyna nege tartandy jamylǵyny qoldanbasqa. Osynyń barlyǵyn zerttep, ózgertý kerek. Bizdiń maqsatymyz - qaýipsiz balalyq shaqty qamtamasyz etý. Bul máselelerdi tezirek sheshý kerek", - dep qosty Bólekpaev.
Eske salaıyq, Qaraǵandyda 19 maýsymda qatty jel balalar oınap júrgen oıyn alańyn julyp ketken bolatyn. Oqıǵa saldarynan eki bala aýyr jaraqat aldy. Olardyń bireýi jansaqtaý bólimine túsip, keıin hırýrgter brıgadasy ota jasady.
Tótenshe jaǵdaıdan keıin Qaraǵandy qalasynyń ákimi Meıram Qojýhov bul balalar alańynyń áli iske qosylmaǵanyn aıtty. Sondaı-aq qaladaǵy balalar oıyn alańdarynyń jaǵdaıyn tekserýdi tapsyrdy.
"Adyrna" ulttyq portaly