مەملەكەت باسشىسى قاۋىپسىزدىك كەڭەسىنىڭ كەزەكتەن تىس وتىرىسىن وتكىزىپ، رەسەيدە بولعان جاعدايلارعا بايلانىستى بەرگەن تاپسىرمالاردىڭ ەسەبىن پىسىقتادى. ەلدەگى مۇنداي بولۋى ىقتيمال "قاتەرلى وتكەلدەرگە" دايىن بولۋدى تاپسىردى، دەپ حابارلايدى "ادىرنا" ۇلتتىق پورتالى.
قازاقستان رەسپۋبليكاسى پرەزيدەنتىنىڭ ءباسپاسوز قىزمەتىنىڭ حابارلاۋىنشا، جيىن بارىسىندا مەملەكەت باسشىسى رەسەي فەدەراتسياسىنداعى جاعدايعا بايلانىستى بەرگەن تاپسىرمالارىن ورىنداۋ قارامدارى تۋرالى پرەمەر-ءمينيستردىڭ، باس پروكۋروردىڭ، ۇلتتىق قاۋىپسىزدىك كوميتەتى توراعاسىنىڭ، قورعانىس، ىشكى ىستەر جانە سىرتقى ىستەر مينيسترلەرىنىڭ باياندامالارىن تىڭدادى.
بۇل وقيعا رەسەيدىڭ ىشكى ماسەلەسى ەكەنىنە قاراماستان، اتالعان جاعدايعا ەلىمىزدىڭ ازاماتتارى الاڭداۋشىلىق تانىتقانىن، قازاقستان مەن رەسەي اراسىن الەمدەگى ەڭ ۇزىن شەكارا ءبولىپ جاتقانىن، رەسەي قازاقستاننىڭ ستراتەگيالىق سەرىكتەسى ەكەنىن اتاپ ءوتتى.
قاسىم-جومارت توقاەۆ ۆلاديمير پۋتينمەن تەلەفون ارقىلى سويلەسۋ بارىسىندا رەسەي بيلىگىنىڭ كونستيتۋتسيالىق ءتارتىپتى ورناتۋ جانە ءوز ازاماتتارىنىڭ قاۋىپسىزدىگىن قامتاماسىز ەتۋ جونىندەگى شارالارىن قولداعانىن ەسكە سالدى. مەملەكەت باسشىسى اسكەري ءىس-قيمىلداردى توقتاتۋ جونىندەگى كەلىسىمدى قۇپتادى. پرەزيدەنت كەز كەلگەن مەملەكەتتىڭ ىشكى ساياساتىندا، سونىڭ ىشىندە قازاقستاندا دا، قوعامدىق ءتارتىپ پەن ەلدىڭ الەۋمەتتىك-ەكونوميكالىق دامۋىن قامتاماسىز ەتۋدىڭ نەگىزى رەتىندە زاڭ ۇستەمدىگى قاعيداتى باستى باسىمدىق بولۋعا ءتيىس ەكەنىن ايتتى.
جيىندا ەلىمىزدىڭ قارجى-ەكونوميكالىق تۇراقتىلىعىن جانە ازاماتتاردىڭ قاۋىپسىزدىگىن قامتاماسىز ەتۋ قاجەت ەكەنى اتاپ ءوتىلدى. پرەزيدەنت بارلىق ۆەدومستۆو باسشىلارىنا داعدارىس جاعدايىنداعى ىقتيمال قاتەرلەرگە قارسى ارەكەت ەتۋگە دايىن بولۋدى تاپسىردى.
قاۋىپسىزدىك كەڭەسى وتىرىسىنىڭ قورىتىندىسى بويىنشا مەملەكەت باسشىسى ۇكىمەت ازىرلەگەن شۇعىل ءىس-قيمىل جوسپارىن ماقۇلدادى.
"ادىرنا" ۇلتتىق پورتالى
