ەل اراسىندا بۇرىنعى مينيستر داۋرەن اباەۆتىڭ قازاقستاننىڭ رەسەيدەگى ەلشىسى بولادى دەگەن سىبىس شىندىققا اينالدى. داۋرەن اباەۆ قازاقستان رەسپۋبليكاسىنىڭ رەسەيدەگى توتەنشە جانە وكىلەتتى ەلشىسى لاۋازىمىنا تاعايىندالدى، دەپ حابارلايدى "ادىرنا" ۇلتتىق پورتالى.
مەملەكەت باسشىسىنىڭ جارلىعىمەن داۋرەن اسكەربەكۇلى اباەۆ قازاقستان رەسپۋبليكاسىنىڭ رەسەي فەدەراتسياسىنداعى توتەنشە جانە وكىلەتتى ەلشىسى لاۋازىمىنا تاعايىندالدى.
داۋرەن اباەۆ وسى ۋاقىتقا دەيىن بىرقاتار "وداعاي ويلارىمەن" ەل اۋزىنان تۇسپەي كەلەدى. قازاقستان پرەزيدەنتى اكىمشىلىگى جەتەكشىسىنىڭ ءبىرىنشى ورىنباسارى بولعان كەزىندە داۋرەن اباەۆ قازاقشا سويلەۋدى تالاپ ەتىپ جۇرگەن بەلسەندىلەر ارەكەتىن «جابايى ۇلتشىلدىق» دەپ اتاپ، كەلەكەلەپ ۇلگەردى.
مۇنداي ءسوزدى ول «قازاقستاندا ورىستارعا جەككورىنىش بارى» تۋرالى ايتىلعان ماسكەۋ مالىمدەمەسىنەن سوڭ ايتقان ەدى. اباەۆتىڭ بۇل ايتقانىن قازاق قوعامى قاتاڭ سىناعان. ونىڭ ماسكەۋگە ەلشى بولىپ تاعايىندالعانى دا وسى تۇرعىدان نازار اۋدارتىپ وتىر.
داۋرەن اباەۆ بۇرىن اقپارات جانە كوممۋنيكاتسيا ءمينيسترى، مادەنيەت جانە سپورت ءمينيسترى بولعان. بۇدان الدىن سىبايلاس جەمقورلىققا قارسى قىزمەت مادەنيەت جانە سپورت مينيسترلىگىنىڭ لاۋازىمدى تۇلعالارىنا قاتىستى بىرقاتار قىلمىستىق ءىستى تەرگەپ جاتقانى حابارلانعان.
«انتيكوردى» داۋرەن اباەۆ مادەنيەت جانە سپورت ءمينيسترى بولعان كەزەڭ قىزىقتىرعان. سوندا 2022 جىلى «ەۋرازيا» حالىقارالىق كينوفەستيۆالىن وتكىزۋ قانشالىقتى زاڭدى جۇزەگە اسقانى تەكسەرىلىپ جاتقانى ايتىلعان.
«قازاقستان رەسپۋبليكاسىنىڭ سىبايلاس جەمقورلىققا قارسى ءىس-قيمىل اگەنتتىگى مادەنيەت جانە سپورت مينيسترلىگىنىڭ لاۋازىمدى تۇلعالارىنا قاتىستى بىرقاتار قىلمىستىق ىستەردى تەرگەپ جاتىر»، - دەپ جاۋاپ بەرگەن سوندا سوتقا دەيىنگى تەرگەۋ قىزمەتىنىڭ باسشىسى قانات سۇلەيمەنوۆ.
اباەۆ مادەنيەت جانە سپورت مينيسترلىگىن 2022 جىلدىڭ قاڭتارىنان 2023 جىلدىڭ قاڭتارىنا دەيىن باسقارعان. بۇعان دەيىن 2020 جىلدىڭ مامىر ايىنان باستاپ پرەزيدەنت اكىمشىلىگى باسشىسىنىڭ ءبىرىنشى ورىنباسارى بولعان، ودان بۇرىن، 2016 جىلدان باستاپ اقپارات جانە كوممۋنيكاتسيالار مينيسترلىگىن باسقارعان. ول سونداي-اق قازاقستان پرەزيدەنتى قىزمەتىن اتقارعان كەزدە نۇرسۇلتان نازارباەۆتىڭ ءباسپاسوز حاتشىسى (2011-2015) جانە كەڭەسشىسى (2013-2016) بولدى.
2023 جىلدىڭ ناۋرىزىنان باستاپ اباەۆ اتقارۋشى كوميتەتى بەلارۋس استاناسى مينسك قالاسىندا ورنالاسقان تمد باس حاتشىسىنىڭ ورىنباسارى قىزمەتىن اتقارىپ كەلگەن.
"ادىرنا" ۇلتتىق پورتالى
