Shyǵys Qazaqstan oblysy Katonqaraǵaı aýdanynyń órt sóndirý qyzmetindegi tehnıkalardyń tozyǵy jetkeni aıtyldy. Bul týraly «Adyrna» ulttyq portalyna ShQO turǵyndary, burynǵy órt sóndirý qyzmetkerleri aıtyp vıdeo joldady. Al oblystyq Tótenshe jaǵdaılar departamenti tıisti órt sóndirý bóliminde órt sóndirý tehnıkasynyń jańasyna - 1 jyl, eskisine 35 jyl bolǵanyn málim etti.
Burynǵy órt sóndirýshilerdiń aıtýynsha órt sóndirý tehnıkalarynyń barlyǵy eski. Tipti, qyzmetkerlerdiń ózi kólikke qajet qurylǵylardy óz qaltalarynan qarajat shyǵaryp, satyp alady eken.
№37 órt sóndirý bóliminiń burynǵy qyzmetkeri Azat Mojanov pen №14 órt sóndirý bóliminiń burynǵy basshysy Bahytbek Shylaı Shyǵys Qazaqstan oblysy Qatonqaraǵaı aýdanynyń órt sóndirý qyzmetiniń jaǵdaıy múshkil ekenin aıtady.
«ÓZ AQShAMYZǴA AVTOISTERNA SATYP ALDYQ»
- 2011 jyly Katonqaraǵaı aýylyndaǵy №37 Órt sóndirý bólimine jumysqa ornalastym. Órt sóndirý bóliminde 10 jyl órt sóndirý kóliginiń júrgizýshisi retinde qyzmet atqardym. Osy on jylda nebir qıyndyqtar kórdim. Men osy órt sóndirýshi qyzmetin tańdaǵanyma esh ókinbeımin. Alaıda, sońǵy jyldary osy salaǵa múldem kóńil aýdarylmaı, ádiletsizdik pen jemqorlyqtyń qurbany bolǵandaı bolyp kórindi. Osy oraıda men jaı otyra almadym. Ózimniń órt sóndirý bólimimniń materıaldy-tehnıkalyq jaǵdaıy júregime qatty batty. Mundaǵy órt sóndirý bólimindegi kólikter 1977 jyly shyqqan. Tehnıkanyń jaǵdaıy óte nashar. Onyń tozyǵynyń jetkeni sonshalyqty órtke shyqqanda keıde avtokólikterdiń benzonasosy ózdiginen jumys istemeı, qolmen jumys istetip otyrǵan kezder boldy. Tipti, órt sóndirip turyp avtokólik óship qalatyndaı jaǵdaı bolǵan. Sol sebeptiKatonqaraǵaı aýdany Aqsý aýylynan ujym bolyp óz aqshamyzǵa avtoısterna satyp alyp júrdik, - deıdi Azat Mojanov.
Sondaı-aq, ol avtakóliktiń bólshekterin alý úshin qaryzǵa da kiretinderin aıtty. Aıtýynsha, aýyldaǵy avtobólshek dúkenderinde arnaıy qaryz dápterleri de bar eken.
- Órt sóndirý kólikteriniń eskiligi sonshalyqty – keıde órtke jete almaı jeke kólikterimizben súırep ákelgen kezder de bolǵan. Kólikter ózdiginen sý da sora almaıdy. Tehnıkalardan bólek, ózimizdiń ústimizge kıetin formalardy bazar aralap ózimiz satyp alyp júrdik. Bunyń barlyǵyn bireýden qoryqqanan nemese basshylarǵa jaǵyný úshin istegen emespiz. Basshylarǵa biz kerek emes bolsaq ta, biz halyqqa kerekpiz, el bizge senedi degen senimmen jasadyq. Jaı úı, qora-qopsyny qoıyp, alda-jalda áleýmettik mańyzy bar obektilerde, ıaǵnı mektep, bala-baqsha nemese aýrýhanada órt bolsa, bizdiń myna tehnıkalyq jaǵdaıymyzben órtti óshirmek túgil, jete alamyz ba degen kúmánmen júrmiz, - deıdi Azat Mojanov.
Onyń aıtýynsha, osy jaǵdaıdyń barlyǵyn basshylyqbiledi. «Bunyń barlyǵyna suranystar jiberilip otyrǵan. Biraq nátıjesi áli kúnge deıin joq. Toqsan saıyn kelip otyratyn komıssııalarǵa da bul jaǵdaı týraly aıtylyp otyratyn. Degenmen, olardyń da aýyzyn jabady», - dedi Azat Mojanov.
«JUMYSTAN ShYǴÝǴA ARYZ JAZDYRDY»
Azat Mojanov osy máselelerdi aıtyp, shaǵynǵannan keıin ony jumystan shyǵaryp, tipti onyń ústinen aryz jazǵan kórinedi.
- Mundaı jaǵdaılar týraly vıdeo, fotoǵada túsirip basshylyqqa birneshe márte jibergenmin. Osylardan keıin,maǵan «repressııa» bastaldy. Artyma túsip, áriptesterimdi maǵan qarsy qoıýǵa nasıhattaýǵa deıin bardy. Men sonda ShQO Tótenshe jaǵdaılar departamentiniń ınstagramm áleýmettik jelisindegi resmı paraqshasynda «túgel jańa tehnıkamen qamtylǵan, bári saqadaı-saı» degen vıdeosyndaǵy ótirigine shydamaı, naqty faktilerdi aıtyp, pikir jazǵan bolatynmyn. Meniń jazbama baılanysty qyzmettik tekserý júrgizildi. Jeke qurammen bolǵan suhbatty beınejazbaǵa jazyp otyrdy. Men jáne basqa da birneshe qyzmetker órt sóndirý bóliminiń jaǵdaıyn aıttyq.Osyndaı shyndyqtar aıtylǵan kezde, kelgen komıssııa vıdeony toqtatyp, aıtatyn sózderdi ózderine keregindaıyndatyp, qaıtadan jalǵastyryp otyrdy. Al kelgen osy tekserýmen aınalysqan komıssııa basshysy meni jeke kirgizip, «jumystan óz betińshe shyǵyp ket, áıtpese keıin qıyn bolady. Esh jerge jumysqa tura almaısyń. Men bul máselelerdi ózim sheshemin» dedi. Sosyn mennen jumystan shyǵýǵa aryz jazdyryp aldy. Iaǵnı maǵan psıhologııalyqqysym jasaldy. Ózimde bar vıdeo, foto materıaldardy sol kisige berdim. Aldanyp qalǵanymdy keıin túsindim. Áleýmettik jelige jazǵanym úshin meni aldaý áreketimen 2021 jyldyń 11 qarashasyndaǵy №627 j/q buıryǵymen ádiletsiz jumystan shyǵaryp jiberdi, - deıdi Azat Mojanov.
№14 órt sóndirý bóliminiń basshysy bolǵan Bahytbek Shylaı da ádiletsizdiktiń qurbany bolǵanyn aıtady. Oǵan jala jaýyp, basshylyqtan alyp tastaǵan. Qazir Rıdder qalasynyń №1 Memlekettik órt sóndirý bóliminiń (1-MÓSB) aǵa ıjeneri qyzmetin atqarady.
- 2019-2021 jyldar aralyǵandy №14 órt sóndirý bóliminiń basshysy boldym. 2021 jyly orman jandy. Sol kezde túrli quıtyrqy árekettermen meni laýazymymnan túsirip tastady.Qazirgi kezde órt sóndirý tehnıkasynyń jaǵdaıy máz emes. Men biletin Rıdder men Katonqaraǵaıdyń órt sóndirý bólimderinde tehnıkanyń bári eski. Qazir mınıstrlik ókilderi «400-deı tehnıka ǵana eski, qalǵanynyń barlyǵy jańa» dep aıtyp jatyr ǵoı. Onyń barlyǵy ótirik. Tipti, bizdiń bólimde 12 órt sóndirýshibolsa, 20 lıtr sý quıylatyn, arqaǵa ilip alyp, órtti óshiretin RLO tek 2 qyzmetkerde ǵana bar. Bul – óte soraqy, uıat nárse. Sony alyp bere almaı otyrǵanda, jańa kólikti qalaı kútemiz? Órt bolǵan jaǵdaıda tehnıkajetispegendikten, bir-birimizdi kútip turamyz. Bul - taza ólimge ıterip jatqan jaǵdaı! - deıdi Bahytbek Shylaı.
Sondaı-aq, ol oblys oıynsha órt sóndirý bólimderinde birde-bir dron joq ekenin aıtty. Aıtýynsha, dron arqyly qaı jerde órt bolǵanyn birden bilip, qyzmetkerlerdi sol jerge jumyldyrýǵa bolar edi.
- 2018 jyly órt sóndirý mashınasy aýdarylyp, Vladımır Mıhaılovıch degen qyzmetker qaıtys boldy. Sol mashınanyń odan buryn aqaýy bolǵan. Ol kezde men №14 órt sóndirý bóliminde isteıtinmin. Oǵan deıin joǵary jaqqa mashınanyń aqaýy bar, jóndeý qajet, kóliktiń bólshekteri kerek ekenin talaı ret aıttyq. Alaıda, qulaq aspady. Sóıtip, bir qyzmetker qaza tapty, bir qyzmetker jazyqsyzdan-jazyqsyz eki jarym jylǵa sottalyp qaıtty. Bul jaǵdaıdan sabaq alǵan eshkim joq. Áli kúnge deıin tehnıka jaqsarmady, - dep ol sózin qorytyndylady.
Shyǵys Qazaqstan oblysynyń Tótenshe jaǵdaılar departamenti “Adyrnanyń” osy másele týraly saýalyna jaýap berdi.
Departamenttiń aıtýynsha, Qatonqaraǵaıdaǵy №27 bólimdegi órt sóndirý tehnıkasynyń jańasyna - 1 jyl, eskisine 35 jyl bolǵan.
"Búgingi tańda Shyǵys Qazaqstan oblysy Tótenshe jaǵdaılar departamenti órt sóndirý jáne avarııalyq-qutqarý jumystary qyzmetiniń teńgeriminde 247 birlik tehnıka bar, onyń 125-i negizgi, 40-y arnaıy maqsattaǵy, 82-i qosalqy qural-jabdyqtar" delingen departament jaýabynda.
Osy derekke qaraǵanda, jyl saıyn turaqty negizde Tótenshe jaǵdaılar mınıstrligi men Shyǵys Qazaqstan oblysynyń ákimdigi órt sóndirý tehnıkasyn satyp alady. Jańa órt sóndirý kólikteri kelgen kezde olar eń aldymen shekaralas aımaqtarǵa, orman qory bar aımaqtarǵa, sondaı-aq órt oqıǵasy jıi tirkelgen bólimshelerge taratylady.
Shyǵys Qazaqstan oblystyq departamentiniń "Adyrnaǵa" jaýabyna qaraǵanda, Katonqaraǵaıdaǵy №27 órt sóndirý bóliminde órt sóndirýge arnalǵan 4 tehnıka bar. Tehnıkalar mynalar: 2022 jyly shyqqan Kamaz, 2007 jyly shyqqan Ýral, 1988 jyly shyqqan Gaz-66, 1977 jyly shyqqan ZIL 131.
"Tehnıkalar shyǵarylǵan jylyna qaramastan, tehnıkalyq jaramdy kúıde ustalýda. Sonyń nátıjesinde búgingi tańda oblysta ótken jylmen salystyrǵanda órttiń 10 paıyzǵa tómendeýi tirkeldi" delingen departament jaýabynda.
Shyǵys Qazaqstan oblysymen shektesetin Abaı oblysynda 8 maýsymda "Semeı ormany" memlekettik orman tabıǵı rezervatynda bastalǵan alapat órt 14 maýsymda oqshaýlandy. Oqıǵa saldarynan 15 adam qaza tapty. Órt Semeı qalasynan 25 shaqyrym qashyqtyqta bolǵan. 9 maýsymda Abaı oblysynyń orman alqabyndaǵy órt faktisi boıynsha Qylmystyq kodekstiń "eki jáne odan da kóp adamnyń abaısyzda ólimine ákep soqqan órt qaýipsizdigi talaptaryn buzý" baby boıynsha is qozǵaldy. Órt kezinde qyzmetten alynǵan Tótenshe jaǵdaılar mınıstri Iýrıı Ilın qyzmettik mindetterin oryndamaý jáne nemquraılylyq turǵysynan tekserilip jatyr. Is arnaıy prokýrorlardyń qaraýynda.
Al 18 maýsym kúni Shyǵys Qazaqstan oblysy Katonqaraǵaı ulttyq tabıǵı saıabaǵynda da órt shyqqan. Katonqaraǵaı aýdanynyń Sennoe aýylynan 3 shaqyrym jerde aldyn ala aýmaǵy 15 gektar qurǵaq shóp pen butalar órtengen. Órt sóndirýge Tótenshe jaǵdaılar departamenti orman sharýashylyǵynan 99 adam jáne 3 tehnıka, «Avıaormankúzetinen» 6 adam jáne jergilikti atqarýshy organnan 7 adam jumyldyryldy.
