جەتىسۋ وبلىسىندا قانت ءوندىرىسىن دامىتۋ ءۇشىن وسى جىلى قانت قىزىلشاسىنىڭ القابى 2 ەسەگە ۇلعايتىلىپ، 8 515 گەكتار بولدى. ودان 47 مىڭ توننا قانت ءوندىرۋ جوسپارلانۋدا. بۇل ءوڭىردىڭ قانتقا دەگەن سۇرانىسىن تولىق جاۋىپ (11 مىڭ تن), ءونىمدى ەلىمىزدىڭ وزگە وڭىرلەرىنە شىعارۋعا مۇمكىندىك بەرەدى. بۇل تۋرالى ەسكەلدى اۋدانىنداعى «تاۋ جەتىسۋ» بازاسىندا ورتالىق كوممۋنيكاتسيالار قىزمەتىنىڭ ۇيىمداستىرۋىمەن وتكەن جەتىسۋ وبلىسى اكىمى بەيبىت يساباەۆتىڭ بريفينگىسىندە بەلگىلى بولدى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.
سول سياقتى ءوز بايانداماسىندا وبلىس باسشىسى سۋ شارۋاشىلىعى نىساندارىن قايتا جاڭعىرتۋ مەن جوندەۋ جۇمىستارى تۋرالى دا ايتىپ ءوتتى. ونىڭ ايتۋىنشا، يسلام دامۋ بانكى قاراجاتى ەسەبىنەن اقسۋ اۋدانىندا 6,3 ملرد. تەڭگەگە سۋارۋ جۇيەلەرىندە قۇرىلىس جۇمىستارى بيىل اياقتالادى، ال كوكسۋ اۋدانىندا وسى جىلى باستالادى، وعان 8,3 ملرد. تەڭگە قاراستىرىلعان. سونىڭ ناتيجەسىندە اقسۋ اۋدانىندا 11,5 مىڭ گا، كوكسۋدا 13,6 مىڭ گەكتار جەر سۋمەن قامتىلادى.
- اقسۋ اۋدانىنداعى قىزىلاعاش سۋارۋ ءماسسيۆىنىڭ قۇرىلىسىنا رەسپۋبليكالىق بيۋدجەتتەن 8,9 ملرد. تەڭگە ءبولىنىپ، بۇگىنگى كۇنگە سۋ قۇبىرلارى سالىنا باستادى. بيىل ءبىتۋى ءتيىس. وسىنىڭ ارقاسىندا 6,7 مىڭ گەكتار جەرگە سۋارۋ جۇيەلەرى سالىنادى، ونىڭ 5,3 مىڭ گا جاڭا جەرلەر. جالپى 30 مىڭ گەكتار القاپ سۋارمالى سۋمەن قامتىلادى، - دەدى ب.يساباەۆ.
جەتىسۋ وبلىسى اكىمىنىڭ ءباسپاسوز قىزمەتى.
