«قورعاس – شىعىس قاقپاسى» ارنايى ەكونوميكالىق ايماعى جەتىسۋ وبلىسى ەكونوميكاسىنىڭ دامۋىنا تىڭ سەرپىن بەرەدى. ونىڭ اۋماعىندا 2030 جىلدىڭ سوڭىنا دەيىن جالپى قۇنى 570 ملرد. تەڭگەلىك 30 جوبانى ىسكە اسىرىلۋ مەجەلەنگەن. بۇل تۋرالى بۇگىن ورتالىق كوممۋنيكاتسيالار قىزمەتىنىڭ ۇيلەستىرۋىمەن ەسكەلدى اۋدانىنداعى «تاۋ جەتىسۋ» تۋريستىك نىسانىندا وتكەن بريفينگىدە جەتىسۋ وبلىسىنىڭ اكىمى بەيبىت يساباەۆ ايتتى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.
اەا-دا قحر-مەن بىرلەسىپ، «قازاقستان-قىتاي حالىقارالىق ونەركاسىپ قالاسى» يندۋستريالدى تەحنوپارك قۇرىلىسىنىڭ جوباسى قولعا الىنۋدا. اۋماعى 1000 گا بولاتىن جوباعا 330 ملرد. تەڭگە ينۆەستيتسيا تارتىلىپ، 2 مىڭنان استام جۇمىس ورنى اشىلادى. «جوبانى جانداندىرۋ تۋرالى مەموراندۋم جاساستىق، جىل سوڭىنا دەيىن قۇرىلىستىڭ ءبىرىنشى كەزەڭىن باستاۋ جوسپارلانىپ وتىر»، - دەدى ب.يساباەۆ.
سپيكەردىڭ سوزىنە سۇيەنسەك، ءوڭىردىڭ اگرارلىق باعىتىن ەسكەرە وتىرىپ، اەا اۋماعىندا قىتايداعى جاڭبىرلاتىپ سۋارۋ جۇيەسىنىڭ ءىرى ءوندىرۋشىسى «VODAR» كومپانياسى قۇنى 20 ملن. دوللار بولاتىن يرريگاتسيالىق قۇرال-جابدىقتار شىعاراتىن زاۋىت اشۋدى جوسپارلاپ وتىر. العاشقى جەلىسى بيىلعى جىلى ىسكە قوسىلادى.
سونىمەن قاتار وبلىستىڭ شەكارالىق ايماقتا ورنالاسۋىن ءتيىمدى پايدالانۋ ءۇشىن كولىك-لوگيستيكالىق سالادا Dostyk TransTerminal»، «DAR RAIL Infrastructure»، «ETT Dostyk» كومپانيالارىنىڭ 3 جوباسى قاراستىرىلعان. ياعني كوپ فۋنكتسيونالدى جۇك تيەۋ تەرمينالىنىڭ قۇرىلىسى جۇرگىزىلەدى، قۇنى 57,3 ملرد.تەڭگە، جالپى قۋاتى 11 ملن. توننا نەمەسە 630-700 مىڭ كونتەينەر.
ەسكە سالساق، 3 جىلدىق ۇزىلىستەن كەيىن «قورعاس» حشىو ءوز جۇمىسىن قايتا باستاعان بولاتىن. جۇمىس رەجيمىنە وزگەرىستەر ەنگىزىلىپ، تاۋار تاسىمالداۋدىڭ جاڭا نورمالارى بەكىتىلگەن. قازىرگى كەزدە ۇكىمەتتىڭ قاۋلىسىمەن «قورعاس» حشىو اكىمدىك بالانسىنا بەرىلدى.
جەتىسۋ وبلىسى اكىمىنىڭ ءباسپاسوز قىزمەتى.
