جەتىسۋ وبلىسىندا 2026 جىلعا دەيىنگى ينۆەستيتسيالىق پورتفەلگە قۇنى 1,6 ترلن تەڭگە بولاتىن، 7,1 مىڭ جۇمىس ورنى قۇرىلاتىن 146 جوبا قالىپتاستىرىلدى. وبلىس قۇرىلعاننان بەرى جالپى قۇنى 38 ملرد. تەڭگەلىك، ءبىر مىڭنان استام جۇمىس ورنى بار 47 جوبا ىسكە اسىرىلسا، سونىڭ ىشىندە ىشىندە 1,7 ملرد. تەڭگە 68 جۇمىس ورنى بار 8 جوبا جىل باسىنان بەرى جۇزەگە اسىرىلعان. بۇل تۋرالى بۇگىن جەتىسۋ وبلىسىنىڭ اكىمى بەيبىت يساباەۆتىڭ جۋرناليستەرگە ارناپ وتكىزىلگەن بريفينگىسىندە ايتىلدى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.
ءوز سوزىندە جوبالاردىڭ ىشىندەگى ىرىلەرىنە توقتالىپ وتكەن وبلىس باسشىسى:
- ون جىلدام استام ۋاقىتتان بەرى توقتاپ تۇرعان جوعارى ماركالى كرەمني وندىرەتىن، قۋاتى 6 مىڭ توننالىق «Kazsilicon» زاۋىتى قايتا جاڭعىرتىلىپ، ىسكە قوسىلدى. وعان 3,9 ملرد. تەڭگە ينۆەستيتسيا تارتىلىپ، 210 جۇمىس ورنى اشىلدى. تەكەلى قالاسىندا تەمىردى تىكەلەي قالپىنا كەلتىرەتىن، قۋاتى 20 مىڭ توننالىق «ەلەكترومارگانەتس» زاۋىتى جۇمىس ىستەي باستادى. جاڭعىرتۋدان وتكىزىلگەن اقسۋ قانت زاۋىتى وسى جىلدىڭ تامىز ايىندا ىسكە قوسىلادى دەپ جوسپارلانىپ وتىر، - دەدى ب.يساباەۆ.
بۇدان بولەك، كوكساي كەن ورنى مەن تاۋ كەن بايىتۋ كومبيناتى قۇرىلىسىنىڭ جوباسىن ىسكە اسىرۋ جۇمىستارى باستالدى. كومبيناتتىڭ قۋاتتىلىعى 50 ملن. توننا كەن وڭدەۋگە قاۋقارلى. وعان 976 ملرد. تەڭگە ينۆەستيتسيا تارتىلىپ، 2300 جۇمىس ورنى قۇرىلدى. كومبينات 2026 جىلى ىسكە قوسىلادى.
جەتىسۋ وبلىسى اكىمىنىڭ ءباسپاسوز قىزمەتى.
