تاجىكستان ەۋرازيالىق ەكونوميكالىق ودان قۇرامىنا كىرۋدەن اشىق باس تارتتى، دەپ حابارلايدى "ادىرنا" ۇلتتىق پورتالى.
دۋشانبە بيلىگى ەۋرازيالىق ەكونوميكالىق وداققا (ەاەو) قوسىلۋ جايىنداعى ماسەلەنى قاراستىرمايدى. بۇل تۋرالى 7 ماۋسىم، سارسەنبىدە، تاجىكستان ءسىم-ءنىڭ رەسمي وكىلى شوحين سامادي مالىمدەدى.
مينيستر رەسەي فەدەراتسياسىنىڭ سىرتقى ىستەر ءمينيسترى سەرگەي لاۆروۆتىڭ ءبىر كۇن بۇرىن تاجىكستانعا جاساعان ساپارىن ءسوز ەتە كەلىپ، تاجىكستاننىڭ ەۋرازيالىق وداققا كىرۋگە قۇلشىنىسى جوق ەكەنىن ايتتى.
ەستەرىڭىزگە سالا كەتەيىك، لاۆروۆ ورتالىق ازيانى كرەمل بيلىگى مەن "ۇيىمداسقان باتىستىڭ" قارسىلاسار جاڭا مايدان ايماعى دەپ اتايعان ەدى. ءارى رەسەي سىرتقى ىستەر ءمينيسترى تاجىكستاننىڭ ەاەو مۇشەسى بولاتىنىنا ءۇمىتتى ەكەنىن جەتكىزگەن بولاتىن.
ەۋرازيالىق ەكونوميكالىق وداققا رەسەيدەن باسقا بۇرىنعى كسرو-نىڭ ءتورت ەلى (بەلارۋس، ارمەنيا، قازاقستان جانە قىرعىزستان) كىرەدى.
ورايى كەلگەندە ايتا كەتەيىك، توقاەۆ ەۋرازيالىق ەكونوميكالىق وداق (ەەو) قۇرامىنداعى رەسەي مەن بەلارۋستىن ورنى ەرەكشە ەكەنىن ايتا كەلىپ، بۇل ۇيىمدا قازاقستان، قىرعىزستان جانە ارمەنيا سياقتى ينتەگراتسيانىڭ باسقا دەڭگەيىندەگى مەملەكەتتەر دە بارىن ەسكە سالعان ەدى. بۇعان قاتىستى:
ءبىز نازارعا الۋىمىز كەرەك كونتسەپتۋالدى شىندىق نەمەسە ەرەكشەلىك بار - بۇل بەلارۋس پەن رەسەيدەن تۇراتىن وداق. بۇل وداقتىڭ تۇجىرىمدامالىق جانە يدەولوگيالىق نەگىزى ايتارلىقتاي سالماقتى. بۇل قوعام مويىنداعان ءوزارا مادەني، تىلدىك، ءدىني بىرەگەيلىك. ياعني ءبىر حالىقتىڭ بار ەكەنىن مويىنداۋ، – دەپ ايتقان بولاتىن قاسىم-جومارت توقاەۆ.
ال وزبەكستان بيلىگى مەن تاجىكستان بيلىگى بۇل وتىرىستى سىرتتاي تاماشالعان ەدى.
"ادىرنا" ۇلتتىق پورتالى
