استانا قالاسىنىڭ اكىمى جەڭىس قاسىمبەك ءوزىنىڭ الەۋمەتتىك جەلىدەگى پاراقشاسىندا قالا تۇرعىندارىنا سۋ تاپشىلىعىنا قاتىستى مالىمدەمە جاسادى، دەپ جازادى "ادىرنا" ءتىلشىسى. ۆيدەو الەۋمەتتىك جەلىدە جاريالاندى.
قالا اكىمىنىڭ ايتۋىنشا سۋ تاپشىلىعىنا بىرقاتار ماسەلەلەر سەبەپ بولىپ وتىر. ونىڭ بىردەن-ءبىرى تۇرعىندار سانىنىڭ كوبەيۋى دەيدى اكىم.
"سوڭعى ايدا سۋارۋ جۇمىسى باستالىپ كەتتى. وتكەن اپتادا بولعان +30 گرادۋستان اساتىن اپتاپ ىستىق وسى اپتادا دا جالعاسادى دەپ بولجانىپ وتىر. بۇگىن دە وزدەرىڭىز جاقسى بىلەسىزدەر، كۇن رايى +30 گرادۋستان اسىپ تۇر. وسىدان 2 جىل بۇرىن اكىمدىك ەكى جاڭا نىساننىڭ قۇرىلىسىن باستاعان. ءبىرىنشى نىسان – قازىر وزدەرىڭىز كورىپ وتىرعانداي، مىناۋ سورعى ستانتسياسى. بۇل نىساننىڭ قۇرىلىسى وسى ايدىڭ سوڭىنا دەيىن تولىعىمەن بىتەدى جانە قالاعا قاجەتتى كۇنىنە 25 مىڭ كۋبومەتر سۋ بەرىلەتىن بولادى. ەكىنشى نىسان – سۋ قۇبىرى، ياعني استانا سۋ قويماسىنان قالاعا كەلەتىن سۋ قۇبىرى. بۇل نىسان دا اياقتالىپ قالدى. كەلەسى اپتادا تولىعىمەن قۇرىلىس جۇمىسى بىتەدى جانە قالاعا قاجەتتى سۋ قىسىمى بەرىلەتىن بولادى. سونىمەن، ءبىر ايدىڭ ىشىندە بۇگىنگى سۋ تاپشىلىعى ماسەلەسى تولىعىمەن شەشىلەدى. ال تامىز ايىندا بۇل ستانتسيانىڭ ەكىنشى كەزەڭىنىڭ قۇرىلىسى بىتەدى. تيىسىنشە قالاعا كۇنىنە قوسىمشا 85 مىڭ كۋبومەتر سۋ بەرىلۋ مۇمكىندىگى پايدا بولادى. بۇل الداعى 3-4 جىلعا جەتكىلىكتى" دەپ جازدى ول پاراقشاسىندا.
"ادىرنا" ۇلتتىق پورتالى
