ءماجىلىس دەپۋتاتى ماقسات تولىقباي جاركەنتتەگى بالالارعا قاتىستى رەزونانس جاعدايعا بايلانىستى اكەسىنە كومەك كورسەتۋگە دايىن ەكەنىن ايتتى، دەپ حابارلايدى "ادىرنا" ۇلتتىق پورتالى كۋرسيۆكە سىلتەپ.
جەلىدە بالاسىن ۇرعان ايەلدىڭ بەينەسى تاراپ، انا قاماۋعا الىنعان. ال بالالاردىڭ اكەسىنە الداعى 10–15 كۇندە تۇراقتى باسپانا تابىلماسا، بۇلدىرشىندەر مەملەكەت قورعاۋىنا وتەدى.
دەپۋتاتتىڭ ايتۋىنشا، اكەسى بالالارىن اسىراپ، تاربيەلەگىسى كەلەدى، بىراق قازىرگى ۋاقىتتا باسپاناسى جوق، ال قارا جۇمىسقا دەنساۋلىعى مۇمكىندىك بەرمەيدى. ماقسات تولىقباي جەرگىلىكتى اكىمدىكپەن بايلانىسىپ، بارىنشا قولداۋ كورسەتۋگە تىرىساتىنىن جەتكىزدى.
«وبال عوي، ءوزى باعىپ-وسىرگىسى كەلەدى، ال وعان باسپاناڭ بولۋى كەرەك دەگەن تالاپ قويىپ جاتىر. جاركەنتتىڭ وزىندە جانى اشيتىن، كاسىپتە جۇرگەن ازاماتتار جوق پا؟ بالاسىن اسىراي الاتىنداي جاعدايعا جەتكىزىپ، ءبىر جاتاقحانا بولسىن تاۋىپ بەرەر»، – دەدى دەپۋتات.
ايتا كەتەيىك، بۇل وقيعا 17 قاڭتاردا جەتىسۋ وبلىسى، پانفيلوۆ اۋدانىنا قاراستى جاركەنت قالاسىندا ورىن العان. وبلىستىق پوليتسيا كامەلەت جاسقا تولماعان بالاعا قول كوتەرگەن انانىڭ ۇستىنەن قىلمىستىق ءىس قوزعادى.
