ونىڭ پىكىرىنشە، نۇرسۇلتان نازارباەۆتىڭ "ۇلت كوشباسشىسى" رەتىندە مارتەبەسى بۇعان دەيىن انىقتالعان، ال قازىرگىسى سول زاڭنىڭ اياسىندا جاسالعان تەحنيكالىق قادام عانا.

"وتكەن جىلى جازدا زاڭ قابىلداندى. قاۋىپسىزدىك كەڭەسى تۋرالى زاڭ. ونىڭ توراعاسى بولىپ نۇرسۇلتان نازارباەۆ سايلانعان بولاتىن. وندا دا ءومىر باقيلىققا. ال كونستيتۋتسيالىق ورگان بولىپ تابىلاتىن بۇل كەڭەس بيلىكتىڭ بارلىق تارماعىن باقىلاپ، جونگە كەلتىرىپ وتىرادى. ونىڭ سونداي قۇزىرەتى بار. دەمەك وسىعان دەيىن قازاقستاندى نازارباەۆ باسقارسا، ەندى نازارباەۆ ۇجىمى باسقارادى",- دەيدى ساياساتتانۋشى.

ول بۇل جايتتىڭ ساياسي جۇيەگە ەلەۋلى وزگەرىستەر اكەلە قويمايدى دەپ بولجايدى.

"زاڭ بويىنشا پرەزيدەنت وكىلەتتىگىن توقتاتسا، سەنات باسشىسى بۇل ءىستى ءوز قولىنا الادى. توقاەۆتىڭ ۋاقىتشا پرەزيدەنت مىندەتىن اتقارۋى، وسى جاعىنان العاندا، زاڭدى. مۇندايدى، مىسالى يران تاجىريبەسىنەن بايقاۋعا بولادى. وندا پرەزيدەنت ەمەس، رۋحاني كوشباسشى ءبارىن باسقارادى. سول سەكىلدى بىزدەگى بيلىكتىڭ تىزگىنى ەندى پرەزيدەنتتە ەمەس، ۇلت كوشباسشىسىندا بولادى", - دەيدى ول.

ال قازىر بوساپ قالعان پرەزيدەنت كرەسلوسىنان ساياساتتانۋشى داريعا نازارباەۆانى كورەتىنىن ايتادى.

"سوڭعى كەزدەرى ەلباسى داريعا نازارباەۆانى كوپتەگەن شەتەلدىك ساپارىندا بىرگە ەرتىپ ءجۇردى. ترامپەن دە تانىستىردى. مەنىڭشە، مۇنىڭ ءبارى كەزدەيسوقتىق ەمەس. مۇمكىن پرەزيدەنتتىككە قىزى كەلىپ قالاتىن شىعار. بولماسا ۋاقىتشا تاعايىندالعان توقاەۆتىڭ قايتا سايلانۋى مۇمكىن. ويتكەنى ول شەتەل مويىنداعان ەلباسىعا وتە جاقىن ادام", - دەيدى ول.

ايتا كەتسەك، قاۋىپسىزدىك كەڭەسى 1991 جىلى ەل تاعدىرىنا بايلانىستى ماڭىزدى ماسەلەلەر شەشىلەتىن كونسۋلتاتيۆتى-كەڭەسشى ورگان بولىپ قۇرىلعان. ول 1993 جىلى قر قاۋىپسىزدىك كەڭەسى بولىپ قايتا قۇرىلدى. ال 2018 جىلى 31 مامىردا قابىلدانعان زاڭعا سايكەس،  قاۋىپسىزدىك كەڭەسىنىڭ مارتەبەسى قايتا قارالىپ، ول كونسۋلتاتيۆتى-كەڭەسشى ورگاننان كونستيتۋتسيالىق ورگانعا اينالدى. ونىڭ ومىرباقي توراعاسى بولىپ نۇرسۇلتان نازارباەۆ بەكىتىلگەن.