ياكۋتسك رەسپۋبليكاسىنىڭ استاناسى ساحا قالاسىندا كەشەدەن بەرى مىڭداعان ادامنىڭ قاتىسۋىمەن ميتينگ وتۋدە. جەرگىلىكتى تۇرعىن ايەلدى قىرعىزستاننان كەلگەن ميگرانت زورلادى دەپ كۇدىكتەلىپ، تۇتقىندالعان بولاتىن. بۇنىڭ ارتى نارازىلىق ميتينگىسىنە ۇلاسىپ، جەرگىلىكتى تۇرعىندار ميگرانتتاردى ەلدەن شىعارۋدى تالاپ ەتۋدە.
جينالعاندار الدىندا ياكۋتيانىڭ باسشىسى ايسەن نيكولاەۆ ءسوز سويلەدى. ول قىلمىسكەردى زاڭعا سايكەس جازالايتىنىن مالىمدەدى. الداعى ناۋرىز جانە ءساۋىر ايلارىندا ەلگە كەلۋشى ميگرانتتاردى جاپپاي تەكسەرىپ، كوشى-قون رەجيمىن بۇزۋشىلاردى دەپورتاتسيالاناتىنىن ايتتى. بۇل جاعدايدا رەسمي وكىل زورلىق-زومبىلىققا جول بەرمەۋدى ءوتىندى.
ياكۋتيانىڭ باسشىسى ميتينگكە جينالعان ياكۋتسك تۇرعىندارىنىڭ اشۋىن تۇسىنەتىنىن ايتتى. «17 ناۋرىزدىڭ ءتۇنى ياكۋتسكتە بولعان بۇل قىلمىس ءبارىمىزدى تاڭ قالدىردى. ياكۋتسك قالاسىنىڭ تۇرعىنى، قىزىمەن عانا تۇراتىن جالعىز باستى ايەلدى جۇمىستان كەيىن ۇيىنە ورالعاندا ءۇيدىڭ اۋلاسىندا بەلگىسىز بىرەۋلەر ماشيناعا كۇشتەپ كىرگىزىپ، الىپ كەتىپ زورلاعان. قۇقىق قورعاۋ ورگاندارى جەدەل جۇمىس ىستەدى، بارلىق ءۇش كۇدىكتى ۇستالدى «، - دەدى نيكولاەۆ.
ونىڭ ايتۋىنشا، ياكۋتيا - 120-دان استام ۇلت وكىلدەرى تۇراتىن كوپ ۇلتتى رەسپۋبليكا، سوندىقتان ەتنيكاارالىق قاقتىعىستى تۋدىرۋعا ەمەس، تۇرعىنداردى زاڭسىز كوشى-قونمەن كۇرەسۋگە شاقىردى.
ساحا رەسپۋبليكاسى قوعامدىق پالاتاسى تۇرعىنداردى ارانداتۋلارعا ۇشىراماۋدى، تىنىشتىق ساقتاۋدى جانە شاپشاڭ ارەكەتتەرگە جول بەرمەۋدى سۇرادى. «قىلمىسكەردە ۇلت بولمايدى، ال قىلمىستىڭ ارەكەتىن باعالاۋ قولدانىستاعى زاڭنامانىڭ شەڭبەرىندە بەرىلەتىنىنە سەنىمدىمىز»، - دەلىنگەن حابارلامادا.
17 ناۋرىزدا بولعان وقيعادان سوڭ اشۋلى جەرگىلىكتى تۇرعىندار ميگرانتتاردى كوشەدە ءوز بەتىنشە جازالاماققا كوشكەن. اۆتوبۋس جۇرگىزۋشىلەرى مەن جەمىس-جيدەك، كوكونىس ساتاتىن ميگرانتتار كوشەگە شىعا الماي قالعان.
ياكۋتياداعى جاعدايعا وراي قىرعىزستان شۇعىل تۇردە وكىلدەرىن اتتاندىردى. قىرعىزستاننىڭ ىشكى ىستەر مينيسترلىگىنىڭ رەسەيدەگى وكىلى، ۆيتسە-كونسۋل داستان نيازاليەۆ، رەسەيدەگى قىرعىز دياسپوراسىنىڭ كوشباسشىسى جازبەك بەكبوليەۆ جانە كوشى-قون قىزمەتىنىڭ باسشىسىنىڭ ورىنباسارى سامات توقتوبولوتوۆ ياكۋتياداعى قىزۋ جاعدايدى تالقىلاۋدا.
"ادىرنا" ۇلتتىق پورتالى
