تارازدا قازاقستان رەسپۋبليكاسىنىڭ التىنشى جازعى سپارتاكياداسىنىڭ سالتاناتتى تۇردە رەسمي اشىلۋى ءوتتى.
ورتالىق ستاديوندا وتكەن اۋقىمدى شاراعا قۇرمەتتى قوناقتار جانە كوپشىلىكپەن بىرگە قر مادەنيەت جانە سپورت ءمينيسترى اسحات ورالوۆ، وبلىس اكىمى نۇرجان نۇرجىگىتوۆ قاتىستى.
تارازدىڭ تەرەڭ تاريحى سىر شەرتكەن «كونە تاراز» بەينەروليگى، «بابالار رۋحى» داۋىلپازدار قويىلىمدارى جينالعاندارعا ەرەكشە اسەر سىيلادى.
بۇدان سوڭ ورتاعا سپارتاكيادانىڭ تۋى شىعارىلدى.
قر مادەنيەت جانە سپورت ءمينيسترى اسحات ورالوۆ ءتورت جىلدا ءبىر وتەتىن شارانىڭ ماڭىزدىلىعىن اتاپ ءوتىپ، بارشا جينالعانداردى قۇتتىقتاپ، قاتىسۋشىلارعا ساتتىلىك تىلەدى.
سونداي-اق، مينيستر مەملەكەت باسشىسىنىڭ قولداۋىمەن بۇگىندە ەل سپورتىنىڭ قارقىندى دامىپ كەلە جاتقانىن، ول ءۇشىن بارلىق ءتيىستى جاعدايلار جاسالۋدا ەكەنىن اتاپ ءوتتى.
- قازاقستان رەسپۋبليكاسىنىڭ سپارتاكياداسى - ءتورت جىلدا ءبىر رەت وتكىزىلەدى. بۇگىنگى جارىسقا ەلىمىزدىڭ بارلىق وڭىرىنەن 1000-نان استام سپورتشى قاتىسىپ وتىر. بۇل بايراقتى باسەكە ەل تاريحىنداعى ەلەۋلى وقيعا.
سپارتاكيادانىڭ نەگىزگى ماقساتى – قازاقستان رەسپۋبليكاسىنىڭ جازعى سپورت تۇرلەرى بويىنشا ۇلتتىق قۇراما كوماندالارىنا ەڭ مىقتى سپورتشىلاردى جاساقتاۋ جانە حالىقارالىق رەسمي جارىستارعا، ونىڭ ىشىندە پاريجدە وتەتىن 2024 جىلعى جازعى وليمپيادا ويىندارىنا ليتسەنزيالىق جارىستارعا قاتىسۋعا ۇمىتكەرلەردى انىقتاۋ.
وزدەرىڭىز بىلەسىزدەر، ەلىمىزدە جاستاردىڭ سپورتپەن جانە دەنە شىنىقتىرۋمەن اينالىسۋى ءۇشىن بارلىق جاعداي جاسالىپ، پرەزيدەنتتىڭ تىكەلەي تاپسىرمالارىمەن قولداۋ تاۋىپ كەلەدى.
سونىڭ ناتيجەسىندە، ەل سپورتشىلارى نەبىر حالىقارالىق ءدۇبىرلى دودالاردا توپ جارىپ، ۇلت ابىرويىن اسقاقتاتىپ ءجۇر. ولار وسكەلەڭ ۇرپاققا ۇلگى-ونەگە بولىپ، جاستاردى جارقىن جەڭىستەرگە جەتەلەيدى.
وسى مۇمكىندىكتى پايدالانا وتىرىپ، سپارتاكيادانىڭ وتكىزۋىنە ەرەكشە قولداۋ بىلدىرگەندەرى ءۇشىن جامبىل وبلىسىنىڭ اكىمدىگىنە، تۇرعىندارىنا زور العىسىمدى بىلدىرەمىن،-دەدى اسحات ورالوۆ.
سونداي-اق، مينيستر جاقىندا عانا تاشكەنت قالاسىندا وتكەن بوكستان الەم چەمپيوناتىندا جەڭىسكە جەتكەن سپورتشىلاردىڭ جەكە جاتتىقتىرۋشىلارىنا قازاقستان رەسپۋبليكاسىنىڭ پرەزيتەنتى قاسىم-جومارت توقاەۆتىڭ قۇرمەت گراموتاسىن تابىستادى.
ال جامبىل وبلىسىنىڭ اكىمى نۇرجان نۇرجىگىتوۆ ءتورت جىلدا ءبىر وتەتىن شارانىڭ سالتاناتتى اشىلۋى كيەلى تاراز تورىندە ءوتۋى مەرەيلى مارتەبە ەكەندىگىن جەتكىزدى.
- سپورت – دەنساۋلىقتىڭ كەپىلى، دوستىقتىڭ بەرىك تۇتقاسى. دەنى ساۋ جاستارىمىز – ەگەمەن ەلىمىزدىڭ ەرتەڭگى تىرەگى، تۇتقاسى! بۇل باعىتتا وڭىرىمىزدە كوپتەگەن اۋقىمدى سپورتتىق شارالار ۇيىمداستىرىلۋدا.
بۇگىنگى 4 جىلدا ءبىر وتەتىن ءداستۇرلى سپارتاكيادانىڭ باستى ماقساتى – بۇقارالىق سپورتتى دامىتۋ، سالاۋاتتى ءومىر سالتىن قالىپتاستىرۋ، دەنە شىنىقتىرۋ مەن سپورتتى ناسيحاتتاۋ.
سپارتاكيادانىڭ اشىلۋ سالتاناتىنىڭ كيەلى جامبىل جەرىندە ءوتۋى ءبىز ءۇشىن زور ماقتانىش، مەرەيلى مارتەبە.
تاراز توپىراعى – تالاي تالانتتى سپورتشىلاردىڭ توماعاسىن سىپىرىپ، تۇلەتكەن قاسيەتتi مەكەن. بۇل تۇرعىدان ءبىز وليمپيادا جۇلدىزدارىمەن ماقتانا الامىز، ولاردىڭ جەڭىستى جولى – جاس ۇرپاققا ۇلگى.
بۇگىنگى سپورتتىق شاراعا قاتىسۋشى بارلىق سپورتشىلار مەن جاتتىقتىرۋشىلارعا ساتتىلىكتەر تىلەيمىن،-دەي كەلە وبلىس اكىمى سپارتاكيادانى اشىق دەپ جاريالادى.
بۇدان سوڭ سپارتاكيادانىڭ الاۋى جاعىلىپ، تورەشى، سپورتشى، جاتتىقتىرۋشىلاردىڭ انت بەرۋ ءراسىمى ءوتتى.
سالتاناتتى شارا ەسترادا جۇلدىزدارىنىڭ جانە جەرگىلىكتى ونەرپازداردىڭ قاتىسۋىمەن كونتسەرتتىك باعدارلاماعا جانە مەرەكەلىك وتشاشۋعا ۇلاستى.
"ادىرنا" ۇلتتىق پورتالى
