رەسەي اسكەرلەرى گرۋزيانىڭ اۋماعىنا باسا-كوكتەپ كىردى.
جەرگىلىكتى تۇرعىندار ۇرەي قۇشاعىندا. رەسەي اسكەري قىزمەتشىلەرى گرۋزين-وسەتين قاقتىعىس ايماعىنىڭ ءبولۋ سىزىعىندا ورنالاسقان حۋرۆالەتي اۋىلىنا كىردى.
بۇل تۋرالى وككۋپاتسياعا قارسى قۇرىلعان "كۇش بىرلىكتە" قوزعالىسىنىڭ كوشباسشىسى داۆيد كاتساراۆا مالىمدەدى، دەپ حابارلايدى "ەحو كاۆكازا". ونىڭ ايتۋىنشا، قازىر حۋرۆالەتيگە بەلسەندىلەر جىبەرىلەدى. وسى شۇعىل اقپاراتتى الەۋمەتتىك جەلىلەردەگى جەرگىلىكتى تۇرعىندار راستاپ، رەسەيلىك اسكەريلەر اۋىلدىڭ ءبىر بولىگىن العاندىعىن اتاپ ءوتتى.
بۇل رەتتە گرۋزين پوليتسياسى وقيعا اۋماعىنا بارلىق ءوتۋ جولدارىن جاۋىپ، جاعدايعا تۇسىنىكتەمە بەرۋدەن باس تارتىپ، جۋرناليستەر مەن جينالعان ازاماتتاردى اۋىل جاعىنا جىبەرمەي تۇر.
جەرگىلىكتى تۇرعىندار اۋىلداعى جاعداي شيەلەنىسىپ تۇرعانىن حابارلادى. رەسەي اسكەريلەرى ءبولۋ سىزىعىن كەسىپ ءوتىپ، ادامداردى ءوز ۋچاسكەلەرىنە جىبەرمەي جاتىر دەيدى. سونىمەن قاتار، رەسەيلىك اسكەرلەردىڭ قوزعالىسى اتوتسي اۋىلىندا دا بايقالدى.
گوري مۋنيتسيپاليتەتىنىڭ مەرى كونستانتين ءتاۆزاراشۆيليدىڭ ايتۋىنشا، بەتپەردە كيگەن اسكەريلەر گرۋزيانىڭ ورتالىق بيلىگىنىڭ باقىلاۋىنداعى اۋماقتا ورنالاسقان.
"ازىرگە ولاردىڭ پايدا بولۋ سەبەبى بەلگىسىز. وقيعا ورنىندا گرۋزين قۇقىق قورعاۋشىلارى بار", - دەدى تاۆزاراشۆيلي.
بۇعان دەيىن حۋرۆالەتي اۋىلىندا ءوزىن-ءوزى جاريالاعان وڭتۇستىك وسەتيا رەسپۋبليكاسى تاراپىنان رەسەيلىك اسكەري قىزمەتشىلەرگە مۇناراسى بار باقىلاۋ بەكەتىن ورناتقان بولاتىن.
"ادىرنا" ۇلتتىق پورتالى
