وڭتۇستىك ءوڭىر تۇرعىندارى سولتۇستىكتەگى تىرشىلىكتى كورىپ، جاي-جاپسارىمەن تانىسۋ ءۇشىن جولعا شىقتى. جولاۋشىلار قاتارىندا جۋرناليستەر، قوعام بەلسەندىلەرى مەن ءوڭىر تۇرعىندارى بار، دەپ حابارلايدى "ادىرنا" ۇلتتىق پورتالى.
تەرىسكەيگە اتتانعان جولاۋشىلار 13 اۋداندى ارالاپ، كوپشىلىكتى جەرگىلىكتى حالىقتىڭ تىنىس-تىرشىلىگىمەن تانىسۋدى جوسپارلاپ وتىر.
كوش قاتىسۋشىلارىن «AMANAT» پارتياسى تۇركىستان وبلىستىق فيليالىنىڭ توراعاسى التىنسارى ۇمبەتاليەۆ، «Tauekel» ۇيىمىنىڭ توراعاسى بۋراحان داقانوۆ جانە بىرقاتار وبلىستىق ءماسليحات دەپۋتاتتارى سالتاناتتى تۇردە شىعارىپ سالدى.
«جالپى، تەرىسكەيگە باراتىن تۇركىستاندىقتاردى جارلى، كومەك قاجەت ەتەتىن ادامدار دەگەن ستەرەوتيپتەن ارىلۋىمىز كەرەك. بۇل ءوڭىر تۇرعىندارى - كومەك الۋشى ەمەس، قازاقتى قۇتقارۋشى ازاماتتار. سولتۇستىككە كوش - ەلىمىزدىڭ بەكەمدىگى ءۇشىن وتە قاجەت شارا. ەلىمىزدەگى 3,2 ملن جۋىق وقۋشىنىڭ 530 مىڭى تۇركىستان وبلىسىندا ەكەن. سولتۇستىكتەگى اۋىلداردا جابىلايىن دەپ تۇرعان مەكەمەلەردى امان الىپ قالاتىن وسى ايماقتىڭ ازاماتتارى دەر ەدىم. سوندىقتان دا ەلىم-جەرىم دەگەن ءوڭىر تۇرعىندارى ەل ىرگەسىن بەكەمدەۋ ءۇشىن تەرىسكەيگە كوشىپ بارۋى كەرەك»، — دەيدى «Tauekel» ۇيىمىنىڭ توراعاسى بۋراحان داقانوۆ.
قازاقپاراتتىڭ حابارلاۋىنشا, اتالعان باعدارلاما بويىنشا 2015-2022 جىلدار ارالىعىندا وڭتۇستىكتەن سولتۇستىككە 11 892 ادام قونىس اۋدارعان.
2022 جىلدىڭ قورىتىندىسىمەن رەسپۋبليكا بويىنشا 6 587 كۆوتا بەلگىلەنسە، ونىڭ 32,3% تۇركىستان وبلىسىنىڭ تۇرعىندارىنا بەرىلدى.
بۇل كورسەتكىش الدىڭعى جىلدارمەن سالىستىرعاندا 3 ەسە كوپ.
ال، بيىل جىل باسىنان بەرى تۇركىستان وبلىسىنان 34 وتباسى، ونىڭ ىشىندە 79 ادام سولتۇستىككە قونىس اۋدارعان.
"ادىرنا" ۇلتتىق پورتالى
