ماسكەۋ قالاسى اكىمى تۇرعىن ۇيلەردىڭ "تارس توبەسىنەن تۇسكەن" شابۋىلدىڭ بولعانىن الگىندە عانا راستادى. مۇنداي شابۋىلدار قالانىڭ وڭتۇستىك-باتىسىندا بولعان. رەسەيدىڭ قورعانىس مينيسترلىگىنىڭ حابارلاۋىنشا ۇشۋدا ۇشقىشتى قاجەت ەتپەيتىن مۇنداي 8 قۇرىلعى ماسكەۋ اسپانىن بۇركەگەن. مۇنداي حابار كيەۆتى ءۇش كۇن قاتارىنان اتقىلاپ جاتقان كەزدە كەلىپ جەتتى.
ەستەرىڭىزگە سالا كەتەيىك، دروندار ماسكەۋ اسپانىن العاشقى رەت تورۋىلداپ وتىرعان جوق. مامىر ايىنىڭ باسىندا دروندار كرەملگە قارسى باعىتتالعان ەدى. وقيعاعا قاتىستى وزگە دە دەرەكتەر جايلى "ادىرنا" ۇلتتىق پورتالى جازادى.
ۇشقىشسىز ۇشاتىن قۇرىلعىلار ماسكەۋ مەن ماسكەۋ تۇبەگىنە شابۋىلداعان.
فوتو: الەۋمەتتىك جەلىلەردەن
ماسكەۋ اكىمى سەرگەي سوبيانين تاڭسارىمەن قالاعا ۇشقىشسىز ۇشاقتار شابۋىل جاساپ، بىرنەشە عيماراتتى زاقىمداعانىن ايتتى.
ء"بارى ءدىن-امان. قازىرگى ۋاقىتتا ەشكىم قاتتى زارداپ شەككەن جوق. تەك رەسمي دەرەككوزدەرگە سەنىڭىزدەر. تەكسەرىلمەگەن اقپاراتتى تاراتپاۋىڭىزدى سۇرايمىن", - دەپ جازدى سوبيانين.
ونىڭ ايتۋىنشا، قاۋىپسىزدىك ماقساتىمەن ەكى تۇرعىن ءۇيدىڭ تۇرعىندارى ەۆاكۋاتسيالاندى.
سونىمەن قاتار، ماسكەۋدەگى دەپترانس ۋدالتسوۆ كوشەسىنىڭ ءبىر بولىگى، لەنين داڭعىلىنان ميحايل پەۆتسوۆ كوشەسىنە دەيىنگى جولدىڭ جابىلعانى حابارلاندى.
ۇشاقتار ماسكەۋدەگى ءۇش تۇرعىن ۇيگە شابۋىل جاسادى. اتاپ ايتقاندا:
- "كاسىپوداق" كوشەسىندەگى توقسان سەگىزىنشى ءنومىرلى تۇرعىن ءۇيدىڭ 16 قاباتىنا درون قۇلادى. ءۇيدىڭ قابىرعاسى قيراپ، اينەكتەرى سىنعان. ءۇيدىڭ كىرەبەرىس بولىگىندەگى تۇرعىندار ەۆاكۋاتسيالاندى.
- لەنين داڭعىلىنىڭ بويىنداعى كوپقاباتتى ءۇيدىڭ بىرىنە درون باعىتتالعان. Baza تەلەگراممالارىنىڭ حابارلاۋىنشا، درون 14 قاباتتى پاتەرگە ۇشىپ جەتتى، بىراق جارىلعان جوق.
- جاڭا ماسكەۋ، اتلاسوۆ كوشەسىنىڭ بويىنداعى تۇرعىن ءۇيدىڭ ىشىنە قۇرىلعى كىرگەن. ناتيجەسىندە، 24 قاباتتى ۇيدە جارىلىس بولدى. بۇل حاقىندا رەسەي تجم-cى مالىمدەدى.
فوتو: "24 كانال"
سونىمەن قاتار، ماسكەۋ وبلىسىنىڭ ودينتسوۆو مەن كراسنوگورسك، جاڭا ريگا مەن بارۆيحا ايماعىندا دا جارىلىس داۋىسى ەستىلدى.
- ماسكەۋ وبلىسىنىڭ گۋبەرناتورى اندرەي ۆوروبەۆتىڭ ايتۋىنشا، اۋە قورعانىسى اسپانداعى درونداردى دەر كەزىندە انىقتاي العان. ولاردىڭ بىرنەشەۋى ماسكەۋگە ۇشىپ بارا جاتقان جەرىنەن اتىپ تۇسىرىلگەن.
- "Baza" تەلەگرام-كانالىنىڭ مالىمەتى بويىنشا، بۇگىن تاڭەرتەڭ ماسكەۋ وبلىسىندا 10-نان استام دروندار اتىپ ءتۇسىرىلدى، ولاردىڭ كوپشىلىگى يسترا، كراسنوگورسك جانە ودينتسوۆ اۋداندارىندا "قۇرىققا تۇسكەن".
سونىمەن قاتار، "Baza" تاڭەرتەڭگى شابۋىلعا شىققان درونداردىڭ سانى جيىرما بەس بولعانىن جازدى. ولاردىڭ ءبىر بولىگى جەر باۋىرلاي ۇشىپ، اعاشتار مەن سىمدارعا ىلىنگەن.
Report ارناسى ەكى ادامنىڭ مەديتسينالىق كومەككە جۇگىنگەنىن قوسا ايتتى.
ال، ماسكەۋ قالاسىنىڭ اكىمى سوبيانين جەرگىلىكتى جەرلەردە جەدەل-جاردەم قىزمەتىنىڭ جۇمىس ىستەپ جاتقاندىعىن جەتكىزىپ، الاڭداۋعا نەگىز جوق ەكەندىگىن العا تارتىپ وتىر.
"ادىرنا" ۇلتتىق پورتالى
