مەملەكەتتىك كەڭەسشى ارنايى قاتىستى. V رەسپۋبليكالىق يمامدار فورۋمى

2061
Adyrna.kz Telegram

29 مامىر استانا قالاسىندا «يمام – ىزگى قوعام جارشىسى» تاقىرىبىندا ۇيىمداستىرىلعان V رەسپۋبليكالىق يمامدار فورۋمى ءوتتى.

فورۋمعا  قازاقستان رەسپۋبليكاسىنىڭ مەملەكەتتiك كەڭەسشىسى ەرلان قارين، اقپارات جانە قوعامدىق دامۋ ءمينيسترى دارحان قىدىرالى، قازاقستان مۇسىلماندارى ءدىني باسقارماسىنىڭ توراعاسى، باس ءمۇفتي ناۋرىزباي قاجى تاعانۇلى، عۇلامالار، ساراپشىلار كەڭەسىنىڭ مۇشەلەرى، مەدرەسە-كوللەدج بەن قاريلار ورتالىعىنىڭ ديرەكتورلارى، سونداي-اق ەلىمىزدىڭ ءار ايماعىنان كەلگەن 350 يمام قاتىستى.

قازاقستان رەسپۋبليكاسىنىڭ مەملەكەتتىك كەڭەسشىسى ەرلان قارين قوعامداعى يمامداردىڭ ءرولىن ايرىقشا اتاپ ءوتتى.

”يمام – حالىقتى بىرلىككە ۇندەيتىن، قوعامدى مەيىرىمدىلىككە شاقىراتىن تۇلعا. ادامداردىڭ كوكىرەگىنە ىزگىلىكتىڭ ءدانىن سەۋىپ، جۇرتشىلىقتى جاقسىلىققا ناسيحاتتايدى. سوندىقتان يمامداردىڭ ەل ىشىندەگى ورنى ەرەكشە. سوعان سايكەس، ولارعا ارتىلاتىن جاۋاپكەرشىلىك تە زور.

يمام مەن جاماعاتتىڭ اراسىندا ءوزارا تۇسىنىستىك، ىنتىماق پەن قۇرمەت بولسا، وندا قوعامنىڭ تۇراقتىلىعى دا بەكي تۇسەدى. جۇرت اراسىندا جۇرگەندە يمامدارمەن ءجيى جولىعىسىپ جاتامىز. سول كەزدە «جاماعاتىڭىز قالاي؟» دەگەن سۇراق قويامىز. سوندا بايقاعانىم، بۇگىندە يمامدار جاماعاتتارى جايىندا ايتقاندا ەرەكشە مەيىرلەنىپ كەتەدى. مەشىتكە كەلۋشىلەردىڭ ءبىر-بىرىنە كومەك قولىن سوزىپ جاتقانىن، سۇرىنگەندى دەمەيتىن ىنتىماعى بار ەكەنىن ايتادى.

بۇل ەل بىرلىگىندە جاڭا ىرگەتاس قالىپتاسىپ جاتقانىن كورسەتەدى. حالىقتىڭ ءبىر-بىرىنە شاراپاتىن تيگىزىپ، اۋىزبىرشىلىكتە ءومىر ءسۇرىپ جاتقانىن ناقتىلايدى. وسىعان قاراپ، ءمۇفتيات پەن يمامداردىڭ جۇمىسى تابىستى ىسكە اسىپ جاتقانىنا كۋا بولامىز”، - دەدى مەملەكەتتىك كەڭەسشى.

سونداي-اق، يمامدار فورۋمىنىڭ ۇندەۋى قابىلداندى. ۇندەۋدى قمدب ۋاعىز-ناسيحات ءبولىمىنىڭ مەڭگەرۋشىسى باتىرجان مانسۇروۆ وقىدى.

ء”بىز، ءدىن جانە قوعام قايراتكەرلەرى، زيالى قاۋىم وكىلدەرى، قازاقستان مۇسىلماندارى ءدىني باسقارماسى جانىنداعى عۇلامالار كەڭەسىنىڭ مۇشەلەرى، «يمام – ىزگى قوعام جارشىسى» V رەسپۋبليكالىق يمامدار فورۋمىنىڭ قاتىسۋشىلارى فورۋمدا قابىلدانعان «قازاقستان مۇسىلماندارى ءدىني باسقارماسىنىڭ رۋحاني ء(دىني جانە ۇلتتىق) قۇندىلىقتاردى ناسيحاتتاۋداعى ءرولى»، «يمامنىڭ جاماعات نامازىن وتكىزۋ ءتارتىبى»، «قاجىنىڭ رۋحاني كەلبەتى» قۇجاتتارىن ءبىراۋىزدان قولدايمىز.

فورۋمدا قابىلدانعان قۇجاتتاردى ىجداھاتتىلىقپەن ەل اراسىندا، جاماعات ىشىندە ناسيحاتتاۋ اسا ماڭىزدى ءىس دەپ سانايمىز. ءدىني جانە ۇلتتىق قۇندىلىقتاردى دارىپتەۋدە، ءدىني قۇلشىلىقتاردى شاريعات تالابىنا ساي اتقارۋ ىسىندە، ءدىني راسىمدەردى بىرىزدىلىكپەن وتكىزۋدە ءدىن قىزمەتكەرلەرىنىڭ ءرولى مەن جاۋاپكەرشىلىگى اسا زور دەپ بىلەمىز. وسى رەتتە تومەندەگىدەي ۇسىنىستاردى قولداۋعا ۇندەيمىز:

بىرىنشىدەن، اتا-بابالارىمىزدان كەلە جاتقان ءدىني جانە ۇلتتىق قۇندىلىقتاردى ەل اراسىندا بەلسەندى تۇردە ناسيحاتتاۋعا.

ەكىنشىدەن، قازاقستان مۇسىلماندارى ءدىني باسقارماسىنا قاراستى بارلىق مەشىتتەردە بەس ۋاقىت ناماز، ەكى ايت، قاسيەتتى جۇما جانە تاراۋىق نامازى سىندى قۇلشىلىقتاردى بىرىزدىلىكپەن وتكىزۋگە، جاماعات اراسىندا تۇسىنىسپەۋشىلىككە جول بەرمەۋگە جانە بابالار سالعان ءدىني مەكتەپتى دامىتۋعا.

ۇشىنشىدەن، بەس پارىزدىڭ ءبىرى قاجىلىق قۇلشىلىعىن وتەپ كەلگەن وتانداستارىمىزدى قوعامدا كوركەم مىنەزىمەن، ونەگەلى ىستەرىمەن ۇلگى كورسەتۋگە جانە قاجى دەگەن قۇرمەتكە لايىقتى بولۋعا شاقىرامىز”، دەلىنگەن ۇندەۋدە.

فورۋمدا مەملەكەت باسشىسى قاسىم-جومارت كەمەلۇلىنىڭ قۇتتىقتاۋ حاتىن جولداندى. پرەزيدەنتتتىڭ قۇتتىقتاۋ حاتىن قازاقستان رەسپۋبليكاسىنىڭ مەملەكەتتiك كەڭەسشىسى ەرلان قارين وقىپ بەردى.

”قادىرلى قاۋىم! ارداقتى اعايىن! بارشاڭىزدى «يمام – ىزگى قوعام جارشىسى» اتتى يمامداردىڭ V رەسپۋبليكالىق فورۋمىنىڭ باستالۋىمەن شىن جۇرەكتەن قۇتتىقتايمىن!

يسلام – رۋحانياتىمىزدىڭ تىرەگى. اتا ءدىنىمىز ىزگىلىك پەن ادامگەرشىلىككە، جاناشىرلىق پەن جاسامپازدىققا نەگىزدەلگەن. وسىنداي اسىل قۇندىلىقتار قوعامدا تۇراقتىلىق پەن تاتۋلىقتى نىعايتىپ، ەلىمىزدى وركەندەتۋ ىسىندە ايرىقشا ءرول اتقارادى. سوندىقتان سالت-داستۇرىمىزبەن تىعىز ساباقتاسقان ءداستۇرلى يسلامدى قادىرلەۋ وتە ماڭىزدى.

ادامزات وركەنيەتى عىلىم مەن تەحنولوگيانىڭ دامۋىمەن عانا شەكتەلمەيدى. ۇلت ساپاسىن جاقسارتامىز دەسەك، رۋحانيات سالاسىنا باسا ءمان بەرۋىمىز كەرەك. ءمۇفتيات ەل تاعدىرىنا ايرىقشا ىقپال ەتەتىن وسى جاۋاپتى جۇمىسقا بەلسەنە اتسالىسىپ كەلەدى. يمامدارىمىز حالىقتىڭ ءدىني ساۋاتىن ارتتىرۋعا، وسكەلەڭ ۇرپاققا ونەگەلى تاربيە بەرۋگە جانە ونى جات اعىمداردىڭ اسەرىنەن قورعاۋعا ءوز ۇلەسىن قوسۋدا.

وسى ورايدا قازاقستان مۇسىلماندارى ءدىني باسقارماسىنا جانە بارشا ءدىن قىزمەتكەرلەرىنە شىنايى ريزاشىلىعىمدى بىلدىرەمىن. بۇگىنگى باسقوسۋدا يمامداردىڭ بەدەلىن كۇشەيتۋگە، اتا ءدىنىمىزدىڭ قوعامداعى رولىنە قاتىستى ماڭىزدى وي-پىكىرلەر ايتىلادى دەپ سەنەمىن.

سىزدەرگە زور دەنساۋلىق، باق-بەرەكە تىلەيمىن! فورۋمنىڭ جۇمىسى تابىستى بولسىن!”، دەلىنگەن مەملەكەت باسشىسىنىڭ قۇتتىقتاۋ حاتىندا.

پىكىرلەر