قازاقستاننىڭ يتالياداعى ەلشىلىگىندە «ءداستۇر جانە قازىرگى قازاقستان – عاسىرلار بويى جالعاسقان بايلانىس» تاقىرىبىندا قازاقستاندىق ديزاينەرلەر مەن زەرگەرلەردىڭ توپتامالارىنىڭ تۇساۋكەسەرى ءوتتى، دەپ جازادى "ادىرنا" پورتالى.
وعان 100-دەن استام ادام قاتىستى، ونىڭ ىشىندە يتاليانىڭ شىعارماشىلىق سالاسىنىڭ وكىلدەرى – ديزاينەرلەر، ونەرتانۋشىلار، سۋرەتشىلەر جانە ت.ب. بەدەلدى كىسىلەر بولدى. سونداي-اق ءىس-شاراعا ديپلوماتيالىق كورپۋس وكىلدەرى، جۋرناليستەر جانە ت.ب. قاتىستى. بۇل تۋرالى سىرتقى ىستەر مينيسترلىگى حابارلادى.
تانىستىرىلىمنىڭ ماقساتى – كەز كەلگەن مادەنيەتتىڭ قۇرامداس بولىگى جانە قالىپتاسۋ قۇرالى بولىپ تابىلاتىن بىرەگەي تاريحتى، سالت-ءداستۇردى جانە ۇلتتىق مۇرانى بەينەلەيتىندىكتەن، يتالياندىق كورەرمەندەردى ساندىك-قولدانبالى ونەردەگى ۇردىستەر ارقىلى قازاقستاننىڭ ۇلتتىق ناقىشىمەن تانىستىرۋ.
شاراعا قاتىسۋشىلار الدىندا ءسوز سويلەگەن قازاقستاننىڭ يتالياداعى ەلشىسى ەربولات سەمباەۆ ەۋروپالىقتاردىڭ ازيامەن تانىسۋى حالىقتاردىڭ سالت-داستۇرلەرى مەن تۇرمىس-تىرشىلىگىنىڭ ەرەكشەلىكتەرىن سۋرەتتەگەن اتاقتى يتالياندىق ساياحاتشى ماركو پولونىڭ شىعارمالارىنان باستاۋ العانىن ەرەكشە اتاپ ءوتتى.
تۇساۋكەسەردى سامال تولەڭگىتوۆانىڭ تەكەمەت-سىرماقتان جاسالعان، كيىزدەن جاسالعان بۇيىمدار توپتاماسى اشتى. كورەرمەندەرگە كيىزدى جىبەككە اينالدىرىپ، جىبەك ماتاعا ەرەكشە ورنەكتەر جاساۋعا مۇمكىندىك بەرەتىن، ءوزىنىڭ جەڭىلدىگى مەن ساپاسىن جوعالتپايتىن زاماناۋي تەحنولوگيامەن ۇيلەستىرىلگەن ءداستۇرلى قولونەر ارقىلى جاسالعان شاپاندار مەن شارفتار كورسەتىلدى.
ودان ءارى قازاقستاندىق سانگەرلەر ەۋرازيالىق ديزاينەرلەر وداعىنىڭ مۇشەسى، بەلگىلى سۋرەتشى-زەرگەر نۇردوس الياسقاروۆتىڭ اشەكەي بۇيىمدارىن كوپشىلىك نازارىنا ۇسىندى. ۇلتتىق ناقىشتا جاسالعان سىرعا، بىلەزىك سىندى ايەلدەردىڭ ءتۇرلى اشەكەيلەرى كورسەتىلدى.
سونداي-اق سانگەرلەر ايەلدەر مەن ەرلەر شاپاندارىنىڭ توپتاماسىن – قازاقتىڭ ۇلتتىق كيىمدەرى مەن ەتنيكالىق ديزاينەر تاربيا ايدىمباەۆانىڭ ەتنيكالىق كيىمدەرىن كورسەتتى، ولار زاماناۋي ديزايندا امبەباپ كيىم ۇلگىسى بولىپ تابىلادى. تۇساۋكەسەر قالىڭدىقتىڭ ءداستۇرلى توي كيىمىن كورسەتۋمەن اياقتالدى.
سونداي-اق قوناقتارعا كىلەم جانە باسقا دا كيىزدەن جاسالعان بۇيىمدار كورمەسى ۇيىمداستىرىلدى.
قازاقتىڭ ۇلتتىق كيىمدەرىن كوپشىلىككە پاش ەتكەن مودەلدەر يتاليا ۋنيۆەرسيتەتتەرىندە ءبىلىم الىپ جاتقان قازاقستاندىق ستۋدەنتتەر بولدى.
