بۇگىن «AMANAT» توراعاسى ەرلان قوشانوۆ پارتيا جانىنداعى رەسپۋبليكالىق كەڭەستەردىڭ جاڭا توراعالارىمەن جيىن وتكىزدى. ول مۇنداي كەڭەستەر پارتيانىڭ نەگىزگى ديالوگ الاڭدارى ەكەنىن اتاپ ءوتىپ، اماناتتىقتاردىڭ الدىندا تۇرعان بىرقاتار ماڭىزدى مىندەتتى بەلگىلەپ بەردى. ءىس-شارا پارتيانىڭ وڭىرلىك فيليالدارىنىڭ قوسىلۋىمەن بەينەكونفەرەنتسبايلانىس رەجيمىندە ءوتتى.
ءسوز باسىندا ەرلان قوشانوۆ كەڭەستەردىڭ نەگىزگى ماقساتىنىڭ ءبىرى – پرەزيدەنت پەن پارتيانىڭ سايلاۋالدى باعدارلامالارىنىڭ ورىندالۋىنا تۇراقتى مونيتورينگ جۇرگىزۋ ەكەنىن اتاپ ءوتتى.
«سالالىق كەڭەستەردىڭ تيىمدىلىگىن تۇبەگەيلى ارتتىرىپ، بۇل جۇمىسقا پارتيانىڭ جاڭا جاقتاستارىن، ساراپشىلار مەن قوعامدىق پىكىر كوشباسشىلارىن تارتۋ كەرەك. ءبىزدىڭ كەڭەستەر قوعامدى تولعاندىرعان تاقىرىپتاردى انىقتاپ، ۋاقىتىلى كوتەرىپ وتىرۋى، پروبلەمالىق نىساندارعا بارۋى، ولارعا قاتىستى شەشىم شىعارىپ وتىرۋى ءتيىس. بۇل پارتيالىق قۇرىلىمداردىڭ جۇمىسىن جانداندىرۋعا جانە «AMANAT»-تىڭ ءاربىر مۇشەسىنىڭ سايلاۋالدى مىندەتتەمەلەردى ورىنداۋ كەزىندەگى جەكە جاۋاپكەرشىلىگىن ارتتىرۋعا مۇمكىندىك بەرەدى»، – دەدى پارتيا توراعاسى.
ەرلان قوشانوۆ پارتيا قىزمەتىنىڭ اشىقتىعى مەن جاريالىعى قانشالىقتى ماڭىزدى ەكەنىنە جەكە توقتالدى.
«ماجىلىستەگى «AMANAT» فراكتسياسى ءار توقسان سايىن ورتالىق مەملەكەتتىك ورگانداردىڭ سايلاۋالدى ۋادەلەردى ورىنداۋ اياسىنداعى رەسپۋبليكالىق جول كارتاسىن جۇزەگە اسىرۋ جونىندەگى ەسەبىن تىڭداپ وتىرادى. جاريا تالقىلاۋ اشىقتىقتى قامتاماسىز ەتەدى جانە ۋاكىلەتتى مينيسترلىكتەردىڭ شەشىم قابىلداۋ كەزىندەگى جاۋاپكەرشىلىگىن ارتتىرادى. سوندىقتان وڭىرلەردە جەرگىلىكتى اتقارۋشى ورگانداردىڭ وسىنداي تىڭداۋلارىن ۇيىمداستىرۋ قاجەت. وسى ورايدا، سايلاۋالدى ۋادەلەردىڭ ورىندالۋىنا مونيتورينگ جۇرگىزۋ ماقساتىندا كەڭەستەر مەن فراكتسيالاردىڭ ءوزارا ءىس-قيمىلىن قامتاماسىز ەتۋدى تاپسىرامىن»، – دەدى پارتيا توراعاسى.
وتىرىس بارىسىندا ەرلان قوشانوۆ پارتيانىڭ ساياسي كەڭەسى بيۋروسىنىڭ شەشىمىمەن تاعايىندالعان «AMANAT» جانىنداعى كەڭەستەردىڭ جاڭا باسشىلارىن تانىستىردى.
وسىلايشا، پارتيالىق باقىلاۋ كوميتەتىنە – پاۆەل كازانتسەۆ، ەكولوگيالىق كەڭەسكە – باۋىرجان سماعۇلوۆ، وڭىرلىك دامۋ جونىندەگى كەڭەسكە – بەرىك بەيسەنعاليەۆ، ەكونوميكا، تسيفرلاندىرۋ جانە يننوۆاتسيالاردى دامىتۋ ماسەلەلەرى جونىندەگى كەڭەسكە – ەكاتەرينا سمىشلياەۆا، اگرارلىق سەكتوردىڭ ماسەلەلەرى جونىندەگى كەڭەسكە – نۇرجان اشىمبەتوۆ، جاستاردى قولداۋ جونىندەگى كەڭەسكە – نارتاي سارسەنعاليەۆ باسشىلىق ەتەتىن بولدى.
سونىمەن قاتار، ەرلان سايروۆ – سىبايلاس جەمقورلىققا قارسى ءىس-قيمىل جونىندەگى كەڭەسكە، جۇلدىز سۇلەيمەنوۆا – ءبىلىم جانە دەنساۋلىق ساقتاۋ ماسەلەلەرى جونىندەگى كەڭەسكە، امانجول ءالتاي – ازاماتتىق قوعام مەن مادەنيەتتى دامىتۋ جونىندەگى «Miras» كەڭەسىنە، دينارا زاكيەۆا – وتباسى جانە حالىقتى الەۋمەتتىك قورعاۋ ماسەلەلەرى جونىندەگى كەڭەسكە جەتەكشىلىك ەتۋدى جالعاستىرادى.
ءوز كەزەگىندە، سىبايلاس جەمقورلىققا قارسى ءىس-قيمىل جونىندەگى كەڭەس توراعاسى ەرلان سايروۆ الداعى جۇمىس جوسپارىمەن ءبولىستى.
«ءبىزدىڭ باستى ماقساتىمىز – سايلاۋالدى ۋادەلەردىڭ بارلىعىن جۇزەگە اسىرۋ. ال ناقتى ءبىزدىڭ كەڭەسكە قاتىستى ايتاتىن بولسام، مەملەكەت باسشىسىنىڭ ەلدەن زاڭسىز شىعارىلعان كاپيتالدى قايتارۋ جونىندەگى تاپسىرماسىن ورىنداۋعا بارىنشا كۇش سالۋىمىز كەرەك. وڭىرلەردە بيۋروكراتيا مەن پروتەكتسيونيزم ءالى دە ساقتالىپ وتىر. ءبىزدىڭ كەڭەستەرىمىز وسى جانە وزگە دە وزەكتى ماسەلەلەردى شەشۋگە اتسالىسۋى ءتيىس. پارتياعا دەگەن سەنىم دەڭگەيى وسى جۇمىستىڭ ورىندالۋىنا بايلانىستى بولماق»، – دەدى ول.
ءبىلىم جانە دەنساۋلىق ساقتاۋ ماسەلەلەرى جونىندەگى كەڭەس توراعاسى جۇلدىز سۇلەيمەنوۆانىڭ ايتۋىنشا، كەڭەس جۇمىسىنىڭ ارقاسىندا تۇركىستان وبلىسىنا قاراستى اۋىلدارداعى 45 مەكتەپكە كۇردەلى جوندەۋ جۇرگىزۋ ماسەلەسى شەشىلدى. سونىمەن قاتار، كەڭەس مۇشەلەرى ۇلتتىق عىلىمي ونكولوگيالىق ورتالىقتىڭ جاڭا عيماراتىن سالۋ ءۇشىن بيۋدجەت قاراجاتىن بولۋگە اتسالىستى.
«ءار ازامات الەۋمەتتىك جاعدايىنا نەمەسە تۇرعىلىقتى جەرىنە قاراماستان ساپالى ءبىلىم الۋعا مىندەتتى. بۇدان بولەك، دەنساۋلىق ساقتاۋ سالاسىنا دا نازار اۋدارىپ كەلەمىز. ياعني، ءدارى-دارمەكتىڭ قولجەتىمدىلىگىن ارتتىرۋ، اۋىل مەديتسيناسىن دامىتۋ جانە بىلىكتى جاس مامانداردى تارتۋ باعىتىندا جۇمىس ىستەپ جاتىرمىز»، – دەدى ول.
ءوز كەزەگىندە، پاۆلودار وبلىسىنداعى ەكولوگيالىق كەڭەستىڭ توراعاسى يرينا چيدۋنچي مەملەكەتتىك ورگاندارمەن كەرى بايلانىس ورناماي وتىرعانىن، اتاپ ايتقاندا كەڭەس جولداعان حاتتاردىڭ 80%-نا نەمقۇرايلى جاۋاپ قايتارىلاتىنىن ايتتى.
ال تۇركىستان وبلىسىنداعى وتباسى جانە حالىقتى الەۋمەتتىك قورعاۋ ماسەلەلەرى جونىندەگى كەڭەستىڭ توراعاسى جاڭاباي اعابەكوۆ اماناتتىقتار جەدەل ارەكەت ەتۋ توپتارى ارقىلى «باقىتتى وتباسى» جوباسى اياسىندا ءومىردىڭ قيىن جاعدايىنا تاپ بولعان وڭىردەگى وتباسىلارعا كومەك كورسەتەتىنىن اتاپ ءوتتى.
جيىن قورىتىندىسىندا «AMANAT» توراعاسى ەرلان قوشانوۆ پارتيانىڭ ورتالىق اپپاراتى مەن وڭىرلىك فيليالداردىڭ الدىنا جۇمىستى كۇشەيتۋ بويىنشا بىرقاتار ناقتى مىندەت قويدى.
ايتا كەتەيىك، بىلتىر رەسپۋبليكالىق كەڭەستەردىڭ 56 وتىرىسى ءوتىپ، وندا 91 ماسەلە قارالدى. مەملەكەتتىك ورگاندارعا ارنالعان 584 ۇسىنىم ازىرلەندى. سونداي-اق، كوميتەتتەردىڭ 23 وتىرىسى وتكىزىلىپ، وندا 52 ماسەلە قارالدى جانە 59 ۇسىنىم دايىندالدى. وڭىرلىك دەڭگەيدەگى كەڭەستەر 5,6 مىڭنان استام وتىرىس وتكىزىپ، وندا 11,2 مىڭعا جۋىق ماسەلە قارالدى.
رەسپۋبليكالىق دەڭگەيدەگى كەڭەستەر سانى 14-تەن 10-عا دەيىن، ال وڭىرلىك دەڭگەيدە – 1700-دەن 379-عا دەيىن قىسقاردى.
