Turǵyn úı baǵdarlamalary boıynsha bastapqy jarnany alyp tastaý usynyldy. Bul týraly Májilis depýtaty Gaýhar Tanasheva kópbalaly, tolyq emes jáne múgedektigi bar balalardy tárbıelep otyrǵan otbasylar úshin memlekettik turǵyn úı baǵdarlamalaryn qaıta qaraýdy usyndy, dep habarlaıdy “Adyrna” tilshisi.
2023 jylǵa “Baqytty otbasy” baǵdarlamasyna 3176 ótinishke, “Shańyraq” baǵdarlamasyna 3610 ótinishke 71,9 mlrd teńge bólindi. Bul baspana kezeginde turǵan 415 700 adamnyń bıyl tek 6 786 ótinishi maquldanady degen sóz. Bul ıpoteka boıynsha baspana ala alatyn muqtajdardyń jalpy sanynyń 1,6% quraıdy, - dedi Tanasheva.
Depýtat kópbalaly, tolyq emes jáne múgedektigi bar balalardy tárbıelep otyrǵan otbasylarǵa ıpotekalyq nesıeni qoljetimdi etý qajet ekenin aıtty.
Turǵyn úı kezegine turý úshin turaqty turǵylyqty jeri boıynsha úsh jyldan astam tirkeý bolýǵa mindetti. Is júzinde halyq aqyly tirkeý problemasyna tap bolady: bul sybaılas jemqorlyqty týdyrady, azamattardy osylaısha zańsyzdyqtarǵa ıtermeleıdi. Sondaı-aq turaqty, jaqsy jalaqy alatyn jumys kerek. Sońǵy alty aıdaǵy otbasynyń jıyntyq tabysy joǵary bolýy kerek. Al ıpotekany maquldaýdaǵy mańyzdy sátterdiń biri – jaqsy nesıe tarıhynyń bolýy. Biraq osy úsh sanattaǵy otbasylar nesıeni óteý máselesine jıi tap bolady jáne olardyń barlyǵynda nesıe tarıhynda kórsetilgen keshiktirilgen tólemder bar. Osyǵan baılanysty olar ıpotekaǵa páter satyp ala almaıdy, - deıdi Tanasheva.
Osyǵan baılanysty ol “Baqytty otbasy” jáne “Shańyraq” baǵdarlamalary boıynsha bastapqy jarnany mindetti sharttardan alyp tastaýdy nemese úsh sanatqa – kópbalaly otbasylarǵa, tolyq emes otbasylarǵa jáne múgedektigi bar balalardy tárbıelep otyrǵan otbasylarǵa turǵyn úı sertıfıkatyn berýdi usyndy.
Sondaı-aq erekshe qajettiligi bar balalardy tárbıelep otyrǵan otbasylardy jáne múmkindigi shekteýli eresekterdi turǵyn úımen qamtamasyz etý úshin jeke kezek jasaý, “Baqytty otbasy” baǵdarlamasyna tolyq emes otbasylardy qosý usynyldy.
