قازاقستان پرەزيدەنتى قاسىم-جومارت توقاەۆ ماسكەۋدە ەۋرازيالىق ەكونوميكالىق فورۋمدا سويلەگەن سوزىندە رەسەي مەن بەلارۋس وداقتىق مەملەكەتتەرى تۋرالى ايتتى، دەپ حابارلايدى “ادىرنا” ۇلتتىق پورتالى.
توقاەۆ ەۋرازيا ەكونوميكالىق وداعى (ەاەو) قۇرامىندا رەسەي مەن بەلارۋس مەملەكەتى بار ەكەنىن، الايدا بۇل ۇيىمدا قازاقستان، قىرعىزستان جانە ارمەنيا سياقتى ينتەگراتسيانىڭ باسقا دەڭگەيىندەگى مەملەكەتتەر دە بارىن ەسكە سالدى.
ء"بىز نازارعا الۋىمىز كەرەك كونتسەپتۋالدى شىندىق نەمەسە ەرەكشەلىك بار - بۇل بەلارۋس پەن رەسەيدەن تۇراتىن وداقتىڭ ەاەو-دا بولۋى. بۇل وداقتىڭ تۇجىرىمدامالىق جانە يدەولوگيالىق نەگىزى ايتارلىقتاي سالماقتى. بۇل قوعام مويىنداعان ءوزارا مادەني، تىلدىك، ءدىني بىرەگەيلىك. ياعني ءبىر حالىقتىڭ بار ەكەنىن مويىنداۋ", – دەدى قاسىم-جومارت توقاەۆ.
پرەزيدەنتتىڭ ايتۋىنشا، رەسەي مەن بەلارۋستىڭ ەاەو اياسىنداعى وداقتاستىعى الەم تاريحىندا بولماعان تاجىريبەنى تۋىنداتىپ وتىر.
"الەمدىك ساياسي تاريحتا بىرىڭعاي ساياسي-قۇقىقتىق، ۆاليۋتالىق، مادەني-گۋمانيتارلىق كەڭىستىگى بار "ەكى ەل – ءبىر مەملەكەت" فورمۋلاسى بويىنشا مەملەكەت قۇرۋدىڭ بىرەگەي ۇلگىسى جاسالىپ وتىر. ءبىرتۇتاس وداقتىق ۇكىمەت، ءبىرتۇتاس وداق پارلامەنتى بار. كەشىرىڭىزدەر، ءتىپتى يادرولىق قارۋ دا قازىر ەكىگە بىرەۋ", – دەدى قازاقستان پرەزيدەنتى.
مەملەكەت باسشىسى ەۋرازيالىق ەكونوميكالىق وداقتىڭ ءوز ىشىندە ينتەگراتسيانىڭ قوس مودەلى قالىپتاسقانىن ايتىپ، قازاقستان، قىرعىزستان، ارمەنيا ۇستانعان باعىتپەن ساناسۋ كەرەكتىگىن اتاپ ءوتتى.
"قازاقستان، قىرعىزستان جانە ارمەنيا ۇسىناتىن ينتەگراتسيانىڭ تاعى ءبىر دەڭگەيى بار. ءبىز بۇل شىندىقتى ەسكەرۋىمىز كەرەك. بۇل جاعدايدا ءبىز قالاي جۇمىس ىستەيمىز؟ بۇل كونتسەپتۋالدى ماسەلە. مەنىڭ ويىمشا، بۇل ماسەلەنى وسى ەكونوميكالىق فورۋمدا تالقىلاۋ كەرەك”، – دەپ تۇيىندەدى مەملەكەت باسشىسى.
ايتا كەتۋ كەرەك، قاسىم-جومارت توقاەۆ ءوز سوزىندە ەاەو-نىڭ نەگىزگى قاعيداتتارىن دا ەسكە سالدى.
