«تاراز قالاسىندا ورنالاسقان پرەزيدەنت رەزيدەنتسياسى جەرگىلىكتى اكىمدىككە بەرىلىپ، بالالارعا ارنالعان جىل بويى جۇمىس اتقاراتىن 40 ورىندىق وبلىستىق «ءمولدىر بۇلاق» وقۋ-ساۋىقتىرۋ ورتالىعىن اشۋعا 610,8 ملن. تەڭگە قاراستىرىلدى» بۇل تۋرالى وڭىرلىك كوممۋنيكاتسيالار قىزمەتى الاڭىندا جامبىل وبلىسى اكىمىنىڭ ءبىرىنشى ورىنباسارى نۇرجان كالەندەروۆ ايتتى.
«جالپىعا مىندەتتى ءبىلىم بەرۋ قورى ەسەبىنەن كوپ بالالى جانە از كامتىلعان وتباسىلاردان شىققان 48 671 بالانى ىستىق تاماقپەن، كيىم-كەشەكپەن جانە جازعى ساۋىقتىرۋ لاگەرلەرىمەن قامتامسىز ەتۋگە 5,7 ملرد. تەڭگە كوزدەلىپ وتىر.
مەملەكەت باسشىسىنىڭ از قامتىلعان وتباسىدان شىققان 1-4 سىنىپتا وقيتىن 70 639 بالانى جانە مەكتەپكە دەيىنگى مەكەمەلەردە تاربيەلەنەتىن 11 326 بالانى ىستىق تاماقپەن قامتۋ ماقساتىندا بەرگەن تاپسىرماسىن (26.11.2022ج.) ورىنداۋ ءۇشىن 3 ملرد.تەڭگەگە جۋىق قارجى قارالدى»،-دەپ اتاپ ءوتتى نۇرجان ءسابيتۇلى. سونداي-اق، ول 2020-2023 جىلدارى 44 مىڭعا جۋىق پەداگوگتەردىڭ جالاقىسى 100% - عا، ياعني 2 ەسەگە وسكەنىن دە مالىمدەدى.
ال، سپورت سالاسىنا وڭىردە 13,3 ملرد. تەڭگە قاراستىرىلىپ، ونىڭ 6,9 ملرد. تەڭگەسى سالاداعى 2 872 شتاتتىق بىرلىكتەگى سپورت ماماندارىنىڭ ايلىق جالاقىسىنا جۇمسالعان.
«مەملەكەتتىك سپورتتىق تاپسىرىسقا 1,2 ملرد.تەڭگە ءبولىنىپ، 119 سپورتتىق سەكتسيا اشىلدى، وندا 6 818 بالاعا سپورتتىڭ 17 تۇرىنەن ۆاۋچەر بەرىلدى. بۇگىنگە 23 سپورت نىسانىنىڭ قۇرىلىسى سالىنۋدا، ونىڭ 16-سى بيىل پايدالانۋعا بەرىلەتىن بولادى، ول ءۇشىن 3,5 ملرد. تەڭگە ءبولىنىپ وتىر. ناتيجەسىندە، حالىقتىڭ سپورتتىق ينفراقۇرىلىممەن قامتاماسىز ەتىلۋ دەڭگەيىن 59%-عا (2022 ج.-57,5%), دەنە شىنىقتىرۋ جانە سپورتپەن جۇيەلى تۇردە شۇعىلدانۋشىلار ۇلەسىن 42%-عا (2022 ج. - 39,1%) جەتكىزۋ كوزدەلۋدە»،- دەيدى وبلىس اكىمىنىڭ ءبىرىنشى ورىنباسارى.
بريفينگتە نۇرجان كالەندەروۆ اۋىلعا جۇمىس ىستەۋگە كەلگەن جاستاردى قولداۋدىڭ ەرەكشە نازاردا ەكەنىن دە اتاپ ءوتتى.
«2022 جىلى «ديپلوممەن اۋىلعا» جوباسى اياسىندا 291 مامانعا تۇرعىن ءۇي ساتىپ الۋعا نەمەسە سالۋعا 1,3 ملرد.تەڭگە نەسيە بەرىلدى. اۋداندىق بيۋدجەت ەسەبىنەن 511 مامانعا 156,8 ملن. تەڭگە بىرجولعى كوتەرمە جاردەماقىسى تولەندى. اعىمداعى جىلى 204 مامانعا تۇرعىن ءۇي ساتىپ الۋعا نەمەسە سالۋعا 1,1 ملرد. تەڭگە بيۋدجەتتىك نەسيە، 525 مامانعا 188,0 ملن. تەڭگەگە بىرجولعى كوتەرمە جاردەماقى تولەۋ جوسپارلاپ وتىرمىز»،- دەيدى نۇرجان ءسابيتۇلى.
