جاس زەرتتەۋشى ساعىن جۇمادىلداەۆ اقش-تىڭ داللاس قالاسىندا وتكەن حالىقارالىق عىلىمي-ينجەنەرلىك كورمەدە (ISEF) Mu Alpha Theta اكادەمياسىنىڭ 2-دارەجەلى ديپلومى مەن 1000 دوللارلىق سىيلىعىنا يە بولدى. ونىڭ زەرتتەۋ جۇمىسى مەن باعدارلامالاۋ داعدىلارى قازىلار القاسىنىڭ نازارىن اۋداردى جانە وسى سالاداعى ۇلكەن جەتىستىك رەتىندە تانىلدى، دەپ حابارلايدى “ادىرنا” ءتىلشىسى.
ايتا كەتەيىك، ISEF – الەمدەگى جاس ونەرتاپقىشتاردىڭ عىلىمي زەرتتەۋلەرى مەن تەحنيكالىق قۇرىلعىلارىن ۇسىنۋ ءۇشىن جينالاتىن جارىس. بۇل ءىس-شارا يننوۆاتسيالىق يدەيالار مەن شەشىمدەردى، سونىڭ ىشىندە، تالانتتى جاستاردىڭ باعدارلامالاۋ سالاسىنداعى جەتىستىكتەرىن كورسەتۋگە ارنالعان الاڭ.
قازاقستاندىق ساعىن جۇمادىلداەۆ قازىلار القاسى مەن كورمەگە كەلۋشىلەردى ءوزىنىڭ جوبالىق جۇمىسىمەن تاڭ قالدىردى. ول بەلگىلى عالىم مۋردىڭ ايماقتى ترومينو بلوكتارىمەن تولتىرۋ جايىنداعى ءادىسى ايماققا ءبىر كلەتكا قوسىلسا دا، نەمەسە ءبىر كلەتكا الىنىپ تاستالسا دا قولدانىلاتىنىن ماتەماتيكالىق ادىستەرمەن دالەلدەدى.
Mu Alpha Theta اكادەمياسىنىڭ نەگىزگى ماقساتى – ۇلتتىق ورتا مەكتەپ جانە كوللەدج ستۋدەنتتەرىنە ماتەماتيكانى قۇرمەتمەتتەۋگە جانە ماتەماتيكانى ۇيرەنۋگە كومەكتەسۋ. Mu Alpha Theta سىيلىعى ورتا مەكتەپ وقۋشىلارىنا ماتەماتيكاعا قاتىستى ماسەلەلەرىنىڭ جان-جاقتى مۇقيات جانە شىعارماشىلىق زەرتتەۋلەرى ءۇشىن بەرىلەدى. ساعىن جۇمىسىنىڭ ەرەكشەلىگىن كومپيۋتەر ەسەپتەۋلەرىنىڭ دۇرىس ەكەنىن انىق ماتەماتيكالىق دالەلدەرمەن كەلتىردى. اسىرەسە باعان سانى ءتورت بولسا مەكتەپ باعدارلاماسىنا نەگىزدەلگەن ادەمى دە قاراپايىم ءادىسى بار ەكەنىن بايقاتتى.
سونىمەن قاتار ساعىن جۇمادىلداەۆتىڭ جەتىستىگى قازاقستاندا جانە باسقا ەلدەردە عىلىم، تەحنولوگيا، ينجەنەريا جانە ماتەماتيكا (STEM) سالاسىندا ءبىلىم بەرۋدى دامىتۋ مەن قولداۋدىڭ ماڭىزدىلىعىن كورسەتەدى. بۇگىنگى تاڭدا باعدارلامالاۋ ماماندارى مەن ينجەنەرلەر قوعامدا ماڭىزدى ءرول اتقارادى.
